ਵੋਡਾਫੋਨ ਆਈਡੀਆ ਨੂੰ ਵੱਡੀ ਰਾਹਤ: ਕੈਬਿਨੇਟ ਨੇ ₹87,695 ਕਰੋੜ ਦੇ AGR ਬਕਾਇਆ ਕੀਤੇ ਫ੍ਰੀਜ਼

ਨਵੀਂ ਦਿੱਲੀ : ਕਰਜ਼ੇ ਦੇ ਭਾਰ ਹੇਠ ਦਬੀ ਟੈਲੀਕੌਮ ਕੰਪਨੀ ਵੋਡਾਫੋਨ ਆਈਡੀਆ (Vi) ਨੂੰ ਕੇਂਦਰ ਸਰਕਾਰ ਵੱਲੋਂ ਵੱਡੀ ਰਾਹਤ ਮਿਲੀ ਹੈ। ਕੇਂਦਰੀ ਕੈਬਿਨੇਟ ਨੇ ਬੁੱਧਵਾਰ ਨੂੰ ਕੰਪਨੀ ਦੇ ₹87,695 ਕਰੋੜ ਦੇ ਐਡਜਸਟਡ ਗ੍ਰਾਸ ਰੇਵਿਨਿਊ (AGR) ਬਕਾਇਆ ਰਕਮ ਨੂੰ 31 ਦਸੰਬਰ ਤੱਕ ਫ੍ਰੀਜ਼ ਕਰਨ ਦੇ ਪ੍ਰਸਤਾਵ ਨੂੰ ਮਨਜ਼ੂਰੀ ਦੇ ਦਿੱਤੀ।

ਰਿਪੋਰਟਾਂ ਮੁਤਾਬਕ, ਇਸ ਫੈਸਲੇ ਨਾਲ ਵੋਡਾਫੋਨ ਆਈਡੀਆ ਨੂੰ ਇਹ ਰਕਮ ਤੁਰੰਤ ਅਦਾ ਨਹੀਂ ਕਰਨੀ ਪਵੇਗੀ। ਇਹ ਬਕਾਇਆ ਰਕਮ ਵਿੱਤ ਵਰ੍ਹਾ 2031-32 (FY32) ਤੋਂ ਲੈ ਕੇ FY41 ਤੱਕ ਲੰਬੇ ਸਮੇਂ ਦੌਰਾਨ ਕਿਸ਼ਤਾਂ ਵਿੱਚ ਅਦਾ ਕੀਤੀ ਜਾਵੇਗੀ।

ਹਾਲਾਂਕਿ, ਇਹ ਰਾਹਤ FY18 ਅਤੇ FY19 ਨਾਲ ਸੰਬੰਧਿਤ AGR ਬਕਾਇਆ ‘ਤੇ ਲਾਗੂ ਨਹੀਂ ਹੋਵੇਗੀ। ਇਹ ਰਕਮ ਪਹਿਲਾਂ ਤੋਂ ਤੈਅ ਅਨੁਸਾਰ FY26 ਤੋਂ FY31 ਦਰਮਿਆਨ ਅਦਾ ਕਰਨੀ ਪਵੇਗੀ, ਕਿਉਂਕਿ ਇਹ ਬਕਾਇਆ ਸੁਪਰੀਮ ਕੋਰਟ ਦੇ 2020 ਦੇ ਹੁਕਮ ਅਧੀਨ ਫਾਈਨਲ ਹੋ ਚੁੱਕਾ ਹੈ।

ਰਿਪੋਰਟਾਂ ਅਨੁਸਾਰ, ਫ੍ਰੀਜ਼ ਕੀਤੀ ਗਈ ਰਕਮ ਦੀ ਭਵਿੱਖ ਵਿੱਚ ਡਿਪਾਰਟਮੈਂਟ ਆਫ ਟੈਲੀਕਮਿਊਨੀਕੇਸ਼ਨ (DoT) ਵੱਲੋਂ ਡਿਡਕਸ਼ਨ ਵੈਰੀਫਿਕੇਸ਼ਨ ਗਾਈਡਲਾਈਨਜ਼ ਅਤੇ ਆਡਿਟ ਰਿਪੋਰਟਾਂ ਦੇ ਆਧਾਰ ‘ਤੇ ਮੁੜ ਸਮੀਖਿਆ ਕੀਤੀ ਜਾਵੇਗੀ। ਇਸ ਸੰਬੰਧੀ ਅੰਤਿਮ ਫੈਸਲਾ ਇੱਕ ਸਰਕਾਰੀ ਕਮੇਟੀ ਵੱਲੋਂ ਲਿਆ ਜਾਵੇਗਾ।

ਸਰਕਾਰ ਦਾ ਇਹ ਕਦਮ ਵੋਡਾਫੋਨ ਆਈਡੀਆ ਵਿੱਚ ਆਪਣੀ ਲਗਭਗ 49 ਫੀਸਦੀ ਹਿੱਸੇਦਾਰੀ ਨੂੰ ਸੁਰੱਖਿਅਤ ਕਰਨ, ਟੈਲੀਕੌਮ ਸੈਕਟਰ ਵਿੱਚ ਮੁਕਾਬਲੇ ਨੂੰ ਕਾਇਮ ਰੱਖਣ ਅਤੇ ਦੇਸ਼ ਭਰ ਦੇ ਕਰੀਬ 20 ਕਰੋੜ ਗ੍ਰਾਹਕਾਂ ਦੇ ਹਿੱਤਾਂ ਦੀ ਰੱਖਿਆ ਲਈ ਲਿਆ ਗਿਆ ਹੈ।

ਇਸ ਫੈਸਲੇ ਤੋਂ ਬਾਅਦ ਸ਼ੇਅਰ ਬਾਜ਼ਾਰ ਵਿੱਚ ਵੋਡਾਫੋਨ ਆਈਡੀਆ ਦੇ ਸ਼ੇਅਰਾਂ ‘ਤੇ ਦਬਾਅ ਵੇਖਣ ਨੂੰ ਮਿਲਿਆ। ਦੁਪਹਿਰ ਕਰੀਬ 3:05 ਵਜੇ, NSE ‘ਤੇ ਕੰਪਨੀ ਦਾ ਸ਼ੇਅਰ ਕਰੀਬ 10.36 ਫੀਸਦੀ ਦੀ ਗਿਰਾਵਟ ਨਾਲ ₹10.8 ਦੇ ਆਸ-ਪਾਸ ਟ੍ਰੇਡ ਕਰ ਰਿਹਾ ਸੀ।