ਨਿੱਜਰ ਰੋਡ ਦੇ ਰੁਕੇ ਹਿੱਸੇ ’ਤੇ ਮੁੜ ਗੂੰਜੀਆਂ ਮਸ਼ੀਨਾਂ — ਵਿਕਾਸ ਦੀ ਰਫ਼ਤਾਰ ਫਿਰ ਤੇਜ

ਮੋਹਾਲੀ/ਖਰੜ: ਨਿੱਜਰ ਰੋਡ ਦਾ ਨਿਰਮਾਣ ਕੰਮ ਪਹਿਲਾਂ ਤੋਂ ਹੀ ਜਾਰੀ ਸੀ, ਪਰ ਵਿਚਕਾਰ ਇੱਕ ਮਹੱਤਵਪੂਰਨ ਪੈਚ ਲੰਮੇ ਸਮੇਂ ਤੋਂ ਰੁਕਿਆ ਹੋਇਆ ਸੀ। ਅੱਜ ਉਸ ਰੁਕੇ ਹੋਏ ਹਿੱਸੇ ’ਤੇ ਵੀ ਕੰਮ ਮੁੜ ਸ਼ੁਰੂ ਹੋ ਗਿਆ ਹੈ, ਜਿਸ ਨਾਲ ਇਲਾਕਾ ਵਾਸੀਆਂ ਵਿੱਚ ਖੁਸ਼ੀ ਦੀ ਲਹਿਰ ਦੌੜ ਗਈ ਹੈ।

ਮਾਤਾ ਮੰਸਾ ਦੇਵੀ ਐਸਬੀਪੀ ਸੋਸਾਇਟੀ ਤੋਂ ਛੱਜੂਮਾਜਰਾ ਗੁਰਦੁਆਰਾ ਚੌਂਕ ਅਤੇ ਉੱਥੋਂ ਬਲਿਆਲੀ ਪਿੰਡ ਤੱਕ ਫੈਲੀ ਇਸ ਸੜਕ ਦਾ ਇਹ ਹਿੱਸਾ ਕਾਫੀ ਸਮੇਂ ਤੋਂ ਬੇਹਾਲ ਸੀ। ਹੁਣ ਮੌਕੇ ’ਤੇ ਸਮੱਗਰੀ ਪਹੁੰਚ ਚੁੱਕੀ ਹੈ ਅਤੇ ਲੈਵਲਿੰਗ, ਗਿੱਟੀ ਪਾਉਣ ਅਤੇ ਹੋਰ ਤਕਨੀਕੀ ਕਾਰਵਾਈਆਂ ਤੇਜ਼ੀ ਨਾਲ ਕੀਤੀਆਂ ਜਾ ਰਹੀਆਂ ਹਨ। ਉਮੀਦ ਜਤਾਈ ਜਾ ਰਹੀ ਹੈ ਕਿ ਕੁਝ ਹੀ ਦਿਨਾਂ ਵਿੱਚ ਇਹ ਹਿੱਸਾ ਵੀ ਪੂਰੀ ਤਰ੍ਹਾਂ ਤਿਆਰ ਹੋ ਕੇ ਆਵਾਜਾਈ ਲਈ ਸੁਚੱਜਾ ਬਣ ਜਾਵੇਗਾ।

ਇਸ ਮਾਮਲੇ ਵਿੱਚ ਖਰੜ ਹਲਕੇ ਦੀ ਵਿਧਾਇਕ ਅਨਮੋਲ ਗਗਨ ਮਾਨ ਦੀ ਲਗਾਤਾਰ ਪਹਲ ਅਤੇ ਦਖਲਅੰਦਾਜ਼ੀ ਅਹਿਮ ਸਾਬਤ ਹੋਈ ਹੈ। ਉਨ੍ਹਾਂ ਨੇ ਮਸਲੇ ਨੂੰ ਗੰਭੀਰਤਾ ਨਾਲ ਲੈਂਦਿਆਂ ਪ੍ਰਸ਼ਾਸਨ ਨਾਲ ਸਮਨਵਯ ਕਰਕੇ ਰੁਕਿਆ ਕੰਮ ਦੁਬਾਰਾ ਚਲਾਇਆ। ਇਲਾਕਾ ਵਾਸੀਆਂ ਦਾ ਕਹਿਣਾ ਹੈ ਕਿ ਵਿਧਾਇਕ ਮਾਨ ਹਮੇਸ਼ਾ ਜਨਹਿਤ ਮੁੱਦਿਆਂ ’ਤੇ ਤੁਰੰਤ ਕਦਮ ਚੁੱਕਦੇ ਹਨ ਅਤੇ ਵਿਕਾਸ ਕਾਰਜਾਂ ਨੂੰ ਪ੍ਰਾਥਮਿਕਤਾ ਦਿੰਦੀਆਂ ਹਨ।

ਉਨ੍ਹਾਂ ਦੇ ਪੀ.ਏ. ਵਿਕਾਸ ਮੋਹਨ ਮੌਕੇ ’ਤੇ ਖੁਦ ਹਾਜ਼ਰ ਰਹਿ ਕੇ ਸਾਰੇ ਇੰਤਜ਼ਾਮਾਂ ਦੀ ਦੇਖਭਾਲ ਕਰ ਰਹੇ ਹਨ। ਲੇਬਰ ਤੋਂ ਲੈ ਕੇ ਰੋਡ ਰੋਲਰ ਅਤੇ ਜੇਸੀਬੀ ਮਸ਼ੀਨਾਂ ਤੱਕ ਹਰ ਇਕ ਪ੍ਰਬੰਧ ਸੁਚਾਰੂ ਢੰਗ ਨਾਲ ਯਕੀਨੀ ਬਣਾਇਆ ਗਿਆ। ਇਸ ਮੌਕੇ ’ਤੇ ਵਿਕਾਸ ਮੋਹਨ ਨੇ ਕਿਹਾ,
“ਸਾਡੀ ਕੋਸ਼ਿਸ਼ ਹੈ ਕਿ ਜੋ ਵੀ ਕੰਮ ਰੁਕਿਆ ਹੋਇਆ ਸੀ, ਉਹ ਹੁਣ ਬਿਨਾ ਕਿਸੇ ਰੁਕਾਵਟ ਦੇ ਪੂਰਾ ਕੀਤਾ ਜਾਵੇ। ਇਲਾਕੇ ਦੇ ਲੋਕਾਂ ਨੂੰ ਸੁਵਿਧਾਜਨਕ ਅਤੇ ਮਜ਼ਬੂਤ ਸੜਕ ਮੁਹੱਈਆ ਕਰਵਾਉਣਾ ਸਾਡੀ ਪਹਿਲ ਹੈ।”

ਛੱਜੂਮਾਜਰਾ ਦੀ ਕਾਪਾ ਟੀਮ ਦੇ ਨੌਜਵਾਨਾਂ ਨੇ ਵੀ ਲਗਾਤਾਰ ਮਿਹਨਤ ਕਰਕੇ ਇਸ ਮਸਲੇ ਨੂੰ ਉਭਾਰਿਆ। ਟੀਮ ਦੇ ਮੈਂਬਰਾਂ ਅਤੇ ਇਲਾਕਾ ਵਾਸੀਆਂ — ਐਕਮੀ ਹਾਈਟਸ, ਰਮਣ ਐਨਕਲੇਵ, ਐਸਬੀਪੀ ਗਾਰਡੇਨੀਆ ਅਤੇ ਹੋਰ ਰਹਿਣ ਵਾਲਿਆਂ — ਵੱਲੋਂ ਪੂਰਾ ਸਹਿਯੋਗ ਦਿੱਤਾ ਜਾ ਰਿਹਾ ਹੈ।

ਕਾਪਾ ਟੀਮ ਦੇ ਵਾਈਸ ਪ੍ਰਧਾਨ ਸੁਖਵਿੰਦਰ ਸਿੰਘ ਸੁੱਖਾ ਨੇ ਪ੍ਰਸ਼ਾਸਨ, ਵਿਧਾਇਕ ਅਨਮੋਲ ਗਗਨ ਮਾਨ ਅਤੇ ਉਨ੍ਹਾਂ ਦੀ ਟੀਮ ਦਾ ਧੰਨਵਾਦ ਕਰਦਿਆਂ ਕਿਹਾ ਕਿ ਇਹ ਸਾਂਝੀ ਕੋਸ਼ਿਸ਼ ਦਾ ਨਤੀਜਾ ਹੈ ਅਤੇ ਹੁਣ ਇਹ ਕੰਮ ਰੁਕੇਗਾ ਨਹੀਂ।

ਇਲਾਕਾ ਵਾਸੀਆਂ ਨੇ ਆਸ ਜਤਾਈ ਹੈ ਕਿ ਜਲਦ ਹੀ ਪੂਰੀ ਸੜਕ ਤਿਆਰ ਹੋ ਕੇ ਲੋਕਾਂ ਨੂੰ ਲੰਮੇ ਸਮੇਂ ਦੀ ਸਮੱਸਿਆ ਤੋਂ ਰਾਹਤ ਦੇਵੇਗੀ।