Food Safety Department Amritsar Dairy Samples Case: ਅੰਮ੍ਰਿਤਸਰ ਡੇਅਰੀਆਂ ਦੇ 12 ਸੈਂਪਲਾਂ ਵਿੱਚੋਂ 8 ਫੇਲ੍ਹ, ਮਿਲਾਵਟਖੋਰੀ ਖਿਲਾਫ ਕਾਰਵਾਈ ਤੇਜ਼

ਅੰਮ੍ਰਿਤਸਰ ਵਿੱਚ ਮਿਲਾਵਟਖੋਰੀ ਅਤੇ ਘਟੀਆ ਦਰਜੇ ਦੀਆਂ ਖਾਣ-ਪੀਣ ਵਾਲੀਆਂ ਵਸਤਾਂ ਖਿਲਾਫ ਚੱਲ ਰਹੀ ਮੁਹਿੰਮ ਤਹਿਤ ਫੂਡ ਸੇਫਟੀ ਵਿਭਾਗ ਵੱਲੋਂ ਵੱਡੀ ਕਾਰਵਾਈ ਸਾਹਮਣੇ ਆਈ ਹੈ।

ਡਾ. ਜੀ.ਐੱਸ. ਪੰਨੂ, ਸਹਾਇਕ ਕਮਿਸ਼ਨਰ ਫੂਡ ਦੀ ਅਗਵਾਈ ਹੇਠ ਬਣਾਈ ਗਈ ਟੀਮ ਨੇ 21 ਮਈ ਨੂੰ ਸ਼ਹਿਰ ਦੀਆਂ ਵੱਖ-ਵੱਖ ਡੇਅਰੀਆਂ ਤੋਂ ਦੁੱਧ ਅਤੇ ਦੁੱਧ ਉਤਪਾਦਾਂ ਦੇ 12 ਸੈਂਪਲ ਇਕੱਠੇ ਕਰਕੇ ਖਰੜ ਦੀ ਫੂਡ ਲੈਬੋਰਟਰੀ ਵਿੱਚ ਜਾਂਚ ਲਈ ਭੇਜੇ ਸਨ।

ਲੈਬ ਰਿਪੋਰਟ ਮੁਤਾਬਕ ਇਨ੍ਹਾਂ ਵਿੱਚੋਂ 8 ਸੈਂਪਲ ਫੇਲ੍ਹ ਪਾਏ ਗਏ ਹਨ, ਜਿਨ੍ਹਾਂ ਵਿੱਚ 2 ਸੈਂਪਲ ਨਾ-ਖਾਣ ਯੋਗ ਅਤੇ 6 ਸੈਂਪਲ ਗੈਰ-ਮਿਆਰੀ ਪਾਏ ਗਏ ਹਨ। ਕੁਝ ਸੈਂਪਲਾਂ ਵਿੱਚ ਵਾਧੂ ਫੈਟ ਮਿਲਾਉਣ ਦੇ ਵੀ ਸੰਕੇਤ ਮਿਲੇ ਹਨ, ਜਦਕਿ 4 ਸੈਂਪਲ ਮਿਆਰ ਅਨੁਸਾਰ ਸਹੀ ਪਾਏ ਗਏ ਹਨ।

ਰਿਪੋਰਟ ਅਨੁਸਾਰ ਗਿੱਲ ਡੇਅਰੀ (ਅੱਡਾ ਗੌਂਸਾਬਾਦ, ਰਾਮ ਤੀਰਥ ਰੋਡ) ਤੋਂ ਲਏ ਪਨੀਰ ਦੇ ਦੋ ਸੈਂਪਲਾਂ ਵਿੱਚੋਂ ਇੱਕ ਨਾ-ਖਾਣ ਯੋਗ ਅਤੇ ਇੱਕ ਗੈਰ-ਮਿਆਰੀ ਪਾਇਆ ਗਿਆ। ਗੁਰੂ ਨਾਨਕ ਡੇਅਰੀ, ਪੁਤਲੀਘਰ ਤੋਂ ਲਿਆ ਗਿਆ ਦੁੱਧ ਦਾ ਸੈਂਪਲ ਵੀ ਗੈਰ-ਮਿਆਰੀ ਨਿਕਲਿਆ।

ਇਸ ਤੋਂ ਇਲਾਵਾ ਗੁਰੂ ਡੇਅਰੀ ਤੋਂ ਪਨੀਰ ਅਤੇ ਦੁੱਧ ਦੇ ਸੈਂਪਲ, ਸ਼ਰਮਾ ਡੇਅਰੀ ਤੋਂ ਦਹੀਂ ਦਾ ਸੈਂਪਲ ਅਤੇ ਛਾਬੜਾ ਡੇਅਰੀ ਤੋਂ ਪਨੀਰ ਦਾ ਸੈਂਪਲ ਵੀ ਗੈਰ-ਮਿਆਰੀ ਪਾਇਆ ਗਿਆ ਹੈ। ਢਿੱਲੋਂ ਡੇਅਰੀ, ਇੰਡੀਆ ਗੇਟ ਤੋਂ ਲਿਆ ਗਿਆ ਪਨੀਰ ਦਾ ਸੈਂਪਲ ਨਾ-ਖਾਣ ਯੋਗ ਰਿਪੋਰਟ ਹੋਇਆ ਹੈ।

ਫੂਡ ਸੇਫਟੀ ਵਿਭਾਗ ਨੇ ਸਪਸ਼ਟ ਕੀਤਾ ਹੈ ਕਿ ਫੂਡ ਸੇਫਟੀ ਐਂਡ ਸਟੈਂਡਰਡ ਐਕਟ-2006 ਤਹਿਤ ਸੰਬੰਧਤ ਡੇਅਰੀਆਂ ਖਿਲਾਫ ਕਾਨੂੰਨੀ ਕਾਰਵਾਈ ਕੀਤੀ ਜਾ ਰਹੀ ਹੈ।

ਡਾ. ਜੀ.ਐੱਸ. ਪੰਨੂ ਨੇ ਲੋਕਾਂ ਨੂੰ ਅਪੀਲ ਕੀਤੀ ਹੈ ਕਿ ਉਹ ਖਾਣ-ਪੀਣ ਦੀਆਂ ਵਸਤਾਂ ਖਰੀਦਦੇ ਸਮੇਂ ਸਫਾਈ ਅਤੇ ਭਰੋਸੇਯੋਗ ਸਰੋਤਾਂ ਦਾ ਧਿਆਨ ਰੱਖਣ। ਉਨ੍ਹਾਂ ਕਿਹਾ ਕਿ ਲੋਕਾਂ ਦੀ ਸਿਹਤ ਨਾਲ ਕੋਈ ਵੀ ਸਮਝੌਤਾ ਨਹੀਂ ਕੀਤਾ ਜਾਵੇਗਾ ਅਤੇ ਇਹ ਜਾਂਚ ਮੁਹਿੰਮ ਭਵਿੱਖ ਵਿੱਚ ਵੀ ਜਾਰੀ ਰਹੇਗੀ।