ਨਵੇਂ ਸਾਲ ਦੀ ਸ਼ੁਰੂਆਤ ਨਾਲ ਮਹਿੰਗਾਈ ਦਾ ਝਟਕਾ: ਵਪਾਰਕ LPG ਸਿਲੰਡਰ 111 ਰੁਪਏ ਮਹਿੰਗੇ, ਹੋਟਲ–ਕਾਰੋਬਾਰ ਪ੍ਰਭਾਵਿਤ

ਚੰਡੀਗੜ੍ਹ — ਨਵੇਂ ਸਾਲ 2026 ਦੀ ਸ਼ੁਰੂਆਤ ਦੇ ਨਾਲ ਹੀ ਮਹਿੰਗਾਈ ਨੇ ਆਮ ਲੋਕਾਂ ਅਤੇ ਵਪਾਰੀਆਂ ਨੂੰ ਵੱਡਾ ਝਟਕਾ ਦਿੱਤਾ ਹੈ। ਕੇਂਦਰ ਸਰਕਾਰ ਵੱਲੋਂ ਵਪਾਰਕ LPG ਸਿਲੰਡਰਾਂ ਦੀਆਂ ਕੀਮਤਾਂ ਵਿੱਚ 111 ਰੁਪਏ ਦਾ ਵਾਧਾ ਕਰ ਦਿੱਤਾ ਗਿਆ ਹੈ, ਜੋ ਅੱਜ ਤੋਂ ਲਾਗੂ ਹੋ ਗਿਆ ਹੈ। ਇਹ ਵਾਧਾ 19 ਕਿਲੋਗ੍ਰਾਮ ਵਾਲੇ ਵਪਾਰਕ LPG ਸਿਲੰਡਰ ‘ਤੇ ਕੀਤਾ ਗਿਆ ਹੈ।

ਇਸ ਕੀਮਤ ਵਾਧੇ ਨਾਲ ਹੋਟਲਾਂ, ਢਾਬਿਆਂ, ਰੈਸਟੋਰੈਂਟਾਂ ਅਤੇ ਛੋਟੇ ਕਾਰੋਬਾਰੀਆਂ ਦੀਆਂ ਲਾਗਤਾਂ ਵਿੱਚ ਵਾਧਾ ਹੋਵੇਗਾ, ਜਿਸ ਦਾ ਅਸਰ ਆਖਿਰਕਾਰ ਗਾਹਕਾਂ ‘ਤੇ ਵੀ ਪੈ ਸਕਦਾ ਹੈ।

ਨਵੀਆਂ ਦਰਾਂ ਮੁਤਾਬਕ, ਦਿੱਲੀ ਵਿੱਚ 19 ਕਿਲੋਗ੍ਰਾਮ ਵਾਲਾ ਵਪਾਰਕ LPG ਸਿਲੰਡਰ ਹੁਣ ₹1580.50 ਤੋਂ ਵੱਧ ਕੇ ₹1691.50 ਹੋ ਗਿਆ ਹੈ। ਕੋਲਕਾਤਾ ਵਿੱਚ ਇਹ ਕੀਮਤ ₹1684 ਤੋਂ ਵੱਧ ਕੇ ₹1795 ਹੋ ਗਈ ਹੈ, ਜਦਕਿ ਮੁੰਬਈ ਵਿੱਚ ਸਿਲੰਡਰ ਦੀ ਕੀਮਤ ₹1531 ਤੋਂ ਵੱਧ ਕੇ ₹1642.50 ਹੋ ਗਈ ਹੈ।

ਹਾਲਾਂਕਿ, 14 ਕਿਲੋਗ੍ਰਾਮ ਵਾਲੇ ਘਰੇਲੂ LPG ਸਿਲੰਡਰ ਦੀ ਕੀਮਤ ਵਿੱਚ ਸਰਕਾਰ ਵੱਲੋਂ ਕੋਈ ਬਦਲਾਅ ਨਹੀਂ ਕੀਤਾ ਗਿਆ। ਦੇਸ਼ ਦੇ ਜ਼ਿਆਦਾਤਰ ਸ਼ਹਿਰਾਂ ਵਿੱਚ ਘਰੇਲੂ ਗੈਸ ਦੀ ਕੀਮਤ ₹850 ਤੋਂ ₹960 ਦੇ ਦਰਮਿਆਨ ਬਣੀ ਹੋਈ ਹੈ। ਇਸ ਸਮੇਂ ਦਿੱਲੀ ਵਿੱਚ ਘਰੇਲੂ LPG ਸਿਲੰਡਰ ₹853, ਮੁੰਬਈ ਵਿੱਚ ₹852.50, ਲਖਨਊ ਵਿੱਚ ₹890.50, ਅਹਿਮਦਾਬਾਦ ਵਿੱਚ ₹860, ਹੈਦਰਾਬਾਦ ਵਿੱਚ ₹905, ਵਾਰਾਣਸੀ ਵਿੱਚ ₹916.50 ਅਤੇ ਪਟਨਾ ਵਿੱਚ ₹951 ‘ਚ ਉਪਲਬਧ ਹੈ।

ਇੰਡੀਅਨ ਆਇਲ ਦੀ ਵੈੱਬਸਾਈਟ ਅਨੁਸਾਰ, 19 ਕਿਲੋਗ੍ਰਾਮ ਵਾਲਾ ਵਪਾਰਕ ਸਿਲੰਡਰ ਪਟਨਾ ਵਿੱਚ ₹1953.50, ਨੋਇਡਾ ਵਿੱਚ ₹1691, ਲਖਨਊ ਵਿੱਚ ₹1814, ਭੋਪਾਲ ਵਿੱਚ ₹1696 ਅਤੇ ਗੁਰੂਗ੍ਰਾਮ ਵਿੱਚ ₹1708.50 ਵਿੱਚ ਮਿਲੇਗਾ।

ਦੂਜੇ ਪਾਸੇ, ਨਵੇਂ ਸਾਲ ‘ਤੇ ਘਰੇਲੂ ਗੈਸ ਖਪਤਕਾਰਾਂ ਲਈ ਕੁਝ ਰਾਹਤ ਵੀ ਮਿਲੀ ਹੈ। ਇੰਦਰਪ੍ਰਸਥ ਗੈਸ ਲਿਮਟਿਡ (IGL) ਵੱਲੋਂ ਦਿੱਲੀ-ਐਨਸੀਆਰ ਵਿੱਚ ਘਰੇਲੂ PNG ਗੈਸ ਦੀਆਂ ਕੀਮਤਾਂ ਵਿੱਚ ਕਟੌਤੀ ਕੀਤੀ ਗਈ ਹੈ। ਨਵੀਆਂ ਦਰਾਂ ਮੁਤਾਬਕ, ਦਿੱਲੀ ਵਿੱਚ PNG ਦੀ ਕੀਮਤ ₹47.89 ਪ੍ਰਤੀ ਐਸਸੀਐਮ, ਗੁਰੂਗ੍ਰਾਮ ਵਿੱਚ ₹46.70 ਅਤੇ ਨੋਇਡਾ, ਗ੍ਰੇਟਰ ਨੋਇਡਾ ਤੇ ਗਾਜ਼ੀਆਬਾਦ ਵਿੱਚ ₹47.76 ਪ੍ਰਤੀ ਐਸਸੀਐਮ ਹੋਵੇਗੀ।