Haryana Rajya Sabha Results 2026: ਹਰਿਆਣਾ ਰਾਜ ਸਭਾ ਚੋਣ ‘ਚ ਭਾਜਪਾ ਤੇ ਕਾਂਗਰਸ ਨੂੰ ਇੱਕ-ਇੱਕ ਸੀਟ

ਹਰਿਆਣਾ ਵਿੱਚ ਰਾਜ ਸਭਾ ਦੀਆਂ ਦੋ ਸੀਟਾਂ ਲਈ ਹੋਈ ਚੋਣ ਦੇ ਨਤੀਜੇ ਦੇਰ ਰਾਤ ਡੇਢ ਵਜੇ ਐਲਾਨੇ ਗਏ। ਇਸ ਚੋਣ ਵਿੱਚ ਸੱਤਾਧਾਰੀ ਭਾਜਪਾ ਅਤੇ ਵਿਰੋਧੀ ਕਾਂਗਰਸ ਨੇ ਇੱਕ-ਇੱਕ ਸੀਟ ‘ਤੇ ਜਿੱਤ ਦਰਜ ਕੀਤੀ। ਭਾਜਪਾ ਦੇ ਉਮੀਦਵਾਰ ਸੰਜੇ ਭਾਟੀਆ ਅਤੇ ਕਾਂਗਰਸ ਦੇ ਉਮੀਦਵਾਰ ਕਰਮਵੀਰ ਬੋਧ ਜੇਤੂ ਰਹੇ।

ਚੋਣ ਦੌਰਾਨ ਤਗੜੀ ਰਾਜਨੀਤਿਕ ਟੱਕਰ ਦੇਖਣ ਨੂੰ ਮਿਲੀ। ਕੁੱਲ 90 ਵੋਟਾਂ ਵਿੱਚੋਂ 88 ਵੋਟਾਂ ਪਈਆਂ, ਜਦਕਿ ਦੋ ਵਿਧਾਇਕਾਂ ਨੇ ਵੋਟਿੰਗ ਵਿੱਚ ਹਿੱਸਾ ਨਹੀਂ ਲਿਆ। ਵੋਟਾਂ ਦੀ ਗਿਣਤੀ ਦੌਰਾਨ 5 ਵੋਟਾਂ ਰੱਦ ਹੋ ਗਈਆਂ ਅਤੇ 83 ਵੋਟਾਂ ਨੂੰ ਸਹੀ ਮੰਨਿਆ ਗਿਆ। ਕਾਂਗਰਸ ਦੇ ਉਮੀਦਵਾਰ ਨੂੰ 28 ਵੋਟਾਂ ਮਿਲੀਆਂ।

ਵੋਟਿੰਗ ਸਵੇਰੇ ਸ਼ੁਰੂ ਹੋ ਕੇ ਸ਼ਾਮ ਤੱਕ ਚੱਲੀ, ਪਰ ਗਿਣਤੀ ਵਿੱਚ ਕਾਫ਼ੀ ਦੇਰੀ ਹੋਈ। ਦੋਵਾਂ ਪਾਰਟੀਆਂ ਵੱਲੋਂ ਇੱਕ ਦੂਜੇ ‘ਤੇ ਵੋਟ ਦੀ ਗੁਪਤਤਾ ਭੰਗ ਕਰਨ ਦੇ ਦੋਸ਼ ਲਗਾਏ ਗਏ, ਜਿਸ ਕਾਰਨ ਗਿਣਤੀ ਕਈ ਘੰਟੇ ਦੇਰ ਨਾਲ ਸ਼ੁਰੂ ਹੋਈ। ਆਖ਼ਿਰਕਾਰ ਰਾਤ 11 ਵਜੇ ਗਿਣਤੀ ਸ਼ੁਰੂ ਹੋਈ ਅਤੇ ਡੇਢ ਵਜੇ ਨਤੀਜੇ ਸਾਹਮਣੇ ਆਏ।

ਇਸ ਚੋਣ ਵਿੱਚ ਇੱਕ ਆਜ਼ਾਦ ਉਮੀਦਵਾਰ ਵੀ ਮੈਦਾਨ ਵਿੱਚ ਸੀ, ਜਿਸਨੂੰ ਕੁਝ ਵਿਧਾਇਕਾਂ ਦੀ ਸਮਰਥਨ ਮਿਲਣ ਦੀ ਚਰਚਾ ਰਹੀ। ਨਤੀਜਿਆਂ ਤੋਂ ਬਾਅਦ ਰਾਜਨੀਤਿਕ ਮਾਹੌਲ ਵਿੱਚ ਚਰਚਾ ਹੋਰ ਤੇਜ਼ ਹੋ ਗਈ ਹੈ।

ਇਸ ਨਤੀਜੇ ਨੂੰ ਰਾਜਨੀਤਿਕ ਤੌਰ ‘ਤੇ ਮਹੱਤਵਪੂਰਨ ਮੰਨਿਆ ਜਾ ਰਿਹਾ ਹੈ, ਕਿਉਂਕਿ ਦੋਵਾਂ ਵੱਡੀਆਂ ਪਾਰਟੀਆਂ ਨੇ ਆਪਣੀ-ਆਪਣੀ ਸਥਿਤੀ ਬਰਕਰਾਰ ਰੱਖੀ ਹੈ ਅਤੇ ਸਿਆਸੀ ਤਾਕਤ ਦਾ ਸੰਤੁਲਨ ਬਣਿਆ ਰਹਿਆ ਹੈ।