BCCI Smart Glass Ban: IPL ਵਿੱਚ ਸਮਾਰਟ ਐਨਕਾਂ ‘ਤੇ ਪਾਬੰਦੀ, PMOA ਜ਼ੋਨ ਵਿੱਚ ਦਾਖਲਾ ਮਨਾਹੀ

ਭਾਰਤੀ ਕ੍ਰਿਕਟ ਕੰਟਰੋਲ ਬੋਰਡ (BCCI) ਨੇ IPL ਸਮੇਤ ਸਾਰੇ ਟੂਰਨਾਮੈਂਟਾਂ ਲਈ ਇੱਕ ਵੱਡਾ ਸੁਰੱਖਿਆ ਫੈਸਲਾ ਲੈਂਦਿਆਂ ਸਮਾਰਟ ਐਨਕਾਂ (Smart Glasses) ਦੀ ਵਰਤੋਂ ‘ਤੇ ਪਾਬੰਦੀ ਲਗਾ ਦਿੱਤੀ ਹੈ। ਬੋਰਡ ਨੇ ਸਪੱਸ਼ਟ ਕੀਤਾ ਹੈ ਕਿ PMOA (Players and Match Officials Area) ਵਿੱਚ ਅਜਿਹੇ ਡਿਵਾਈਸਾਂ ਦੀ ਐਂਟਰੀ ਜਾਂ ਵਰਤੋਂ ਬਿਲਕੁਲ ਮਨਾਹੀ ਰਹੇਗੀ।

BCCI ਦੀ ਐਂਟੀ-ਕਰਪਸ਼ਨ ਸਿਕਿਊਰਟੀ ਯੂਨਿਟ (ACSU) ਨੇ ਸਾਰੀਆਂ ਫ੍ਰੈਂਚਾਈਜ਼ੀ ਟੀਮਾਂ ਨੂੰ ਐਡਵਾਈਜ਼ਰੀ ਜਾਰੀ ਕੀਤੀ ਹੈ। ਇਸ ਵਿੱਚ ਕਿਹਾ ਗਿਆ ਹੈ ਕਿ ਕੁਝ ਕੰਪਨੀਆਂ ਖਿਡਾਰੀਆਂ ਅਤੇ ਸਹਾਇਕ ਸਟਾਫ ਨੂੰ ਐਡਵਾਂਸਡ ਸਮਾਰਟ ਗਲਾਸ ਵੇਚ ਰਹੀਆਂ ਹਨ, ਜਿਨ੍ਹਾਂ ਵਿੱਚ ਲਾਈਵ ਸਟ੍ਰੀਮਿੰਗ, ਮੈਸੇਜਿੰਗ, ਆਡੀਓ ਅਤੇ ਵੀਡੀਓ ਕਾਲਿੰਗ ਵਰਗੀਆਂ ਸੁਵਿਧਾਵਾਂ ਹੁੰਦੀਆਂ ਹਨ।

ਬੋਰਡ ਨੇ ਚੇਤਾਵਨੀ ਦਿੱਤੀ ਹੈ ਕਿ ਇਹ ਤਕਨੀਕ ਸੁਰੱਖਿਆ ਅਤੇ ਭ੍ਰਿਸ਼ਟਾਚਾਰ ਵਿਰੋਧੀ ਪ੍ਰੋਟੋਕੋਲ ਲਈ ਖਤਰਾ ਬਣ ਸਕਦੀ ਹੈ। ਇਸ ਕਰਕੇ ਇਨ੍ਹਾਂ ਨੂੰ “ਆਡੀਓ/ਵੀਡੀਓ ਰਿਕਾਰਡਿੰਗ ਡਿਵਾਈਸ” ਅਤੇ “ਕਮਿਊਨੀਕੇਸ਼ਨ ਡਿਵਾਈਸ” ਦੋਵਾਂ ਸ਼੍ਰੇਣੀਆਂ ਵਿੱਚ ਰੱਖਿਆ ਗਿਆ ਹੈ।

ਨਿਯਮਾਂ ਅਨੁਸਾਰ ਖਿਡਾਰੀਆਂ ਅਤੇ ਅਧਿਕਾਰੀਆਂ ਨੂੰ ਪਹਿਲਾਂ ਹੀ PMOA ਜ਼ੋਨ ਵਿੱਚ ਮੋਬਾਈਲ ਫੋਨ ਜਾਂ ਹੋਰ ਸੰਚਾਰ ਉਪਕਰਣ ਲੈ ਜਾਣ ਦੀ ਮਨਾਹੀ ਹੈ। ਹੁਣ ਨਵੇਂ ਨਿਰਦੇਸ਼ਾਂ ਅਨੁਸਾਰ ਸਮਾਰਟ ਐਨਕਾਂ ਨੂੰ ਵੀ ਪੂਰੀ ਤਰ੍ਹਾਂ ਬੈਨ ਕਰ ਦਿੱਤਾ ਗਿਆ ਹੈ।

ਹਾਲ ਹੀ ਵਿੱਚ ਰਾਜਸਥਾਨ ਰਾਇਲਜ਼ ਦੇ ਇੱਕ ਅਧਿਕਾਰੀ ਰੋਮੀ ਭਿੰਡਰ ਨੂੰ ਡਗਆਊਟ ਵਿੱਚ ਮੋਬਾਈਲ ਫੋਨ ਵਰਤਣ ‘ਤੇ ₹1 ਲੱਖ ਦਾ ਜੁਰਮਾਨਾ ਅਤੇ ਚੇਤਾਵਨੀ ਵੀ ਦਿੱਤੀ ਗਈ ਸੀ, ਜਿਸ ਤੋਂ ਬਾਅਦ ਬੋਰਡ ਹੋਰ ਸਖ਼ਤ ਹੋ ਗਿਆ ਹੈ।

BCCI ਨੇ ਸਪੱਸ਼ਟ ਕੀਤਾ ਹੈ ਕਿ ਖਿਡਾਰੀਆਂ ਅਤੇ ਅਧਿਕਾਰੀਆਂ ਨੂੰ PMOA ਖੇਤਰ ਵਿੱਚ ਦਾਖਲ ਹੋਣ ਤੋਂ ਪਹਿਲਾਂ ਆਪਣੇ ਸਮਾਰਟ ਡਿਵਾਈਸ ਜਮ੍ਹਾਂ ਕਰਵਾਉਣੇ ਲਾਜ਼ਮੀ ਹਨ। ਨਿਯਮਾਂ ਦੀ ਉਲੰਘਣਾ ਕਰਨ ‘ਤੇ ਅਨੁਸ਼ਾਸਨੀ ਕਾਰਵਾਈ ਕੀਤੀ ਜਾਵੇਗੀ।