IPL 2026 CSK vs DC: Chennai Super Kings ਨੇ ਦਿੱਲੀ ਕੈਪੀਟਲਜ਼ ਨੂੰ 8 ਵਿਕਟਾਂ ਨਾਲ ਹਰਾਇਆ

ਨਵੀਂ ਦਿੱਲੀ ਵਿੱਚ ਖੇਡੇ ਗਏ IPL 2026 ਦੇ ਇੱਕ ਰੋਮਾਂਚਕ ਮੁਕਾਬਲੇ ਵਿੱਚ ਚੇਨਈ ਸੁਪਰ ਕਿੰਗਜ਼ (CSK) ਨੇ ਦਿੱਲੀ ਕੈਪੀਟਲਜ਼ (DC) ਨੂੰ 8 ਵਿਕਟਾਂ ਨਾਲ ਕਰਾਰੀ ਹਾਰ ਦਿੱਤੀ। ਇਸ ਜਿੱਤ ਵਿੱਚ ਸੰਜੂ ਸੈਮਸਨ ਦੀ ਨਾਬਾਦ 87 ਦੌੜਾਂ ਦੀ ਸ਼ਾਨਦਾਰ ਪਾਰੀ ਮੁੱਖ ਰਹੀ, ਜਿਸ ਨੇ ਟੀਮ ਨੂੰ ਆਸਾਨ ਟਾਰਗੇਟ ਤੱਕ ਪਹੁੰਚਾਇਆ।

ਦਿੱਲੀ ਕੈਪੀਟਲਜ਼ ਨੇ ਪਹਿਲਾਂ ਬੱਲੇਬਾਜ਼ੀ ਕਰਦੇ ਹੋਏ 20 ਓਵਰਾਂ ਵਿੱਚ 7 ਵਿਕਟਾਂ ਦੇ ਨੁਕਸਾਨ ‘ਤੇ ਸਿਰਫ 155 ਦੌੜਾਂ ਬਣਾਈਆਂ। ਟੀਮ ਦੀ ਸ਼ੁਰੂਆਤ ਕਮਜ਼ੋਰ ਰਹੀ ਜਿੱਥੇ ਪਥੁਮ ਨਿਸੰਕਾ 19 ਅਤੇ ਕੇਐਲ ਰਾਹੁਲ ਸਿਰਫ 12 ਦੌੜਾਂ ਬਣਾ ਕੇ ਆਊਟ ਹੋ ਗਏ। ਮਿਡਲ ਆਰਡਰ ਵੀ ਕੁਝ ਖਾਸ ਨਹੀਂ ਕਰ ਸਕਿਆ ਅਤੇ ਅਕਸ਼ਰ ਪਟੇਲ ਵੀ ਫਲਾਪ ਰਹੇ।

ਹਾਲਾਂਕਿ ਅਖੀਰ ਵਿੱਚ ਟ੍ਰਿਸਟਨ ਸਟੱਬਸ (38) ਅਤੇ ਸਮੀਰ ਰਿਜ਼ਵੀ (40) ਨੇ ਕੁਝ ਤੇਜ਼ ਦੌੜਾਂ ਜੋੜ ਕੇ ਸਕੋਰ ਨੂੰ 155 ਤੱਕ ਪਹੁੰਚਾਇਆ, ਪਰ ਇਹ ਸਕੋਰ ਚੇਨਈ ਦੇ ਮਜ਼ਬੂਤ ਬੱਲੇਬਾਜ਼ੀ ਆਗੇ ਕਾਫੀ ਨਹੀਂ ਸੀ।

ਚੇਨਈ ਸੁਪਰ ਕਿੰਗਜ਼ ਦੀ ਸ਼ੁਰੂਆਤ ਵੀ ਸਥਿਰ ਰਹੀ ਪਰ ਸੰਜੂ ਸੈਮਸਨ ਅਤੇ ਕਾਰਤਿਕ ਸ਼ਰਮਾ ਨੇ ਤੂਫਾਨੀ ਸਾਂਝੇਦਾਰੀ ਕਰਕੇ ਮੈਚ ਦਾ ਰੁਖ ਬਦਲ ਦਿੱਤਾ। ਦੋਵਾਂ ਨੇ ਤੀਜੀ ਵਿਕਟ ਲਈ 114 ਦੌੜਾਂ ਦੀ ਅਟੁੱਟ ਸਾਂਝ ਬਣਾਈ। ਸੈਮਸਨ ਨੇ 52 ਗੇਂਦਾਂ ‘ਚ 87 ਦੌੜਾਂ ਦੀ ਧਮਾਕੇਦਾਰ ਪਾਰੀ ਖੇਡੀ ਜਿਸ ਵਿੱਚ 6 ਛੱਕੇ ਸ਼ਾਮਲ ਸਨ।

ਕਾਰਤਿਕ ਸ਼ਰਮਾ ਨੇ ਵੀ 41 ਦੌੜਾਂ ਦੀ ਨਾਬਾਦ ਪਾਰੀ ਖੇਡ ਕੇ ਟੀਮ ਨੂੰ ਮਜ਼ਬੂਤੀ ਦਿੱਤੀ। ਚੇਨਈ ਨੇ ਇਹ ਟਾਰਗੇਟ ਸਿਰਫ 17.3 ਓਵਰਾਂ ਵਿੱਚ ਹਾਸਲ ਕਰਕੇ ਆਸਾਨ ਜਿੱਤ ਦਰਜ ਕੀਤੀ ਅਤੇ ਸੀਜ਼ਨ ਦੀ ਆਪਣੀ ਪੰਜਵੀਂ ਜਿੱਤ ਆਪਣੇ ਨਾਮ ਕੀਤੀ।

ਦੂਜੇ ਪਾਸੇ, ਦਿੱਲੀ ਕੈਪੀਟਲਜ਼ ਲਈ ਇਹ ਹਾਰ ਬਹੁਤ ਵੱਡਾ ਝਟਕਾ ਹੈ ਕਿਉਂਕਿ 10 ਮੈਚਾਂ ਵਿੱਚ ਇਹ ਉਨ੍ਹਾਂ ਦੀ ਛੇਵੀਂ ਹਾਰ ਹੈ, ਜਿਸ ਨਾਲ ਪਲੇਆਫ ਦੀ ਦੌੜ ਹੋਰ ਮੁਸ਼ਕਲ ਹੋ ਗਈ ਹੈ।