Cyber Fraud Bust : ਲੁਧਿਆਣਾ ’ਚ ਵੱਡੇ ਸਾਈਬਰ ਠੱਗੀ ਰੈਕਟ ਦਾ ਪਰਦਾਫਾਸ਼, 132 ਮੁਲਜ਼ਮ ਗ੍ਰਿਫ਼ਤਾਰ, ਕਰੋੜਾਂ ਦੀ ਜਾਇਦਾਦ ਬਰਾਮਦ

ਪੰਜਾਬ ਪੁਲਿਸ ਨੂੰ ਸਾਈਬਰ ਅਪਰਾਧ ਖਿਲਾਫ ਇੱਕ ਵੱਡੀ ਕਾਮਯਾਬੀ ਹਾਸਲ ਹੋਈ ਹੈ। ਲੁਧਿਆਣਾ ਵਿੱਚ ਚਲ ਰਹੇ ਇੱਕ ਵੱਡੇ Cyber Fraud ਨੈਟਵਰਕ ਦਾ ਪਰਦਾਫਾਸ਼ ਕਰਦਿਆਂ ਪੁਲਿਸ ਨੇ 132 ਮੁਲਜ਼ਮਾਂ ਨੂੰ ਗ੍ਰਿਫ਼ਤਾਰ ਕੀਤਾ ਹੈ। ਇਹ ਗਿਰੋਹ ਵਿਦੇਸ਼ੀ ਨਾਗਰਿਕਾਂ ਨੂੰ ਜਾਅਲੀ ਟੈਕਨੀਕਲ ਸਪੋਰਟ, ਫਰਜ਼ੀ ਵਾਇਰਸ ਅਲਰਟ ਅਤੇ ਠੱਗੀ ਭਰੇ ਕਾਲ ਸੈਂਟਰ ਮਾਡਲ ਰਾਹੀਂ ਨਿਸ਼ਾਨਾ ਬਣਾਉਂਦਾ ਸੀ। ਇਸ ਕਾਰਵਾਈ ਦੌਰਾਨ ਪੁਲਿਸ ਨੇ 1 ਕਰੋੜ 7 ਲੱਖ ਰੁਪਏ ਨਕਦ, 98 ਲੈਪਟਾਪ, 239 ਮੋਬਾਈਲ ਫੋਨ, 19 ਵਾਹਨ ਅਤੇ 300 ਤੋਂ ਵੱਧ ਬੈਂਕ ਖਾਤੇ ਬਰਾਮਦ ਕਰਕੇ ਸੀਜ਼ ਕਰ ਦਿੱਤੇ ਹਨ।

ਐਪ ਅਤੇ ਫਰਜ਼ੀ ਟੈਕ ਸਪੋਰਟ ਦੇ ਨਾਮ ’ਤੇ ਹੁੰਦੀ ਸੀ ਠੱਗੀ

ਪੁਲਿਸ ਕਮਿਸ਼ਨਰ ਸਵਪਨ ਸ਼ਰਮਾ ਮੁਤਾਬਕ, ਇਹ ਗਿਰੋਹ ਆਪਣੇ ਆਪ ਨੂੰ ਮਲਟੀਨੈਸ਼ਨਲ ਕੰਪਨੀਆਂ ਦੇ ਟੈਕਨੀਕਲ ਸਪੋਰਟ ਏਜੰਟ ਵਜੋਂ ਪੇਸ਼ ਕਰਦਾ ਸੀ। ਮੁਲਜ਼ਮ ਵਿਦੇਸ਼ੀ ਨਾਗਰਿਕਾਂ ਦੇ ਕੰਪਿਊਟਰਾਂ ’ਤੇ Microsoft ਜਾਂ ਹੋਰ ਵੱਡੀਆਂ ਕੰਪਨੀਆਂ ਦੇ ਨਾਮ ’ਤੇ ਜਾਅਲੀ ਸੁਰੱਖਿਆ ਅਲਰਟ ਅਤੇ ਵਾਇਰਸ ਪੌਪ-ਅੱਪ ਭੇਜਦੇ ਸਨ। ਸਕ੍ਰੀਨ ’ਤੇ ਦਿੱਤੇ ਜਾਅਲੀ ਕਸਟਮਰ ਕੇਅਰ ਨੰਬਰ ’ਤੇ ਜਿਵੇਂ ਹੀ ਪੀੜਤ ਕਾਲ ਕਰਦਾ, ਉਹ ਕਾਲ ਸਿੱਧੀ ਠੱਗਾਂ ਦੇ ਕਾਲ ਸੈਂਟਰ ਤੱਕ ਪਹੁੰਚ ਜਾਂਦੀ ਸੀ।

Remote Access Software ਰਾਹੀਂ ਖਾਤੇ ਖਾਲੀ

ਮੁਲਜ਼ਮ ਪੀੜਤਾਂ ਨੂੰ UltraViewer ਵਰਗੇ Remote Access Software ਡਾਊਨਲੋਡ ਕਰਵਾਉਂਦੇ ਸਨ। ਇਸ ਤੋਂ ਬਾਅਦ ਉਹ ਕੰਪਿਊਟਰ ਦੀ ਪੂਰੀ ਪਹੁੰਚ ਹਾਸਲ ਕਰਕੇ ਜਾਅਲੀ ਸਕੈਨ ਦਿਖਾਉਂਦੇ ਅਤੇ ਡਰਾਉਂਦੇ ਕਿ ਉਨ੍ਹਾਂ ਦੇ ਬੈਂਕ ਖਾਤੇ, ਈਮੇਲ ਜਾਂ ਡਿਵਾਈਸ ਹੈਕ ਹੋ ਗਏ ਹਨ। ਕਈ ਵਾਰ ਬਾਲ ਅਸ਼ਲੀਲਤਾ ਜਾਂ ਹੋਰ ਗੰਭੀਰ ਦੋਸ਼ਾਂ ਦਾ ਡਰ ਦਿਖਾ ਕੇ ਪੈਸੇ ਵਸੂਲੇ ਜਾਂਦੇ ਸਨ।

Amazon-Apple Gift Cards, Hawala ਤੇ Crypto ਰਾਹੀਂ ਪੈਸੇ ਟ੍ਰਾਂਸਫਰ

ਪੁਲਿਸ ਜਾਂਚ ’ਚ ਸਾਹਮਣੇ ਆਇਆ ਕਿ ਠੱਗ ਨਕਦੀ, Amazon ਅਤੇ Apple Gift Cards, ਹਵਾਲਾ ਨੈੱਟਵਰਕ, ਫਰਜ਼ੀ ਵਿਦੇਸ਼ੀ ਬੈਂਕ ਖਾਤਿਆਂ ਅਤੇ Cryptocurrency ਰਾਹੀਂ ਪੈਸਾ ਇਕੱਠਾ ਕਰਦੇ ਸਨ। ਇਹ ਪੈਸਾ ਬਾਅਦ ’ਚ ਭਾਰਤ ਵਿੱਚ ਗੈਰਕਾਨੂੰਨੀ ਚੈਨਲਾਂ ਰਾਹੀਂ ਲਿਆਂਦਾ ਜਾਂਦਾ ਸੀ।

ਕਈ ਰਾਜਾਂ ਨਾਲ ਜੁੜੇ ਮਾਸਟਰਮਾਈਂਡ

ਪੁਲਿਸ ਮੁਤਾਬਕ, ਇਸ ਗਿਰੋਹ ਦੇ ਮਾਸਟਰਮਾਈਂਡ ਦਿੱਲੀ ਅਤੇ ਗੁਜਰਾਤ ਨਾਲ ਸੰਬੰਧਤ ਹਨ, ਜਦਕਿ ਗ੍ਰਿਫ਼ਤਾਰ ਕੀਤੇ ਗਏ 132 ਮੁਲਜ਼ਮ ਦੇਸ਼ ਦੇ ਵੱਖ-ਵੱਖ ਰਾਜਾਂ ਤੋਂ ਹਨ। ਹਰ ਆਪਰੇਟਰ ਰੋਜ਼ਾਨਾ 8 ਤੋਂ 10 ਕਾਲਾਂ ਕਰਦਾ ਸੀ ਅਤੇ ਨਿਸ਼ਚਿਤ ਤਨਖਾਹ ਦੇ ਨਾਲ ਇਨਸੈਂਟਿਵ ਵੀ ਮਿਲਦਾ ਸੀ।

ਕਾਨੂੰਨੀ ਧਾਰਾਵਾਂ ਹੇਠ ਮਾਮਲਾ ਦਰਜ

ਲੁਧਿਆਣਾ ਸਾਈਬਰ ਕ੍ਰਾਈਮ ਪੁਲਿਸ ਸਟੇਸ਼ਨ ਵਿੱਚ FIR ਨੰਬਰ 37 ਤਹਿਤ BNS ਦੀਆਂ ਧਾਰਾਵਾਂ 318(4), 319(2), 336(3), 61(2) ਅਤੇ IT Act ਦੀਆਂ ਧਾਰਾਵਾਂ 66-C, 66-D ਅਤੇ 75 ਹੇਠ ਕੇਸ ਦਰਜ ਕੀਤਾ ਗਿਆ ਹੈ।

ਜਾਂਚ ਅਜੇ ਵੀ ਜਾਰੀ

ਪੰਜਾਬ ਪੁਲਿਸ ਹੁਣ ਡਿਜੀਟਲ ਸਬੂਤਾਂ, ਹਵਾਲਾ ਲਿੰਕਾਂ, ਕ੍ਰਿਪਟੋ ਲੈਣ-ਦੇਣ ਅਤੇ ਜਾਇਦਾਦ ਮਾਲਕਾਂ ਦੀ ਭੂਮਿਕਾ ਦੀ ਵੀ ਗਹਿਰਾਈ ਨਾਲ ਜਾਂਚ ਕਰ ਰਹੀ ਹੈ। ਪੁਲਿਸ ਕਮਿਸ਼ਨਰ ਨੇ ਸਪੱਸ਼ਟ ਕੀਤਾ ਕਿ ਸੰਗਠਿਤ Cyber Fraud ਨੈੱਟਵਰਕਾਂ ਖਿਲਾਫ ਕਾਰਵਾਈ ਹੋਰ ਤੇਜ਼ ਕੀਤੀ ਜਾਵੇਗੀ।

ਇਹ ਕਾਰਵਾਈ ਸਿਰਫ਼ ਪੰਜਾਬ ਹੀ ਨਹੀਂ, ਸਗੋਂ ਦੇਸ਼ ਭਰ ਵਿੱਚ ਵਧ ਰਹੇ ਅੰਤਰਰਾਸ਼ਟਰੀ ਸਾਈਬਰ ਅਪਰਾਧਾਂ ਖਿਲਾਫ ਇੱਕ ਵੱਡਾ ਸੰਦੇਸ਼ ਮੰਨੀ ਜਾ ਰਹੀ ਹੈ।