Kotak Mahindra Bank Scam : ਕੋਟਕ ਮਹਿੰਦਰਾ ਬੈਂਕ ਘੁਟਾਲੇ ‘ਚ ਵੱਡਾ ਖੁਲਾਸਾ, ਡਿਪਟੀ ਵੀਪੀ ਨੇ BMW ਸਮੇਤ ਲਗਜ਼ਰੀ ਗੱਡੀਆਂ ਖਰੀਦੀਆਂ – ED

ਕੋਟਕ ਮਹਿੰਦਰਾ ਬੈਂਕ ਨਾਲ ਜੁੜੇ ਕਰੀਬ 150 ਕਰੋੜ ਰੁਪਏ ਦੇ ਵੱਡੇ ਘੁਟਾਲੇ ਵਿੱਚ ਇਨਫੋਰਸਮੈਂਟ ਡਾਇਰੈਕਟੋਰੇਟ (ED) ਨੇ ਪੰਚਕੂਲਾ ਦੀ ਵਿਸ਼ੇਸ਼ ਅਦਾਲਤ ਵਿੱਚ ਚੌਕਾਣੇ ਵਾਲੇ ਖੁਲਾਸੇ ਕੀਤੇ ਹਨ। ਇਸ ਮਾਮਲੇ ਵਿੱਚ ਬੈਂਕ ਦੇ ਡਿਪਟੀ ਵਾਈਸ ਪ੍ਰੈਜ਼ੀਡੈਂਟ ਪੁਸ਼ਪਿੰਦਰ ਸਿੰਘ ਨੂੰ ਮੁੱਖ ਮੁਲਜ਼ਮ ਬਣਾਇਆ ਗਿਆ ਹੈ।

ED ਦੇ ਅਨੁਸਾਰ, ਪੁਸ਼ਪਿੰਦਰ ਸਿੰਘ ਨੇ ਪੰਚਕੂਲਾ ਨਗਰ ਨਿਗਮ (MC) ਦੇ ਬੈਂਕ ਖਾਤਿਆਂ ਵਿੱਚੋਂ ਫਰਜ਼ੀ ਤਰੀਕੇ ਨਾਲ ਕਰੋੜਾਂ ਰੁਪਏ ਹੜਪ ਕੀਤੇ ਅਤੇ ਇਸ ਪੈਸੇ ਨੂੰ ਆਪਣੇ ਨਿੱਜੀ ਫਾਇਦੇ ਲਈ ਵਰਤਿਆ। ਜਾਂਚ ਵਿੱਚ ਸਾਹਮਣੇ ਆਇਆ ਹੈ ਕਿ ਇਸ ਰਕਮ ਨਾਲ ਉਸ ਨੇ BMW 7 ਸੀਰੀਜ਼, ਮਹਿੰਦਰਾ ਥਾਰ, ਸਕਾਰਪੀਓ-ਐਨ ਅਤੇ ਹੋਰ ਲਗਜ਼ਰੀ ਵਾਹਨ ਖਰੀਦੇ।

ਇਸ ਤੋਂ ਇਲਾਵਾ ਕਈ ਜਾਇਦਾਦਾਂ ਵਿੱਚ ਵੀ ਵੱਡੇ ਪੱਧਰ ‘ਤੇ ਨਿਵੇਸ਼ ਕੀਤਾ ਗਿਆ। ਸਭ ਤੋਂ ਚੌਕਾਣੇ ਵਾਲੀ ਗੱਲ ਇਹ ਸਾਹਮਣੇ ਆਈ ਹੈ ਕਿ ਮਾਰਚ 2026 ਵਿੱਚ ਜਦੋਂ ਘੁਟਾਲੇ ਦੀ ਜਾਂਚ ਸ਼ੁਰੂ ਹੋਣ ਵਾਲੀ ਸੀ, ਉਸ ਤੋਂ ਪਹਿਲਾਂ ਹੀ ਇਹ ਸਾਰੀਆਂ ਲਗਜ਼ਰੀ ਗੱਡੀਆਂ ਅਤੇ ਜਾਇਦਾਦਾਂ ਵੇਚ ਦਿੱਤੀਆਂ ਗਈਆਂ ਸਨ।

ਹਰਿਆਣਾ ਦੇ ਸਟੇਟ ਵਿਜੀਲੈਂਸ ਐਂਡ ਐਂਟੀ ਕਰਪਸ਼ਨ ਬਿਊਰੋ (SV&ACB) ਨੇ 24 ਮਾਰਚ 2026 ਨੂੰ ਇਸ ਮਾਮਲੇ ਵਿੱਚ FIR ਦਰਜ ਕੀਤੀ ਸੀ, ਜਿਸ ਤੋਂ ਬਾਅਦ ED ਨੇ ਆਪਣੀ ਜਾਂਚ ਤੇਜ਼ ਕੀਤੀ।

ਜਾਂਚ ਦੌਰਾਨ ਇਹ ਵੀ ਸਾਹਮਣੇ ਆਇਆ ਕਿ ਪੰਚਕੂਲਾ ਨਗਰ ਨਿਗਮ ਦੇ ਦੋ ਬੈਂਕ ਖਾਤੇ ਫਰਜ਼ੀ ਦਸਤਾਵੇਜ਼ਾਂ ਦੇ ਆਧਾਰ ‘ਤੇ ਖੋਲ੍ਹੇ ਗਏ ਸਨ, ਜਿਨ੍ਹਾਂ ਰਾਹੀਂ ਪੈਸਾ ਵੱਖ-ਵੱਖ ਸਾਥੀਆਂ ਦੇ ਖਾਤਿਆਂ ਵਿੱਚ ਟਰਾਂਸਫਰ ਕੀਤਾ ਗਿਆ।

ਰਿਪੋਰਟ ਮੁਤਾਬਕ:

• ਰਜਤ ਡਾਹਰਾ ਨੂੰ 88.17 ਕਰੋੜ ਰੁਪਏ
• ਸਵਾਤੀ ਤੋਮਰ ਨੂੰ 31.58 ਕਰੋੜ ਰੁਪਏ
• ਕਪਿਲ ਕੁਮਾਰ ਨੂੰ 2.36 ਕਰੋੜ ਰੁਪਏ
• ਵਿਨੋਦ ਕੁਮਾਰ ਨੂੰ 1.41 ਕਰੋੜ ਰੁਪਏ ਟਰਾਂਸਫਰ ਕੀਤੇ ਗਏ

ਸਹਿ-ਮੁਲਜ਼ਮਾਂ ਨੇ ਦੱਸਿਆ ਕਿ ਉਨ੍ਹਾਂ ਨੂੰ ਨੌਕਰੀ ਅਤੇ ਕਮਾਈ ਦਾ ਝਾਂਸਾ ਦੇ ਕੇ ਖਾਤੇ ਖੁਲ੍ਹਵਾਏ ਗਏ ਅਤੇ ਫਿਰ ਉਨ੍ਹਾਂ ਦੇ ਖਾਤਿਆਂ ਦੀ ਵਰਤੋਂ ਪੈਸਾ ਘੁਮਾਉਣ ਲਈ ਕੀਤੀ ਗਈ।

ED ਦੇ ਅਨੁਸਾਰ, ਇਹ ਸਾਰਾ ਨੈੱਟਵਰਕ ਪੁਸ਼ਪਿੰਦਰ ਸਿੰਘ ਅਤੇ ਉਸ ਦੀ ਪਤਨੀ ਪ੍ਰੀਤੀ ਠਾਕੁਰ ਦੇ ਇਸ਼ਾਰਿਆਂ ‘ਤੇ ਚੱਲ ਰਿਹਾ ਸੀ। ਰਜਤ ਡਾਹਰਾ ਨੇ ਇਹ ਵੀ ਦੱਸਿਆ ਕਿ ਲਗਜ਼ਰੀ ਕਾਰਾਂ ਵੀ ਉਨ੍ਹਾਂ ਦੇ ਨਾਮ ‘ਤੇ ਖਰੀਦੀਆਂ ਗਈਆਂ ਪਰ ਵਰਤੋਂ ਮੁਲਜ਼ਮ ਕਰਦੇ ਸਨ।

ਜਾਂਚ ਵਿੱਚ ਇਹ ਵੀ ਸਾਹਮਣੇ ਆਇਆ ਕਿ ਬੈਂਕ ਮੈਨੇਜਰ ਦੇ ਅਹੁਦੇ ਦਾ ਦੁਰਪਯੋਗ ਕਰਕੇ ਫਰਜ਼ੀ ਲੋਨ ਅਤੇ ਅਕਾਊਂਟ ਐਂਟਰੀਆਂ ਰਾਹੀਂ ਪੈਸਾ ਘੁਮਾਇਆ ਗਿਆ।

ਮਾਮਲੇ ਦੀ ਸੁਣਵਾਈ ਦੌਰਾਨ ਅਦਾਲਤ ਨੇ ਪੁਸ਼ਪਿੰਦਰ ਸਿੰਘ ਨੂੰ 9 ਜੂਨ ਤੱਕ ED ਦੀ ਹਿਰਾਸਤ ਵਿੱਚ ਭੇਜ ਦਿੱਤਾ ਹੈ ਤਾਂ ਜੋ ਪੂਰੇ ਘੁਟਾਲੇ ਦੀ ਸੱਚਾਈ ਸਾਹਮਣੇ ਆ ਸਕੇ।