ਛੋਟੀ ਪੁਲੀ ਚੰਦਰ ਨਗਰ ’ਤੇ ਰੋਜ਼ਾਨਾ ਜਾਮ: ਆਮ ਲੋਕ ਪਰੇਸ਼ਾਨ, ਪ੍ਰਸ਼ਾਸਨ ਖਾਮੋਸ਼

ਛੋਟੀ ਪੁਲੀ ਚੰਦਰ ਨਗਰ ਇਲਾਕੇ ਵਿੱਚ ਟਰੈਫਿਕ ਜਾਮ ਹੁਣ ਰੋਜ਼ਾਨਾ ਦੀ ਸਮੱਸਿਆ ਬਣ ਚੁੱਕੀ ਹੈ। ਹਰ ਦਿਨ ਸਵੇਰ ਤੋਂ ਸ਼ਾਮ ਤੱਕ ਇੱਥੇ ਵਾਹਨਾਂ ਦੀ ਲੰਬੀ ਲਾਈਨ ਲੱਗੀ ਰਹਿੰਦੀ ਹੈ, ਜਿਸ ਕਾਰਨ ਆਮ ਨਾਗਰਿਕਾਂ ਨੂੰ ਕਾਫੀ ਮੁਸ਼ਕਲਾਂ ਦਾ ਸਾਹਮਣਾ ਕਰਨਾ ਪੈਂਦਾ ਹੈ। ਅੱਜ ਵੀ ਇਸ ਥਾਂ ਕਰੀਬ ਦੋ ਘੰਟੇ ਤੱਕ ਭਾਰੀ ਜਾਮ ਲੱਗਿਆ ਰਿਹਾ, ਜਿਸ ਨਾਲ ਦਫ਼ਤਰ ਜਾਣ ਵਾਲੇ ਕਰਮਚਾਰੀ, ਵਿਦਿਆਰਥੀ ਅਤੇ ਮਰੀਜ਼ ਸਭ ਪਰੇਸ਼ਾਨ ਰਹੇ।

ਸਥਾਨਕ ਲੋਕਾਂ ਦਾ ਕਹਿਣਾ ਹੈ ਕਿ ਇਲਾਕੇ ਦੇ ਮੌਜੂਦਾ ਐਮਐਲਏ ਚੌਧਰੀ ਮਦਨ ਲਾਲ ਬੱਗਾ ਖੁਰਾਣਾ ਵੱਲੋਂ ਇਸ ਗੰਭੀਰ ਸਮੱਸਿਆ ਵੱਲ ਕਦੇ ਵੀ ਧਿਆਨ ਨਹੀਂ ਦਿੱਤਾ ਗਿਆ। ਲੋਕਾਂ ਅਨੁਸਾਰ ਕਈ ਵਾਰ ਸ਼ਿਕਾਇਤਾਂ ਕਰਨ ਦੇ ਬਾਵਜੂਦ ਕੋਈ ਹੱਲ ਨਹੀਂ ਨਿਕਲਿਆ।

ਇਸਦੇ ਨਾਲ ਹੀ, ਪੰਜਾਬ ਪੁਲਿਸ ਵੱਲੋਂ ਵੀ ਟਰੈਫਿਕ ਕੰਟਰੋਲ ਲਈ ਕੋਈ ਮੁਲਾਜ਼ਮ ਮੌਕੇ ’ਤੇ ਤਾਇਨਾਤ ਨਹੀਂ ਕੀਤਾ ਜਾਂਦਾ, ਜਿਸ ਕਾਰਨ ਜਾਮ ਹੋਰ ਵੀ ਭਿਆਨਕ ਰੂਪ ਧਾਰ ਲੈਂਦਾ ਹੈ। ਆਮ ਲੋਕਾਂ ਦਾ ਦੋਸ਼ ਹੈ ਕਿ ਜਦੋਂ ਕਿਸੇ ਵੀਆਈਪੀ ਦੀ ਆਵਾਜਾਈ ਹੁੰਦੀ ਹੈ, ਤਾਂ ਪੁਲਿਸ ਪੂਰੀ ਤਿਆਰੀ ਨਾਲ ਰਸਤਾ ਸਾਫ਼ ਕਰਵਾ ਦਿੰਦੀ ਹੈ, ਪਰ ਆਮ ਆਦਮੀ ਨੂੰ ਘੰਟਿਆਂ ਜਾਮ ਵਿੱਚ ਫਸ ਕੇ ਰਹਿਣਾ ਪੈਂਦਾ ਹੈ।

ਇਲਾਕੇ ਦੀ ਪਬਲਿਕ ਦਾ ਕਹਿਣਾ ਹੈ ਕਿ ਪ੍ਰਸ਼ਾਸਨ ਅਤੇ ਸਿਆਸੀ ਨੁਮਾਇੰਦੇ ਇਸ ਮਸਲੇ ’ਤੇ ਬਿਲਕੁਲ ਗੰਭੀਰ ਨਹੀਂ ਦਿੱਖ ਰਹੇ। ਟਰੈਫਿਕ ਇੰਚਾਰਜ ਵੱਲੋਂ ਹੋਰ ਗਤੀਵਿਧੀਆਂ ਤਾਂ ਕੀਤੀਆਂ ਜਾਂਦੀਆਂ ਹਨ, ਪਰ ਛੋਟੀ ਪੁਲੀ ਵਾਲੇ ਜਾਮ ਵੱਲ ਧਿਆਨ ਨਾ ਹੋਣਾ ਲੋਕਾਂ ਵਿੱਚ ਨਾਰਾਜ਼ਗੀ ਪੈਦਾ ਕਰ ਰਿਹਾ ਹੈ।

ਹੁਣ ਦੇਖਣਾ ਇਹ ਹੈ ਕਿ ਪ੍ਰਸ਼ਾਸਨ ਇਸ ਟਰੈਫਿਕ ਸਮੱਸਿਆ ਨੂੰ ਹੱਲ ਕਰਨ ਲਈ ਕਦੋਂ ਅਤੇ ਕੀ ਕਾਰਵਾਈ ਕਰਦਾ ਹੈ, ਜਾਂ ਆਮ ਲੋਕਾਂ ਨੂੰ ਇੰਝ ਹੀ ਹਰ ਰੋਜ਼ ਜਾਮ ਵਿੱਚ ਫਸ ਕੇ ਆਪਣਾ ਸਮਾਂ ਤੇ ਸਬਰ ਗਵਾਉਣਾ ਪਵੇਗਾ।