ਮੋਗਾ 'ਚ ਹੋਏ ਵਿਸ਼ਾਲ ਰੈਲੀ 'ਚ CM ਮਾਨ ਨੇ ਕੀਤੀ ਸ਼ਿਰਕਤ, ਵਿਰੋਧੀਆਂ 'ਤੇ ਸਾਧਿਆ ਨਿਸ਼ਾਨਾ, ਕਿਹਾ - ਜ਼ਮਾਨਤਾਂ 'ਤੇ ਬਾਹਰ ਆ ਕੇ ਮੁੱਛਾਂ ਨੂੰ ਵੱਟ ਦੇ ਰਹੇ ਵਿਰੋਧੀ

ਅੱਜ ਮੁੱਖ ਮੰਤਰੀ ਭਗਵੰਤ ਮਾਨ ਮੋਗਾ 'ਚ ਹੋਏ 'ਮੈਗਾ ਰੈਲੀ 'ਚ ਸ਼ਾਮਲ ਹੋਏ। CM ਮਾਨ ਨੇ ਵਿਰੋਧੀਆਂ 'ਤੇ ਤਿੱਖਾ ਨਿਸ਼ਾਨਾ ਸਾਧਦਿਆਂ ਕਿਹਾ ਕਿ ਜਿਹੜੇ ਲੋਕ ਨਸ਼ਿਆਂ ਦੇ ਮਾਮਲਿਆਂ ਵਿੱਚ ਜ਼ਮਾਨਤਾਂ 'ਤੇ ਬਾਹਰ ਆ ਕੇ ਮੁੱਛਾਂ ਨੂੰ ਵੱਟ ਦੇ ਰਹੇ ਹਨ, ਉਹ ਭੁੱਲ ਜਾਣ ਕਿ ਉਹ ਬਚ ਗਏ ਹਨ।

ਉਨ੍ਹਾਂ ਕਿਹਾ ਕਿ ਦੁਨਿਆਵੀ ਕਚਹਿਰੀਆਂ ਤੋਂ ਸ਼ਾਇਦ ਛੁੱਟ ਜਾਣ, ਪਰ ਪਰਮਾਤਮਾ ਦੀ ਕਚਹਿਰੀ ਵਿੱਚ ਸਿਰਫ਼ ਅਮਲਾਂ ਦੇ ਨਬੇੜੇ ਹੁੰਦੇ ਹਨ। CM ਮਾਨ ਨੇ ਅੱਗੇ  ਕਿਹਾ ਕਿ ਪੁਰਾਣੀਆਂ ਸਰਕਾਰਾਂ ਨੇ ਪੰਜਾਬ ਨੂੰ ਨਸ਼ਿਆਂ ਅਤੇ ਭ੍ਰਿਸ਼ਟਾਚਾਰ ਦੇ ਕੇਸਾਂ ਵਿੱਚ ਪੂਰੀ ਤਰ੍ਹਾਂ ਲੁੱਟਿਆ। 

ਉਨ੍ਹਾਂ ਕਿਹਾ ਅਸੀਂ ਹਰ ਰੋਜ਼ ਨੌਕਰੀਆਂ ਦੇ ਅੰਕੜੇ ਦਿੰਦੇ ਹਾਂ, ਜਦਕਿ ਪੁਰਾਣੀਆਂ ਸਰਕਾਰਾਂ ਨੇ ਸਿਰਫ਼ ਸਰਿੰਜਾਂ ਅਤੇ ਟੀਕੇ ਦਿੱਤੇ। ਇਹ ਲੋਕਾਂ ਦੇ ਕਾਤਲ ਹਨ ਅਤੇ ਇਨ੍ਹਾਂ ਨੂੰ ਸਜ਼ਾ ਮਿਲਣਾ ਜ਼ਰੂਰੀ ਹੈ। ਉਨ੍ਹਾਂ ਨੇ ਅੱਗੇ ਦੱਸਿਆ ਕਿ ਸਰਕਾਰ ਨਸ਼ਿਆਂ ਖ਼ਿਲਾਫ਼ ਲੜਾਈ ਨੂੰ ਨਵੇਂ ਪੜਾਅ ‘ਤੇ ਲੈ ਜਾ ਰਹੀ ਹੈ।

ਇਸ ਯੋਜਨਾ ਵਿੱਚ ਸਕੂਲਾਂ, ਮਾਪਿਆਂ ਅਤੇ ਕੌਮ ਦੀ ਭੂਮਿਕਾ ਅਹਿਮ ਰਹੇਗੀ। ਆਉਣ ਵਾਲੇ ਦਿਨਾਂ ਵਿੱਚ ਸਕੂਲਾਂ ਵਿੱਚ ਵਿਸ਼ੇਸ਼ ਪ੍ਰੋਗਰਾਮ ਸ਼ੁਰੂ ਕੀਤੇ ਜਾਣਗੇ ਜਿੱਥੇ ਮਾਹਿਰ ਕੌਂਸਲਰ ਬੱਚਿਆਂ ਨੂੰ ਨਸ਼ਿਆਂ ਦੇ ਕੋਹੜ ਬਾਰੇ ਜਾਗਰੂਕ ਕਰਨਗੇ। CM ਮਾਨ ਨੇ ਮਾਪਿਆਂ ਨੂੰ ਵੀ ਸਲਾਹ ਦਿੱਤੀ ਕਿ ਉਹ ਆਪਣੇ ਬੱਚਿਆਂ ਦੀ ਸੰਗਤ, ਹਰ ਹਰਕਤ ਅਤੇ ਘਰੋਂ ਬਾਹਰ ਜਾਣ-ਆਉਣ ‘ਤੇ ਨਿਗਰਾਨੀ ਰੱਖਣ।

ਉਨ੍ਹਾਂ ਕਿਹਾ ਕਿ ਬੱਚਿਆਂ ਦੀ ਉਮਰ ਕੋਰੇ ਕਾਗਜ਼ ਵਰਗੀ ਹੈ, ਜਿਸ ਨੂੰ ਨਸ਼ਿਆਂ ਦੇ ਖਤਰਨਾਕ ਪ੍ਰਭਾਵਾਂ ਤੋਂ ਬਚਾਉਣਾ ਸਾਡੀ ਜ਼ਿੰਮੇਵਾਰੀ ਹੈ। CM ਮਾਨ ਨੇ ਇਹ ਵੀ ਦੱਸਿਆ ਕਿ ਸਾਡਾ ਮੁੱਖ ਟਾਰਗੇਟ ਨਸ਼ਾ ਤਸਕਰਾਂ ਤੋਂ ਨਵਾਂ ਗਾਹਕ ਮਿਲਣ ਤੋਂ ਰੋਕਣਾ ਹੈ। ਜਦੋਂ ਮੰਗ ਖਤਮ ਹੋ ਜਾਵੇਗੀ, ਤਾਂ ਤਸਕਰ ਆਪਣੇ ਆਪ ਪੰਜਾਬ ਛੱਡ ਕੇ ਭੱਜ ਜਾਣਗੇ।

ਉਨ੍ਹਾਂ ਨੇ ਜੋੜਿਆ ਕਿ ਪੰਜਾਬੀ ਲੋਕ ਆਪਣੀ ਜਵਾਨੀ ਅਤੇ ਭਵਿੱਖ ਨੂੰ ਨਸ਼ਿਆਂ ਨਾਲ ਬਰਬਾਦ ਨਹੀਂ ਹੋਣ ਦੇਣਗੇ। ਸਾਡਾ ਮੁੱਖ ਮਕਸਦ ਨੌਜਵਾਨਾਂ ਨੂੰ ਸੁਰੱਖਿਅਤ ਅਤੇ ਨਸ਼ੇ ਤੋਂ ਮੁਕਤ ਭਵਿੱਖ ਦੇਣਾ ਹੈ।