NEET-UG 2026 Paper Leak: ਨਾਸਿਕ ਤੋਂ ਸੀਕਰ ਤੱਕ ਪੇਪਰ ਲੀਕ ਦਾ ਜਾਲ ਬੇਨਕਾਬ, 15 ਗ੍ਰਿਫਤਾਰ; 22 ਲੱਖ ਵਿਦਿਆਰਥੀਆਂ ਦਾ ਭਵਿੱਖ ਦਾਅ ‘ਤੇ

NEET-UG 2026 Paper Leak: ਦੇਸ਼ ਦੀ ਸਭ ਤੋਂ ਵੱਡੀ ਮੈਡੀਕਲ ਦਾਖਲਾ ਪ੍ਰੀਖਿਆ NEET-UG 2026 ਹੁਣ ਦੇਸ਼ ਦੇ ਸਭ ਤੋਂ ਵੱਡੇ ਐਗਜ਼ਾਮ ਸਕੈਂਡਲਾਂ ਵਿੱਚ ਸ਼ਾਮਲ ਹੋ ਗਈ ਹੈ। 3 ਮਈ 2026 ਨੂੰ ਹੋਈ ਇਸ ਪ੍ਰੀਖਿਆ ਨੂੰ National Testing Agency (NTA) ਨੇ 12 ਮਈ ਨੂੰ ਰੱਦ ਕਰ ਦਿੱਤਾ, ਜਦੋਂ ਪੇਪਰ ਲੀਕ ਦੇ ਗੰਭੀਰ ਦੋਸ਼ਾਂ ਨੇ ਲੱਖਾਂ ਵਿਦਿਆਰਥੀਆਂ ਅਤੇ ਮਾਪਿਆਂ ਨੂੰ ਹਿਲਾ ਕੇ ਰੱਖ ਦਿੱਤਾ। ਇਸ ਪ੍ਰੀਖਿਆ ਵਿੱਚ 22 ਲੱਖ ਤੋਂ ਵੱਧ ਵਿਦਿਆਰਥੀਆਂ ਨੇ ਭਾਗ ਲਿਆ ਸੀ, ਪਰ ਹੁਣ ਉਨ੍ਹਾਂ ਦਾ ਭਵਿੱਖ ਅਣਿਸ਼ਚਿਤਤਾ ਵਿੱਚ ਹੈ।

ਜਾਂਚ ਵਿੱਚ ਸਾਹਮਣੇ ਆਇਆ ਕਿ ਪੇਪਰ ਲੀਕ ਦੀ ਸ਼ੁਰੂਆਤ ਮਹਾਰਾਸ਼ਟਰ ਦੇ ਨਾਸਿਕ ਸਥਿਤ ਪ੍ਰਿੰਟਿੰਗ ਪ੍ਰੈੱਸ ਤੋਂ ਹੋਈ ਹੋ ਸਕਦੀ ਹੈ। ਸ਼ੱਕ ਹੈ ਕਿ ਪ੍ਰਿੰਟਿੰਗ ਪ੍ਰਕਿਰਿਆ ਨਾਲ ਜੁੜੇ ਕਿਸੇ ਅੰਦਰੂਨੀ ਵਿਅਕਤੀ ਨੇ ਪੇਪਰ ਗੁਪਤ ਤਰੀਕੇ ਨਾਲ ਬਾਹਰ ਕੱਢਿਆ ਅਤੇ ਇਹ ਹਰਿਆਣਾ ਦੇ ਗੁਰੂਗ੍ਰਾਮ ਵਿੱਚ ਇੱਕ ਡਾਕਟਰ ਤੱਕ ਪਹੁੰਚਿਆ। ਇਸ ਡਾਕਟਰ ਨੂੰ ਹੁਣ ਪੂਰੇ ਰੈਕਟ ਦੀ ਅਹਿਮ ਕੜੀ ਮੰਨਿਆ ਜਾ ਰਿਹਾ ਹੈ।

ਜਾਂਚ ਮੁਤਾਬਕ ਰਾਜਸਥਾਨ ਦੇ ਜਮਵਾ ਰਾਮਗੜ੍ਹ ਦੇ ਦੋ ਭਰਾ—ਮੰਗੀਲਾਲ ਬੀਵਾਲ ਅਤੇ ਦਿਨੇਸ਼ ਬੀਵਾਲ—ਨੇ 26 ਅਪ੍ਰੈਲ ਨੂੰ ਇਸ ਡਾਕਟਰ ਤੋਂ 30 ਲੱਖ ਰੁਪਏ ਵਿੱਚ ਪੇਪਰ ਖਰੀਦਿਆ। ਦੋਵਾਂ ਨੂੰ ਪਹਿਲਾਂ ਹੀ ਅੰਦਾਜ਼ਾ ਸੀ ਕਿ NEET-UG 2026 ਦਾ ਪੇਪਰ ਲੀਕ ਹੋ ਸਕਦਾ ਹੈ। ਇਸ ਤੋਂ ਬਾਅਦ ਇਹ ਪੇਪਰ ਰਾਜਸਥਾਨ ਦੇ ਸੀਕਰ ਤੱਕ ਪਹੁੰਚਾਇਆ ਗਿਆ, ਜਿੱਥੇ ਇੱਕ ਭਰਾ ਦੇ ਪੁੱਤਰ ਅਤੇ ਕੋਚਿੰਗ ਨੈੱਟਵਰਕ ਰਾਹੀਂ ਇਹ ਕਈ ਵਿਦਿਆਰਥੀਆਂ ਵਿੱਚ ਫੈਲ ਗਿਆ।

ਸੀਕਰ, ਜੋ ਪਿਛਲੇ ਕੁਝ ਸਾਲਾਂ ਵਿੱਚ NEET ਅਤੇ JEE ਕੋਚਿੰਗ ਦਾ ਵੱਡਾ ਕੇਂਦਰ ਬਣ ਚੁੱਕਾ ਹੈ, ਇਸ ਪੂਰੇ ਸਕੈਂਡਲ ਦਾ ਹੱਬ ਬਣ ਕੇ ਸਾਹਮਣੇ ਆਇਆ। ਕੋਚਿੰਗ ਸੈਂਟਰਾਂ, MBBS ਕੌਂਸਲਿੰਗ ਏਜੰਟਾਂ, PG ਅਤੇ ਹੋਸਟਲ ਨੈੱਟਵਰਕ ਰਾਹੀਂ ਪੇਪਰ WhatsApp, Telegram ਅਤੇ “Guess Paper” ਦੇ ਨਾਮ ਹੇਠ ਵੰਡਿਆ ਗਿਆ। ਜਾਂਚ ਏਜੰਸੀਆਂ ਦਾ ਮੰਨਣਾ ਹੈ ਕਿ ਕਰੀਬ 700 ਵਿਦਿਆਰਥੀਆਂ ਤੱਕ ਇਹ ਲੀਕਡ ਪੇਪਰ ਪਹੁੰਚਾਇਆ ਗਿਆ।

ਇਸ ਮਾਮਲੇ ਦਾ ਸਭ ਤੋਂ ਹੈਰਾਨੀਜਨਕ ਪੱਖ ਇਹ ਰਿਹਾ ਕਿ “Guess Paper” ਵਿੱਚ Biology ਦੇ 90 ਦੇ 90 ਅਤੇ Chemistry ਦੇ 45 ਦੇ 45 ਸਵਾਲ ਅਸਲ ਪੇਪਰ ਨਾਲ ਮੇਲ ਖਾਂਦੇ ਸਨ। Chemistry ਸੈਕਸ਼ਨ ਤਾਂ word-to-word ਇਕੋ ਜਿਹਾ ਸੀ, ਜਿਸ ਨਾਲ ਇਹ ਸਪੱਸ਼ਟ ਹੋ ਗਿਆ ਕਿ ਇਹ ਸਿਰਫ ਅੰਦਾਜ਼ਾ ਨਹੀਂ, ਸਗੋਂ ਅਸਲ ਪ੍ਰਸ਼ਨ ਪੱਤਰ ਸੀ।

ਜਾਂਚ ਦੌਰਾਨ ਰਾਕੇਸ਼ ਕੁਮਾਰ ਮੰਡਾਵਾਰੀਆ ਨਾਂ ਦੇ ਇੱਕ MBBS ਕੌਂਸਲਿੰਗ ਏਜੰਟ ਨੂੰ ਦੇਹਰਾਦੂਨ ਤੋਂ ਗ੍ਰਿਫਤਾਰ ਕੀਤਾ ਗਿਆ, ਜਿਸ ‘ਤੇ ਸੈਂਕੜਿਆਂ ਵਿਦਿਆਰਥੀਆਂ ਤੱਕ ਪੇਪਰ ਪਹੁੰਚਾਉਣ ਦੇ ਦੋਸ਼ ਹਨ। ਇਸ ਤੋਂ ਇਲਾਵਾ ਇੱਕ ਕੇਰਲ ਵਿੱਚ ਪੜ੍ਹਦਾ MBBS ਵਿਦਿਆਰਥੀ, ਉਸਦਾ ਪਿਤਾ ਜੋ ਸੀਕਰ ਵਿੱਚ ਹੋਸਟਲ ਚਲਾਉਂਦਾ ਸੀ, ਅਤੇ ਹਰਿਆਣਾ ਦਾ ਯਸ਼ ਯਾਦਵ ਵੀ ਜਾਂਚ ਦੇ ਘੇਰੇ ਵਿੱਚ ਹਨ।

ਹੁਣ ਤੱਕ ਰਾਜਸਥਾਨ ਪੁਲਿਸ SOG ਵੱਲੋਂ 15 ਲੋਕਾਂ ਨੂੰ ਹਿਰਾਸਤ ਵਿੱਚ ਲਿਆ ਜਾ ਚੁੱਕਾ ਹੈ। ਸੀਕਰ, ਝੁੰਝਨੂੰ, ਦੇਹਰਾਦੂਨ ਅਤੇ ਹੋਰ ਕਈ ਥਾਵਾਂ ‘ਤੇ ਛਾਪੇਮਾਰੀ ਹੋਈ ਹੈ। ਮਾਮਲੇ ਦੀ ਗੰਭੀਰਤਾ ਨੂੰ ਦੇਖਦਿਆਂ ਕੇਂਦਰ ਸਰਕਾਰ ਨੇ ਜਾਂਚ CBI ਨੂੰ ਸੌਂਪ ਦਿੱਤੀ ਹੈ। CBI ਨੇ Criminal Conspiracy, Cheating, Prevention of Corruption Act ਅਤੇ Public Examination Prevention of Unfair Means Act ਤਹਿਤ FIR ਦਰਜ ਕੀਤੀ ਹੈ।

ਜਾਂਚ ਵਿੱਚ ਰਾਜਸਥਾਨ, ਹਰਿਆਣਾ, ਮਹਾਰਾਸ਼ਟਰ, ਦਿੱਲੀ, ਬਿਹਾਰ, ਜੰਮੂ-ਕਸ਼ਮੀਰ, ਕੇਰਲ ਅਤੇ ਉੱਤਰਾਖੰਡ ਤੱਕ ਲਿੰਕ ਸਾਹਮਣੇ ਆਏ ਹਨ, ਜਿਸ ਨਾਲ ਇਹ ਇੱਕ ਵੱਡੇ “Exam Mafia” ਨੈੱਟਵਰਕ ਦਾ ਰੂਪ ਲੈਂਦਾ ਦਿਖ ਰਿਹਾ ਹੈ।

ਫਿਲਹਾਲ ਸਭ ਤੋਂ ਵੱਡੇ ਸਵਾਲ ਇਹ ਹਨ ਕਿ ਨਾਸਿਕ ਪ੍ਰਿੰਟਿੰਗ ਪ੍ਰੈੱਸ ਤੋਂ ਪੇਪਰ ਕਿਸਨੇ ਲੀਕ ਕੀਤਾ, ਕੀ ਅੰਦਰੂਨੀ ਲੋਕ ਸ਼ਾਮਲ ਸਨ, ਕਿੰਨਾ ਪੈਸਾ ਇਸ ਰੈਕਟ ਵਿੱਚ ਲੱਗਾ ਅਤੇ ਕਿੰਨੇ ਵਿਦਿਆਰਥੀ ਇਸ ਨਾਲ ਪ੍ਰਭਾਵਿਤ ਹੋਏ। NEET-UG 2026 ਦੀ ਨਵੀਂ ਪ੍ਰੀਖਿਆ ਤਰੀਕਾਂ ਜਲਦ ਐਲਾਨੀਆਂ ਜਾਣਗੀਆਂ, ਪਰ ਇਸ ਸਕੈਂਡਲ ਨੇ ਦੇਸ਼ ਦੀ ਪ੍ਰੀਖਿਆ ਪ੍ਰਣਾਲੀ ਦੀ ਭਰੋਸੇਯੋਗਤਾ ‘ਤੇ ਗੰਭੀਰ ਸਵਾਲ ਖੜ੍ਹੇ ਕਰ ਦਿੱਤੇ ਹਨ।