ਗੈਂਗਸਟਰਵਾਦ ਖ਼ਿਲਾਫ਼ ਪੰਜਾਬ ਸਰਕਾਰ ਦਾ ਵੱਡਾ ਕਦਮ ! ਰਾਜਪੁਰਾ ‘ਚ ਬਣੇਗਾ ਐਂਟੀ ਗੈਂਗਸਟਰ ਟਾਸਕ ਫੋਰਸ ਦਾ ਹੈੱਡ ਕੁਆਰਟਰ

ਪੰਜਾਬ ਸਰਕਾਰ ਨੇ ਗੈਂਗਸਟਰਾਂ ਅਤੇ ਅਪਰਾਧਿਕ ਤੱਤਾਂ ਖ਼ਿਲਾਫ਼ ਨਕੇਲ ਕੱਸਣ ਲਈ ਵੱਡਾ ਕਦਮ ਚੁੱਕਿਆ ਹੈ। ਹੁਣ ਰਾਜਪੁਰਾ 'ਚ ਇੱਕ ਨਵਾਂ ਸਟੇਟ ਐਂਟੀ-ਗੈਂਗਸਟਰ ਟਾਸਕ ਫੋਰਸ (AGTF) ਪੁਲਿਸ ਸਟੇਸ਼ਨ ਸਥਾਪਿਤ ਕੀਤਾ ਜਾਵੇਗਾ। ਇਸ ਦੀ ਸੂਚਨਾ ਪੰਜਾਬ ਦੇ ਗ੍ਰਹਿ ਵਿਭਾਗ ਵੱਲੋਂ ਨੋਟੀਫਿਕੇਸ਼ਨ ਜਾਰੀ ਕਰਕੇ ਦਿੱਤੀ ਹੈ।  

ਜਾਣਕਾਰੀ ਮੁਤਾਬਕ, ਹੁਣ ਇਸ ਸਟੇਸ਼ਨ ਦੇ ਜ਼ਰੀਏ AGTF ਵੱਲੋਂ ਕਿਸੇ ਵੀ ਥਾਂ ਤੇ ਕੀਤੀ ਜਾਣ ਵਾਲੀ ਕਾਰਵਾਈ — ਜਿਵੇਂ ਕਿ FIR ਦਰਜ ਕਰਨਾ, ਜਾਂ ਅਗਲੀ ਕਾਨੂੰਨੀ ਕਾਰਵਾਈ — ਸਿੱਧਾ ਰਾਜਪੁਰਾ ਤੋਂ ਕੀਤੀ ਜਾਵੇਗੀ। ਇਸ ਤਰ੍ਹਾਂ ਪਿਛਲੇ ਸਿਸਟਮ ਵਿੱਚ ਪਾਈ ਜਾਂਦੀ ਅਸਮੰਜਸਤਾ ਦੂਰ ਹੋਵੇਗੀ, ਜਿੱਥੇ ਪਹਿਲਾਂ ਹਰ ਮੁਹਿੰਮ ਨੂੰ ਉਸੇ ਜ਼ਿਲ੍ਹੇ ਅਤੇ ਥਾਣੇ ਵਿੱਚ ਦਰਜ ਕਰਵਾਉਣਾ ਪੈਂਦਾ ਸੀ, ਜਿਸ ਨਾਲ AGTF ਦੀ ਵਿਸ਼ੇਸ਼ ਤਾਕਤਾਂ ‘ਤੇ ਕੁਝ ਹੱਦ ਤੱਕ ਅਸਰ ਪੈਂਦਾ ਸੀ।

ਐੱਸਐੱਸਪੀ ਅਤੇ AGTF ਦੇ ਅਧਿਕਾਰੀਆਂ ਨੇ ਦੱਸਿਆ ਕਿ ਇਸ ਨਵੇਂ ਸਟੇਸ਼ਨ ਦੇ ਬਣਨ ਨਾਲ ਮੁਹਿੰਮ ਹੋਰ ਤੇਜ਼ ਅਤੇ ਪ੍ਰਭਾਵਸ਼ਾਲੀ ਬਣੇਗੀ। ਹੁਣ ਕਿਸੇ ਵੀ ਜ਼ਿਲ੍ਹੇ ਵਿੱਚ ਐਂਟੀ ਗੈਂਗਸਟਰ ਟਾਸਕ ਫੋਰਸ ਜਿੱਥੇ ਵੀ ਕਾਰਵਾਈ ਕਰੇਗੀ, ਉਸ ਮਾਮਲੇ ਦੀ FIR ਤੋਂ ਲੈ ਕੇ ਸਾਰੀ ਪੁਲਿਸ ਕਾਰਵਾਈ ਰਾਜਪੁਰਾ ਸਟੇਸ਼ਨ 'ਚ ਦਰਜ ਕੀਤੀ ਜਾਵੇਗੀ।

ਇਸ ਤਰ੍ਹਾਂ ਦਾ ਕਦਮ ਸਰਕਾਰ ਵੱਲੋਂ ਅਪਰਾਧਿਕ ਤੱਤਾਂ ਖ਼ਿਲਾਫ਼ ਸਖ਼ਤ ਰਵੱਈਏ ਦਾ ਸੰਕੇਤ ਹੈ। ਇਹ ਨਵਾਂ ਸਟੇਸ਼ਨ AGTF ਨੂੰ ਸੂਬੇ ਭਰ ਵਿੱਚ ਜ਼ਿਲ੍ਹਾ ਪੱਧਰੀ ਕਾਰਵਾਈ ਕਰਨ ਲਈ ਸਹੂਲਤ ਮੁਹੱਈਆ ਕਰਵਾਏਗਾ ਅਤੇ ਗੈਂਗਸਟਰਵਾਦ ਨੂੰ ਕਿਸੇ ਵੀ ਹੱਦ ਤੱਕ ਰੋਕਣ ਵਿੱਚ ਮਦਦਗਾਰ ਸਾਬਿਤ ਹੋਵੇਗਾ।