ਅਸਾਮ ‘ਚ ਫਾਇਟਰ ਜੈਟ ਸੁਖੋਈ ਹੋਇਆ ਕ੍ਰੈਸ਼, ਭਾਰਤੀ ਹਵਾਈ ਸੈਨਾ ਦੇ 2 ਜਵਾਨ ਸ਼ਹੀਦ

ਅਸਾਮ ਦੇ ਕਾਰਬੀ ਐਂਗਲੌਂਗ ਖੇਤਰ ਵਿੱਚ ਸਿਖਲਾਈ ਦੌਰਾਨ ਰਾਡਾਰ ਤੋਂ ਗਾਇਬ ਹੋਇਆ ਭਾਰਤੀ ਹਵਾਈ ਸੈਨਾ ਦਾ ਇੱਕ ਲੜਾਕੂ ਜਹਾਜ਼ ਸੁਖੋਈ Su-30MKI ਕ੍ਰੈਸ਼ ਹੋ ਗਿਆ ਹੈ। ਇਸ ਹਾਦਸੇ ‘ਚ ਦੋਵੇਂ ਪਾਇਲਟ, ਸਕੁਐਡਰਨ ਲੀਡਰ ਅਨੁਜ ਅਤੇ ਫਲਾਈਟ ਲੈਫਟੀਨੈਂਟ ਪੂਰਵੇਸ਼ ਦੁਰਾਗਕਰ ਦੀ ਮੌਤ ਹੋ ਗਈ ਹੈ।

ਹਵਾਈ ਸੈਨਾ ਨੇ ਵੀਰਵਾਰ ਰਾਤ 1:09 ਵਜੇ ਹਾਦਸੇ ਦੀ ਪੁਸ਼ਟੀ ਕੀਤੀ ਹੈ । ਸ਼ੁੱਕਰਵਾਰ ਸਵੇਰੇ 9:14 ਵਜੇ ਇੱਕ ਹੋਰ ਐਕਸ-ਪੋਸਟ ਨੇ ਦੋਵਾਂ ਪਾਇਲਟਾਂ ਦੀ ਮੌਤ ਦੀ ਜਾਣਕਾਰੀ ਦਿੱਤੀ। ਫੌਜ ਨੇ ਕਿਹਾ ਕਿ ਤਲਾਸ਼ੀ ਮੁਹਿੰਮ ਚੱਲ ਰਹੀ ਹੈ। ਜਦੋਂ ਹਾਦਸਾ ਹੋਇਆ ਤਾਂ ਲੜਾਕੂ ਜਹਾਜ਼ ਨਿਯਮਿਤ ਉਡਾਣ 'ਤੇ ਸੀ। ਇਸ ਦੌਰਾਨ, ਇਸਦਾ ਜ਼ਮੀਨੀ ਨਿਯੰਤਰਣ ਨਾਲ ਸੰਪਰਕ ਟੁੱਟ ਗਿਆ।

ਭਾਰਤੀ ਹਵਾਈ ਸੈਨਾ ਨੇ ਸੋਸ਼ਲ ਮੀਡੀਆ ਪਲੇਟਫਾਰਮ ਐਕਸ ’ਤੇ ਪੋਸਟ ਕਰਕੇ ਦੋਵੇਂ ਪਾਇਲਟਾਂ ਦੇ ਦੇਹਾਂਤ ’ਤੇ ਗਹਿਰਾ ਦੁੱਖ ਪ੍ਰਗਟਾਇਆ ਅਤੇ ਕਿਹਾ ਕਿ ਇਸ ਮੁਸ਼ਕਲ ਘੜੀ ਵਿੱਚ ਹਵਾਈ ਸੈਨਾ ਪਰਿਵਾਰਾਂ ਦੇ ਨਾਲ ਖੜੀ ਹੈ।
ਅਧਿਕਾਰੀਆਂ ਦੇ ਮੁਤਾਬਕ, ਜਹਾਜ਼ ਨਾਲ ਸ਼ਾਮ 7:42 ਵਜੇ ਸੰਪਰਕ ਟੁੱਟ ਗਿਆ ਸੀ। ਸੁਖੋਈ Su-30MKI ਦੋ ਸੀਟਾਂ ਵਾਲਾ ਮਲਟੀਪਰਪਜ਼ ਫਾਈਟਰ ਜੈੱਟ ਹੈ, ਜਿਸਨੂੰ ਰੂਸ ਦੀ ਜਹਾਜ਼ ਨਿਰਮਾਤਾ ਕੰਪਨੀ ਸੁਖੋਈ ਨੇ ਵਿਕਸਤ ਕੀਤਾ ਹੈ। ਭਾਰਤ ਵਿੱਚ ਇਸ ਜਹਾਜ਼ ਦਾ ਨਿਰਮਾਣ ਲਾਇਸੈਂਸ ਤਹਿਤ ਹਿੰਦੁਸਤਾਨ ਏਅਰੋਨੌਟਿਕਸ ਲਿਮਿਟੇਡ (HAL) ਵੱਲੋਂ ਕੀਤਾ ਜਾਂਦਾ ਹੈ।

ਸਭ ਤੋਂ ਤਾਕਤਵਰ ਲੜਾਕੂ ਜਹਾਜ਼ਾਂ ਵਿੱਚੋਂ ਇੱਕ ਹੈ ਸੁਖੋਈ 
ਭਾਰਤੀ ਹਵਾਈ ਸੈਨਾ ਕੋਲ 260 ਤੋਂ ਵੱਧ Su-30MKI ਜਹਾਜ਼ਾਂ ਦਾ ਬੇੜਾ ਮੌਜੂਦ ਹੈ। 2000 ਦੇ ਦਹਾਕੇ ਦੀ ਸ਼ੁਰੂਆਤ ਵਿੱਚ ਇਸ ਨੂੰ ਹਵਾਈ ਸੈਨਾ ਵਿੱਚ ਸ਼ਾਮਲ ਕੀਤਾ ਗਿਆ।   ਇਹ ਜਹਾਜ਼ ਦੁਨੀਆ ਦੇ ਸਭ ਤੋਂ ਤਾਕਤਵਰ ਲੜਾਕੂ ਜਹਾਜ਼ਾਂ ਵਿੱਚੋਂ ਇੱਕ ਮੰਨਿਆ ਜਾਂਦਾ ਹੈ। ਹਾਲਾਂਕਿ ਇਸ ਤਾਜ਼ਾ ਹਾਦਸੇ ਤੋਂ ਬਾਅਦ ਇਸ ਦੀ ਦੇਖਭਾਲ ਅਤੇ ਮੁਰੰਮਤ ਪ੍ਰਣਾਲੀ ’ਤੇ ਵੀ ਸਵਾਲ ਉੱਠਣ ਲੱਗੇ ਹਨ।

ਪਹਿਲਾਂ ਵੀ ਹੋ ਚੁੱਕੇ ਹਨ ਹਾਦਸੇ
ਇਹ ਪਹਿਲੀ ਵਾਰ ਨਹੀਂ ਹੈ ਕਿ ਸੁਖੋਈ ਜਹਾਜ਼ ਕ੍ਰੈਸ਼ ਹੋਇਆ ਹੋਵੇ। ਇਸ ਤੋਂ ਪਹਿਲਾਂ ਵੀ ਕਈ ਵਾਰ Su-30MKI ਜਹਾਜ਼ ਕ੍ਰੈਸ਼ ਹੋ ਚੁੱਕੇ ਹਨ। ਅਗਸਤ 2019 ਵਿੱਚ ਅਸਾਮ ਦੇ ਤੇਜ਼ਪੁਰ ਨੇੜੇ ਇੱਕ ਟ੍ਰੇਨਿੰਗ ਮਿਸ਼ਨ ਦੌਰਾਨ ਸੁਖੋਈ ਜਹਾਜ਼ ਧਾਨ ਦੇ ਖੇਤ ਵਿੱਚ ਡਿੱਗ ਗਿਆ ਸੀ, ਪਰ ਉਸ ਵੇਲੇ ਦੋਵੇਂ ਪਾਇਲਟ ਸੁਰੱਖਿਅਤ ਤਰੀਕੇ ਨਾਲ ਬਚ ਨਿਕਲੇ ਸਨ।

ਇਸ ਤੋਂ ਇਲਾਵਾ ਮਈ 2015 ਵਿੱਚ ਵੀ ਤੇਜ਼ਪੁਰ ਏਅਰ ਫੋਰਸ ਬੇਸ ਤੋਂ ਉਡਾਣ ਭਰਨ ਦੇ ਤੁਰੰਤ ਬਾਅਦ ਇੱਕ Su-30MKI ਜਹਾਜ਼ ਕਰੀਬ 36 ਕਿਲੋਮੀਟਰ ਦੱਖਣ ਵੱਲ ਹਾਦਸਾਗ੍ਰਸਤ ਹੋ ਗਿਆ ਸੀ, ਹਾਲਾਂਕਿ ਉਸ ਸਮੇਂ ਵੀ ਦੋਵੇਂ ਪਾਇਲਟ ਆਪਣੀ ਜਾਨ ਬਚਾਉਣ ਵਿੱਚ ਕਾਮਯਾਬ ਰਹੇ ਸਨ।