ਅਮਰੀਕਾ ਨੇ ਭਾਰਤ ਨੂੰ ਮੁੜ ਦਿੱਤਾ ਵੱਡਾ ਝੱਟਕਾ ! ਸੋਲਰ ਪੈਨਲ ‘ਤੇ ਲਗਾਇਆ 126% ਟੈਰਿਫ਼

ਅਮਰੀਕਾ ਨੇ ਭਾਰਤ ਨੂੰ ਵਪਾਰਕ ਮੋਰਚੇ ‘ਤੇ ਇੱਕ ਵੱਡਾ ਝਟਕਾ ਦਿੰਦਿਆਂ ਭਾਰਤ ਤੋਂ ਆਯਾਤ ਹੋਣ ਵਾਲੇ ਸੋਲਰ ਪੈਨਲਾਂ ‘ਤੇ ਕਰੀਬ 126 ਫੀਸਦੀ ਤੱਕ ਦਾ ਸ਼ੁਰੂਆਤੀ ਟੈਰਿਫ ਲਗਾਉਣ ਦਾ ਫੈਸਲਾ ਕੀਤਾ ਹੈ। ਇਹ ਕਦਮ ਅਮਰੀਕੀ ਵਣਜ ਵਿਭਾਗ ਵੱਲੋਂ ਉਸ ਵੇਲੇ ਚੁੱਕਿਆ ਗਿਆ ਹੈ ਜਦੋਂ ਭਾਰਤੀ ਸੋਲਰ ਉਤਪਾਦਾਂ ਦੀ ਕੀਮਤ ਅਤੇ ਸਰਕਾਰੀ ਸਹਾਇਤਾ ਨੂੰ ਲੈ ਕੇ ਜਾਂਚ ਚੱਲ ਰਹੀ ਸੀ।

ਅਮਰੀਕਾ ਦਾ ਦੋਸ਼ ਹੈ ਕਿ ਭਾਰਤ ਆਪਣੀਆਂ ਸੋਲਰ ਨਿਰਮਾਤਾ ਕੰਪਨੀਆਂ ਨੂੰ ਸਰਕਾਰੀ ਸਬਸਿਡੀ ਦੇ ਰਿਹਾ ਹੈ। ਇਸ ਕਾਰਨ ਭਾਰਤੀ ਕੰਪਨੀਆਂ ਆਪਣੇ ਉਤਪਾਦ ਘੱਟ ਕੀਮਤ ‘ਤੇ ਵਿਦੇਸ਼ਾਂ ਵਿੱਚ ਵੇਚ ਰਹੀਆਂ ਹਨ, ਜਿਸ ਨਾਲ ਅਮਰੀਕਾ ਦੀਆਂ ਸਥਾਨਕ ਕੰਪਨੀਆਂ ਨੂੰ ਨੁਕਸਾਨ ਹੋ ਰਿਹਾ ਹੈ ਅਤੇ ਬਾਜ਼ਾਰ ਵਿੱਚ ਅਸਮਾਨ ਮੁਕਾਬਲਾ ਬਣ ਰਿਹਾ ਹੈ।

ਸਿਰਫ ਭਾਰਤ ਹੀ ਨਹੀਂ, ਅਮਰੀਕਾ ਨੇ ਹੋਰ ਦੇਸ਼ਾਂ ‘ਤੇ ਵੀ ਉੱਚੇ ਟੈਰਿਫ ਲਗਾਉਣ ਦੀ ਯੋਜਨਾ ਬਣਾਈ ਹੈ। ਜਾਣਕਾਰੀ ਮੁਤਾਬਕ, ਇੰਡੋਨੇਸ਼ੀਆ ‘ਤੇ 86 ਤੋਂ 143 ਫੀਸਦੀ ਤੱਕ ਅਤੇ ਲਾਓਸ ‘ਤੇ ਲਗਭਗ 81 ਫੀਸਦੀ ਤੱਕ ਟੈਰਿਫ ਲਗਾਉਣ ਦਾ ਪ੍ਰਸਤਾਵ ਦਿੱਤਾ ਗਿਆ ਹੈ।

ਇਸ ਤੋਂ ਪਹਿਲਾਂ ਟੈਰਿਫਾਂ ਨਾਲ ਜੁੜੇ ਇੱਕ ਵੱਡੇ ਫੈਸਲੇ ਨੂੰ ਅਮਰੀਕੀ ਸੁਪਰੀਮ ਕੋਰਟ ਨੇ ਰੋਕ ਦਿੱਤਾ ਸੀ ਅਤੇ ਮਾਮਲੇ ਨੂੰ ਕਾਂਗਰਸ ਦੇ ਵਿਚਾਰ ਲਈ ਭੇਜਣ ਦੇ ਹੁਕਮ ਦਿੱਤੇ ਸਨ। ਇਸ ਦੇ ਬਾਅਦ ਅਮਰੀਕੀ ਪ੍ਰਸ਼ਾਸਨ ਨੇ ਕਈ ਦੇਸ਼ਾਂ ‘ਤੇ 10 ਫੀਸਦੀ ਦਾ ਆਮ ਟੈਰਿਫ ਲਗਾਇਆ ਸੀ। ਹੁਣ ਭਾਰਤ ਲਈ ਸੋਲਰ ਸੈਕਟਰ ਵਿੱਚ ਵੱਖਰੇ ਅਤੇ ਵੱਧ ਦਰਾਂ ਵਾਲੇ ਟੈਰਿਫ ਦਾ ਐਲਾਨ ਕੀਤਾ ਗਿਆ ਹੈ।

ਮਾਹਿਰਾਂ ਦਾ ਮੰਨਣਾ ਹੈ ਕਿ ਇਸ ਫੈਸਲੇ ਦਾ ਅਸਰ ਭਾਰਤ ਦੇ ਸੋਲਰ ਨਿਰਯਾਤ ‘ਤੇ ਪੈ ਸਕਦਾ ਹੈ ਅਤੇ ਅਮਰੀਕਾ ਨੂੰ ਜਾਣ ਵਾਲੇ ਉਤਪਾਦ ਮਹਿੰਗੇ ਹੋ ਸਕਦੇ ਹਨ। ਇਸ ਨਾਲ ਭਾਰਤੀ ਕੰਪਨੀਆਂ ਦੀ ਮੁਕਾਬਲੇ ਦੀ ਸਮਰੱਥਾ ‘ਤੇ ਵੀ ਪ੍ਰਭਾਵ ਪੈ ਸਕਦਾ ਹੈ। ਫਿਲਹਾਲ, ਇਸ ਮਾਮਲੇ ‘ਤੇ ਭਾਰਤ ਸਰਕਾਰ ਦੀ ਅਧਿਕਾਰਕ ਪ੍ਰਤੀਕ੍ਰਿਆ ਦੀ ਉਡੀਕ ਕੀਤੀ ਜਾ ਰਹੀ ਹੈ।