ਨਸ਼ਾ ਤਸਕਰੀ ਖ਼ਿਲਾਫ਼ ਵੱਡੀ ਕਾਰਵਾਈ : ਅੰਮ੍ਰਿਤਸਰ ਪੁਲਿਸ ਨੇ NDPS ਐਕਟ ਹੇਠ 1476 ਕੇਸ ਦਰਜ ਕਰਕੇ 2668 ਦੋਸ਼ੀ ਗ੍ਰਿਫ਼ਤਾਰ

ਪੰਜਾਬ ਵਿੱਚ ਨਸ਼ਾ ਤਸਕਰੀ ਦੇ ਜਾਲ ਨੂੰ ਤੋੜਨ ਵੱਲ ਇੱਕ ਵੱਡਾ ਅਤੇ ਨਿਰਣਾਇਕ ਕਦਮ ਚੁੱਕਿਆ ਗਿਆ ਹੈ। ਅੰਮ੍ਰਿਤਸਰ ਪੁਲਿਸ ਕਮਿਸ਼ਨਰੇਟ ਵੱਲੋਂ ਸਾਲ 2025 ਦੌਰਾਨ NDPS ਐਕਟ ਅਧੀਨ 1476 ਕੇਸ ਦਰਜ ਕਰਕੇ 2668 ਨਸ਼ਾ ਤਸਕਰਾਂ ਨੂੰ ਗ੍ਰਿਫ਼ਤਾਰ ਕੀਤਾ ਗਿਆ ਹੈ। ਇਹ ਜਾਣਕਾਰੀ ਗੁਰਪ੍ਰੀਤ ਸਿੰਘ ਭੱਲਰ, ਕਮਿਸ਼ਨਰ ਆਫ਼ ਪੁਲਿਸ, ਅੰਮ੍ਰਿਤਸਰ ਨੇ ਸਾਂਝੀ ਕੀਤੀ।

ਉਨ੍ਹਾਂ ਦੱਸਿਆ ਕਿ ਇਸ ਦੌਰਾਨ ਪੁਲਿਸ ਵੱਲੋਂ:

• 276 ਕਿੱਲੋਗ੍ਰਾਮ 551 ਗ੍ਰਾਮ ਹੈਰੋਇਨ,
• 37 ਕਿੱਲੋਗ੍ਰਾਮ 146 ਗ੍ਰਾਮ ਅਫੀਮ,
• 6 ਕਿੱਲੋਗ੍ਰਾਮ 515 ਗ੍ਰਾਮ ਆਈਸ (ਮੇਥਐਮਫੇਟਾਮੀਨ),
• 16 ਕਿੱਲੋਗ੍ਰਾਮ 75 ਗ੍ਰਾਮ ਚਰਸ,
• 9 ਕਿੱਲੋਗ੍ਰਾਮ ਗਾਂਜਾ,
• ਅਤੇ ਹੋਰ ਨਸ਼ੀਲੇ ਪਦਾਰਥ ਬਰਾਮਦ ਕੀਤੇ ਗਏ।

ਨਸ਼ਾ ਤਸਕਰੀ ਨਾਲ ਜੁੜੀ ₹3.14 ਕਰੋੜ ਤੋਂ ਵੱਧ ਡਰੱਗ ਮਨੀ ਵੀ ਜ਼ਬਤ ਕੀਤੀ ਗਈ, ਜਦਕਿ 126 ਵਾਹਨਾਂ ਨੂੰ ਸੀਜ਼ ਕਰਕੇ ਤਸਕਰਾਂ ਦੀ ਆਰਥਿਕ ਕਮਰ ਤੋੜੀ ਗਈ। ਇਸ ਤੋਂ ਇਲਾਵਾ ਨਸ਼ਾ ਸਪਲਾਈ ਚੇਨ ਨਾਲ ਜੁੜੀਆਂ ਕੁਝ ਫਾਰਮਾਸੀ ਯੂਨਿਟਾਂ ’ਤੇ ਵੀ ਕਾਨੂੰਨੀ ਕਾਰਵਾਈ ਕੀਤੀ ਗਈ ਹੈ।

CASO ਤਹਿਤ ਤਿੰਨਾਂ ਜੋਨਜ਼ ਵਿੱਚ ਸਖ਼ਤ ਸਰਚ ਅਭਿਆਨ

ਕਮਿਸ਼ਨਰੇਟ ਪੁਲਿਸ ਵੱਲੋਂ ਸ਼ਹਿਰ ਦੇ ਤਿੰਨਾਂ ਜੋਨਾਂ ਵਿੱਚ CASO (Cordon and Search Operation) ਤਹਿਤ ਵਿਸ਼ੇਸ਼ ਸਰਚ ਅਭਿਆਨ ਕੀਤੇ ਗਏ, ਜਿਸ ਦੌਰਾਨ ਹਰ ਸ਼ੱਕੀ ਵਿਅਕਤੀ ਅਤੇ ਵਾਹਨ ਦੀ ਗਹਿਰਾਈ ਨਾਲ ਜਾਂਚ ਕੀਤੀ ਗਈ।

ਮੁੱਖ ਮੰਤਰੀ ਦੇ ਨਿਰਦੇਸ਼ਾਂ ਅਧੀਨ ਚੱਲ ਰਹੀ ਮੁਹਿੰਮ

ਕਮਿਸ਼ਨਰ ਗੁਰਪ੍ਰੀਤ ਸਿੰਘ ਭੱਲਰ ਨੇ ਸਪਸ਼ਟ ਕੀਤਾ ਕਿ ਇਹ ਪੂਰੀ ਮੁਹਿੰਮ ਮੁੱਖ ਮੰਤਰੀ ਪੰਜਾਬ ਦੇ ਨਿਰਦੇਸ਼ਾਂ ਅਤੇ ਰਾਜ ਸਰਕਾਰ ਦੀ ਨਸ਼ਾ-ਮੁਕਤ ਪੰਜਾਬ ਨੀਤੀ ਦੇ ਤਹਿਤ ਚਲਾਈ ਜਾ ਰਹੀ ਹੈ। ਅੰਮ੍ਰਿਤਸਰ ਵਿੱਚ ਹੁਣ ਤੱਕ ਦੀ ਇਹ ਰਿਕਵਰੀ ਸਿਰਫ਼ ਸ਼ੁਰੂਆਤ ਹੈ, ਜਦਕਿ ਪੂਰੇ ਪੰਜਾਬ ਦਾ ਸੰਯੁਕਤ ਡਾਟਾ ਵੱਖਰੇ ਤੌਰ ’ਤੇ ਇਕੱਠਾ ਕੀਤਾ ਜਾ ਰਿਹਾ ਹੈ।

ਸਿਰਫ਼ ਕਾਰਵਾਈ ਨਹੀਂ, ਪੁਨਰਵਾਸ ਵੀ

ਪੁਲਿਸ ਪ੍ਰਸ਼ਾਸਨ ਵੱਲੋਂ ਨਸ਼ੇ ਦੇ ਆਦੀ ਵਿਅਕਤੀਆਂ ਖਿਲਾਫ਼ ਸਿਰਫ਼ ਕਾਨੂੰਨੀ ਕਾਰਵਾਈ ਹੀ ਨਹੀਂ, ਸਗੋਂ ਉਨ੍ਹਾਂ ਨੂੰ ਰਿਹੈਬਿਲੀਟੇਸ਼ਨ ਨਾਲ ਜੋੜਨ ਲਈ ਵੀ ਯਤਨ ਕੀਤੇ ਜਾ ਰਹੇ ਹਨ। ਇਸ ਪਹਲ ਨਾਲ ਕਈ ਉਜੜੇ ਘਰ ਮੁੜ ਵੱਸਣ ਦੀ ਉਮੀਦ ਬਣੀ ਹੈ ਅਤੇ ਲੋਕਾਂ ਵੱਲੋਂ ਵੀ ਪੁਲਿਸ-ਪ੍ਰਸ਼ਾਸਨ ਨੂੰ ਵਧ-ਚੜ੍ਹ ਕੇ ਸਹਿਯੋਗ ਮਿਲ ਰਿਹਾ ਹੈ।

Jan Punjab News View

ਜੇ ਅੰਮ੍ਰਿਤਸਰ ਪੁਲਿਸ ਵੱਲੋਂ ਦਿਖਾਈ ਗਈ ਇਹੀ ਦ੍ਰਿੜਤਾ, ਰਣਨੀਤਿਕ ਸੋਚ ਅਤੇ ਲਗਾਤਾਰ ਕਾਰਵਾਈ ਰਾਜ ਭਰ ਵਿੱਚ ਜਾਰੀ ਰਹੇ, ਤਾਂ ਉਹ ਸਮਾਂ ਦੂਰ ਨਹੀਂ ਜਦੋਂ ਪੰਜਾਬ ਨਸ਼ਾ ਤਸਕਰਾਂ ਦੇ ਚੰਗੁਲ ਤੋਂ ਮੁਕਤ ਹੋਵੇਗਾ। ਇਹ ਮੁਹਿੰਮ ਸਿਰਫ਼ ਕਾਨੂੰਨੀ ਸਖ਼ਤੀ ਨਹੀਂ, ਸਗੋਂ ਪ੍ਰਸ਼ਾਸਕੀ ਇਰਾਦੇ, ਸਮਾਜਿਕ ਜ਼ਿੰਮੇਵਾਰੀ ਅਤੇ ਲੋਕਤੰਤਰਕ ਭਰੋਸੇ ਦੀ ਜਿੱਤੀ ਹੋਈ ਲੜਾਈ ਹੈ। ਅੰਮ੍ਰਿਤਸਰ ਪੁਲਿਸ ਦੀ ਇਹ ਕਾਰਵਾਈ ਸਾਬਤ ਕਰਦੀ ਹੈ ਕਿ ਜਦੋਂ ਸਰਕਾਰੀ ਨੀਤੀ, ਪੁਲਿਸ ਦੀ ਨਿਭਾਵ ਅਤੇ ਲੋਕਾਂ ਦਾ ਸਹਿਯੋਗ ਇੱਕ ਦਿਸ਼ਾ ਵਿੱਚ ਚਲਦਾ ਹੈ, ਤਾਂ ਨਸ਼ਿਆਂ ਵਰਗੀ ਗੰਭੀਰ ਸਮੱਸਿਆ ਵੀ ਘੱਟਣ ਤੇ ਮਜਬੂਰ ਹੋ ਜਾਂਦੀ ਹੈ। ਇਹ ਸਿਰਫ਼ ਅੰਕੜਿਆਂ ਦੀ ਕਾਮਯਾਬੀ ਨਹੀਂ, ਇਹ ਉਜੜੇ ਘਰਾਂ ਨੂੰ ਮੁੜ ਵਸਾਉਣ ਅਤੇ ਆਉਣ ਵਾਲੀ ਪੀੜੀ ਨੂੰ ਬਚਾਉਣ ਵੱਲ ਇੱਕ ਇਤਿਹਾਸਕ ਕਦਮ ਹੈ।

ਰਿਪੋਰਟ: ਵਿਕਰਮਜੀਤ ਸਿੰਘ, ਅੰਮ੍ਰਿਤਸਰ
ਕੈਮਰਾਮੈਨ: ਤਰਜਿੰਦਰ ਸਿੰਘ