ਹੁਸ਼ਿਆਰਪੁਰ ਜ਼ਿਲ੍ਹੇ ਦੇ ਪਿੰਡ ਹਰਮੋਇਆ ’ਚ ਰਹਿਣ ਵਾਲੀ ਵਿਧਵਾ ਬਿਮਲਾ ਦੇਵੀ ਦੇ ਘਰ ਨੂੰ ਬਿਜਲੀ ਮਹਿਕਮੇ ਵੱਲੋਂ ਬੇਹੱਦ ਵਧਿਆ ਬਿੱਲ ਭੇਜਿਆ ਗਿਆ। ਇਸ ਬਿੱਲ ਦੀ ਰਕਮ 68,840 ਰੁਪਏ ਹੈ, ਜੋ ਬਿਮਲਾ ਦੇਵੀ ਲਈ ਸਿਰਫ ਹੈਰਾਨੀ ਵਾਲੀ ਨਹੀਂ ਸਗੋਂ ਭਾਰੀ ਬੋਝ ਬਣ ਗਈ ਹੈ। ਘਰ ਵਿੱਚ ਸਿਰਫ ਇੱਕ ਪੱਖਾ ਅਤੇ ਦੋ ਲਾਈਟਾਂ ਚਲ ਰਹੀਆਂ ਹਨ।

ਮਾਮਲੇ ਸਬੰਧੀ ਜਾਣਕਾਰੀ ਦਿੰਦੇ ਹੋਏ ਬਿਮਲਾ ਦੇਵੀ ਨੇ ਕਿਹਾ ਕਿ 23 ਅਗਸਤ ਨੂੰ ਉਨ੍ਹਾਂ ਦਾ ਬਿੱਲ 64 ਹਜ਼ਾਰ ਦੇ ਕਰੀਬ ਆਇਆ ਸੀ। ਇਸ ਬਿੱਲ ਨੂੰ ਲੈ ਕੇ ਉਹ ਬਿਜਲੀ ਮਹਿਕਮੇ ਗਈਆਂ ਅਤੇ ਸ਼ਿਕਾਇਤ ਦਰਜ ਕਰਵਾਈ, ਪਰ ਅਜੇ ਤੱਕ ਉਨ੍ਹਾਂ ਨੂੰ ਕੋਈ ਸੰਤੋਸ਼ਜਨਕ ਜਵਾਬ ਨਹੀਂ ਮਿਲਿਆ। ਇੱਕ ਮਹੀਨੇ ਬਾਅਦ ਬਿਜਲੀ ਮੁਲਾਜ਼ਮ ਆਏ ਅਤੇ ਮੀਟਰ ਚੈੱਕ ਕਰਨ ਤੋਂ ਬਾਅਦ ਲੈ ਗਏ। ਮੀਟਰ ਦੇ ਕੰਪਨੀ ਵਿੱਚ ਭੇਜੇ ਜਾਣ ਤੋਂ ਬਾਅਦ ਬਿਜਲੀ ਮਹਿਕਮੇ ਵਾਲਿਆਂ ਨੇ ਪੁਸ਼ਟੀ ਕੀਤੀ ਕਿ ਮੀਟਰ ਸਹੀ ਹੈ, ਪਰ ਬਿੱਲ ਵਧਣ ਦਾ ਕਾਰਨ ਸਮਝਣਾ ਅਜੇ ਵੀ ਮੁਸ਼ਕਿਲ ਹੈ।

ਬਿਮਲਾ ਦੇਵੀ ਨੇ ਦੱਸਿਆ ਕਿ ਉਹ ਵਿਧਵਾ ਹੈ ਅਤੇ ਆਪਣੇ ਇਕ ਬੱਚੇ ਦੀ ਪੜ੍ਹਾਈ ਕਰ ਰਹੀ ਹੈ। ਉਸਦਾ ਪਤੀ 2007 ਵਿੱਚ ਮਰ ਗਿਆ ਸੀ। ਇਸ ਭਾਰੀ ਬਿੱਲ ਦੇ ਬੋਝ ਕਾਰਨ ਉਹ ਬਹੁਤ ਪਰੇਸ਼ਾਨ ਹੈ। ਉਸਦੇ ਪੁੱਤਰ ਨੇ ਕਿਹਾ ਕਿ ਉਹ ਕਾਲਜ ਤੋਂ ਛੁੱਟੀਆਂ ਲੈ ਕੇ ਬਿਜਲੀ ਮਹਿਕਮੇ ਦੇ ਚੱਕਰ ਲਗਾ ਚੁੱਕਾ ਹੈ, ਪਰ ਅਜੇ ਤੱਕ ਕੋਈ ਸਹੀ ਜਵਾਬ ਨਹੀਂ ਮਿਲਿਆ।

ਉਨ੍ਹਾਂ ਨੇ ਪੰਜਾਬ ਸਰਕਾਰ ਅਤੇ ਬਿਜਲੀ ਮਹਿਕਮੇ ਤੋਂ ਬੇਨਤੀ ਕੀਤੀ ਹੈ ਕਿ ਉਨ੍ਹਾਂ ਦਾ ਬਿੱਲ ਮੁਆਫ ਕੀਤਾ ਜਾਵੇ, ਕਿਉਂਕਿ ਉਹ ਇਸ ਰਕਮ ਦਾ ਭੁਗਤਾਨ ਕਰਨ ਵਿੱਚ ਸਮਰੱਥ ਨਹੀਂ ਹਨ। ਮਾਮਲਾ ਹੁਣ ਲੋਕਾਂ ਵਿੱਚ ਚਰਚਾ ਦਾ ਵਿਸ਼ਾ ਬਣ ਗਿਆ ਹੈ ਅਤੇ ਲੋਕ ਸਰਕਾਰ ਤੋਂ ਇਸ ਬਾਰੇ ਤੁਰੰਤ ਕਾਰਵਾਈ ਦੀ ਉਮੀਦ ਕਰ ਰਹੇ ਹਨ।