ਏਅਰ ਇੰਡੀਆ ਦਾ ਵੱਡਾ ਫੈਸਲਾ: ਛੋਟੀਆਂ ਉਡਾਣਾਂ 'ਚ ਭੋਜਨ ਵਿਕਲਪਿਕ, ਟਿਕਟਾਂ ਹੋਣਗੀਆਂ ਸਸਤੀਆਂ

ਮੱਧ ਪੂਰਬ ਵਿੱਚ ਵਧਦੇ ਤਣਾਅ ਦਾ ਅਸਰ ਹੁਣ ਹਵਾਬਾਜ਼ੀ ਖੇਤਰ 'ਤੇ ਵੀ ਸਪੱਸ਼ਟ ਹੋਣ ਲੱਗ ਪਿਆ ਹੈ। ਵਧ ਰਹੀਆਂ ਲਾਗਤਾਂ ਅਤੇ ਘਟਦੇ ਮਾਲੀਏ ਦੇ ਦਬਾਅ ਹੇਠ Air India ਨੇ ਯਾਤਰੀਆਂ ਲਈ ਨਵੇਂ ਕਦਮ ਚੁੱਕਣ ਦੀ ਤਿਆਰੀ ਕਰ ਲਈ ਹੈ।

ਮੀਡੀਆ ਰਿਪੋਰਟਾਂ ਮੁਤਾਬਕ, ਏਅਰ ਇੰਡੀਆ ਘਰੇਲੂ ਅਤੇ ਛੋਟੀ ਦੂਰੀ ਵਾਲੀਆਂ ਅੰਤਰਰਾਸ਼ਟਰੀ ਉਡਾਣਾਂ (2 ਘੰਟਿਆਂ ਤੋਂ ਘੱਟ) ਵਿੱਚ ਭੋਜਨ ਸੇਵਾ ਨੂੰ ਵਿਕਲਪਿਕ ਬਣਾਉਣ ਦੀ ਯੋਜਨਾ ਬਣਾ ਰਹੀ ਹੈ। ਇਸ ਕਦਮ ਨਾਲ ਯਾਤਰੀ ਆਪਣੀ ਲੋੜ ਮੁਤਾਬਕ ਸੇਵਾਵਾਂ ਚੁਣ ਸਕਣਗੇ ਅਤੇ ਖਰਚੇ 'ਚ ਕਮੀ ਆਵੇਗੀ।

ਸੂਤਰਾਂ ਅਨੁਸਾਰ, ਜੇਕਰ ਯਾਤਰੀ ਉਡਾਣ ਦੌਰਾਨ ਭੋਜਨ ਨਾ ਲੈਣ ਦੀ ਚੋਣ ਕਰਦੇ ਹਨ ਤਾਂ ਟਿਕਟਾਂ ਦੀ ਕੀਮਤ ਵਿੱਚ ਲਗਭਗ 250 ਰੁਪਏ ਜਾਂ ਇਸ ਤੋਂ ਵੱਧ ਦੀ ਕਟੌਤੀ ਹੋ ਸਕਦੀ ਹੈ। ਇਹ ਨਵੀਂ ਨੀਤੀ ਅਗਲੇ ਇੱਕ ਜਾਂ ਦੋ ਮਹੀਨਿਆਂ ਵਿੱਚ ਲਾਗੂ ਹੋ ਸਕਦੀ ਹੈ।

ਇਸ ਤੋਂ ਇਲਾਵਾ, ਏਅਰਲਾਈਨ ਬਿਜ਼ਨਸ ਕਲਾਸ ਵਿੱਚ ਵੀ ਬਦਲਾਅ ਕਰ ਸਕਦੀ ਹੈ। ਟਿਕਟਾਂ ਨਾਲ ਲਾਉਂਜ ਐਕਸੈਸ ਨੂੰ ਅਲੱਗ ਕਰਨ 'ਤੇ ਵਿਚਾਰ ਕੀਤਾ ਜਾ ਰਿਹਾ ਹੈ, ਜਿਸ ਨਾਲ ਉਹ ਯਾਤਰੀ ਜੋ ਲਾਉਂਜ ਦੀ ਵਰਤੋਂ ਨਹੀਂ ਕਰਦੇ, ਸਸਤੇ ਕਿਰਾਏ ਦਾ ਲਾਭ ਲੈ ਸਕਣ।

ਵਧੀਆਂ ਲਾਗਤਾਂ ਦੇ ਕਾਰਨ ਏਅਰ ਇੰਡੀਆ ਨੇ ਮਈ ਮਹੀਨੇ ਵਿੱਚ ਲਗਭਗ 150 ਅੰਤਰਰਾਸ਼ਟਰੀ ਉਡਾਣਾਂ ਦੀ ਗਿਣਤੀ ਘਟਾ ਦਿੱਤੀ ਹੈ। ਦਿੱਲੀ, ਮੁੰਬਈ ਅਤੇ ਅਹਿਮਦਾਬਾਦ ਤੋਂ ਅਮਰੀਕਾ, ਕੈਨੇਡਾ ਅਤੇ ਯੂਰਪ ਲਈ ਚੱਲਣ ਵਾਲੀਆਂ ਲੰਬੀ ਦੂਰੀ ਦੀਆਂ ਉਡਾਣਾਂ ਦੀ ਫ੍ਰਿਕਵੈਂਸੀ ਘਟਾਈ ਗਈ ਹੈ।

ਇਹ ਫੈਸਲੇ ਹਵਾਬਾਜ਼ੀ ਟਰਬਾਈਨ ਫਿਊਲ (ATF) ਦੀਆਂ ਵਧਦੀਆਂ ਕੀਮਤਾਂ ਅਤੇ ਡਾਲਰ ਦੇ ਮੁਕਾਬਲੇ ਰੁਪਏ ਦੀ ਕਮਜ਼ੋਰੀ ਕਾਰਨ ਲਏ ਜਾ ਰਹੇ ਹਨ, ਜਿਸ ਨਾਲ ਸੰਚਾਲਨ ਲਾਗਤ ਵਿੱਚ ਵੱਡਾ ਵਾਧਾ ਹੋਇਆ ਹੈ।

ਮਾਹਿਰਾਂ ਦਾ ਮੰਨਣਾ ਹੈ ਕਿ ਭਵਿੱਖ ਵਿੱਚ "ਫੁੱਲ-ਸਰਵਿਸ" ਅਤੇ "ਲੋ-ਕੋਸਟ" ਏਅਰਲਾਈਨਾਂ ਵਿਚਕਾਰ ਅੰਤਰ ਹੋਰ ਘੱਟ ਹੋ ਸਕਦਾ ਹੈ, ਜਿਵੇਂ ਕਿ IndiGo ਪਹਿਲਾਂ ਹੀ ਸੀਮਿਤ ਸੇਵਾਵਾਂ ਨਾਲ ਕੰਮ ਕਰ ਰਹੀ ਹੈ।