Sidhu Moosewala New Song ‘Eyes On Me’ Release: ਇੱਕ ਘੰਟੇ ’ਚ 11 ਲੱਖ ਵਿਊਜ਼, ਫਿਰ ਬਣਾਇਆ ਨਵਾਂ ਰਿਕਾਰਡ

ਮਰਹੂਮ ਪੰਜਾਬੀ ਗਾਇਕ ਸਿੱਧੂ ਮੂਸੇਵਾਲਾ ਇੱਕ ਵਾਰ ਫਿਰ ਆਪਣੇ ਨਵੇਂ posthumous ਗੀਤ ‘Eyes On Me’ ਨਾਲ ਦੁਨੀਆ ਭਰ ਦੇ ਪ੍ਰਸ਼ੰਸਕਾਂ ਦੇ ਦਿਲਾਂ ’ਤੇ ਛਾ ਗਏ ਹਨ। ਉਨ੍ਹਾਂ ਦੀ ਟੀਮ ਵੱਲੋਂ ਰਿਲੀਜ਼ ਕੀਤਾ ਗਿਆ ਇਹ ਨਵਾਂ ਗੀਤ ਸੋਸ਼ਲ ਮੀਡੀਆ ਅਤੇ ਯੂਟਿਊਬ ’ਤੇ ਆਉਂਦੇ ਹੀ ਵਾਇਰਲ ਹੋ ਗਿਆ। ਰਿਲੀਜ਼ ਤੋਂ ਸਿਰਫ ਇਕ ਘੰਟੇ ਦੇ ਅੰਦਰ ਹੀ ਗੀਤ ਨੂੰ 11 ਲੱਖ ਤੋਂ ਵੱਧ ਵਿਊਜ਼ ਮਿਲੇ, ਜਦਕਿ ਲੱਖਾਂ ਲੋਕਾਂ ਨੇ ਇਸ ’ਤੇ ਰਿਐਕਟ ਕੀਤਾ ਅਤੇ ਕੁਮੈਂਟ ਕਰਕੇ ਆਪਣਾ ਪਿਆਰ ਜਤਾਇਆ।

ਇਹ ਗੀਤ ਸਿੱਧੂ ਮੂਸੇਵਾਲਾ ਦਾ 13ਵਾਂ ਮੌਤ ਤੋਂ ਬਾਅਦ ਰਿਲੀਜ਼ ਹੋਇਆ ਗੀਤ ਹੈ, ਜਿਸ ਨੇ ਰਿਲੀਜ਼ ਦੇ ਨਾਲ ਹੀ ਨਵੇਂ ਰਿਕਾਰਡ ਬਣਾਉਣੇ ਸ਼ੁਰੂ ਕਰ ਦਿੱਤੇ। ਇਸ ਤੋਂ ਪਹਿਲਾਂ ਰਿਲੀਜ਼ ਹੋਏ ‘ਬਰੋਟਾ’ ਨੇ ਵੀ ਦੁਨੀਆ ਭਰ ਵਿੱਚ ਵੱਡਾ ਇਤਿਹਾਸ ਰਚਿਆ ਸੀ ਅਤੇ ਹੁਣ ‘Eyes On Me’ ਵੀ ਉਸੇ ਰਾਹ ’ਤੇ ਅੱਗੇ ਵਧਦਾ ਦਿਖਾਈ ਦੇ ਰਿਹਾ ਹੈ।

ਗੀਤ ਦਾ ਟੀਜ਼ਰ ਤਿੰਨ ਦਿਨ ਪਹਿਲਾਂ ਹੀ ਜਾਰੀ ਕੀਤਾ ਗਿਆ ਸੀ, ਜਿਸ ਨੂੰ ਇੰਸਟਾਗ੍ਰਾਮ ’ਤੇ 14 ਲੱਖ ਤੋਂ ਵੱਧ ਲਾਈਕਸ ਅਤੇ ਯੂਟਿਊਬ ’ਤੇ 31 ਲੱਖ ਤੋਂ ਵੱਧ ਵਿਊਜ਼ ਮਿਲੇ ਸਨ। ਯੂਟਿਊਬ ਪ੍ਰੀਮੀਅਰ ਦੌਰਾਨ ਕਰੀਬ 1.6 ਲੱਖ ਲੋਕ ਲਾਈਵ ਜੁੜੇ, ਜੋ ਸਿੱਧੂ ਦੀ ਅੱਜ ਵੀ ਬੇਹੱਦ ਮਜ਼ਬੂਤ ਫੈਨ ਫਾਲੋਇੰਗ ਨੂੰ ਦਰਸਾਉਂਦਾ ਹੈ।

2 ਮਿੰਟ 50 ਸਕਿੰਟ ਦੀ ਇਸ ਵੀਡੀਓ ਵਿੱਚ ਕਈ ਡਰਾਮੇਟਿਕ ਅਤੇ ਭਾਵੁਕ ਦ੍ਰਿਸ਼ ਹਨ। ਵੀਡੀਓ ਵਿੱਚ ਮੀਂਹ, G-Wagon, ਚੀਤਾ, ਨਕਾਬਪੋਸ਼ ਕਿਰਦਾਰ ਅਤੇ ਐਕਸ਼ਨ ਸੀਨ ਦਿਖਾਏ ਗਏ ਹਨ, ਜੋ ਗੀਤ ਨੂੰ ਇੱਕ ਵੱਖਰਾ ਸਿਨੇਮੈਟਿਕ ਟੱਚ ਦਿੰਦੇ ਹਨ। ਗੀਤ ਦੇ ਬੋਲ ਡਰ, ਧੋਖੇ, ਹਿੰਸਾ ਅਤੇ ਜ਼ਿੰਦਗੀ ਦੇ ਕਠੋਰ ਸੱਚਾਂ ਨੂੰ ਦਰਸਾਉਂਦੇ ਹਨ, ਜਿਸ ਨਾਲ ਇਹ ਪ੍ਰਸ਼ੰਸਕਾਂ ਲਈ ਹੋਰ ਵੀ ਪ੍ਰਭਾਵਸ਼ਾਲੀ ਬਣਦਾ ਹੈ।

ਵੀਡੀਓ ਦੇ ਅੰਤ ਵਿੱਚ ਇੱਕ ਭਾਵੁਕ ਪਲ ਵੀ ਦਿਖਾਇਆ ਗਿਆ ਹੈ, ਜਿੱਥੇ ਸਿੱਧੂ ਮੂਸੇਵਾਲਾ ਆਪਣੀ ਹਵੇਲੀ ਤੋਂ ਆਪਣੀ ਆਖਰੀ ਸਵਾਰੀ ਲਈ ਨਿਕਲਦੇ ਦਿਖਾਈ ਦਿੰਦੇ ਹਨ ਅਤੇ ਉਨ੍ਹਾਂ ਦੇ ਪਿਤਾ ਬਲਕੌਰ ਸਿੰਘ ਉਨ੍ਹਾਂ ਨੂੰ ਵਿਦਾ ਕਰਦੇ ਨਜ਼ਰ ਆਉਂਦੇ ਹਨ। ਇਸ ਦ੍ਰਿਸ਼ ਨੇ ਪ੍ਰਸ਼ੰਸਕਾਂ ਨੂੰ ਭਾਵੁਕ ਕਰ ਦਿੱਤਾ।

ਗੀਤ ਦੇ ਅੰਤ ਵਿੱਚ ਇਹ ਵੀ ਖੁਲਾਸਾ ਕੀਤਾ ਗਿਆ ਕਿ ਸਿੱਧੂ ਮੂਸੇਵਾਲਾ ਦਾ ਆਪਣਾ Clothing Brand ਵੀ ਜਲਦ ਲਾਂਚ ਹੋਵੇਗਾ। ਇਸਦੇ ਨਾਲ ਹੀ ‘Signed to God World Tour’ ਦਾ ਵੀ ਐਲਾਨ ਹੋਇਆ ਹੈ, ਜਿਸ ਵਿੱਚ ਹੋਲੋਗ੍ਰਾਮ ਤਕਨੀਕ ਰਾਹੀਂ ਸਿੱਧੂ ਦੀ ਸਟੇਜ ਮੌਜੂਦਗੀ ਨੂੰ ਦੁਬਾਰਾ ਜ਼ਿੰਦਾ ਕੀਤਾ ਜਾਵੇਗਾ।

ਸਿੱਧੂ ਮੂਸੇਵਾਲਾ ਦੀ ਮੌਤ ਤੋਂ ਬਾਅਦ ਵੀ ਉਨ੍ਹਾਂ ਦੀ ਲੋਕਪ੍ਰਿਯਤਾ ਲਗਾਤਾਰ ਵੱਧ ਰਹੀ ਹੈ। ‘Eyes On Me’ ਨੇ ਇੱਕ ਵਾਰ ਫਿਰ ਸਾਬਤ ਕਰ ਦਿੱਤਾ ਕਿ ਸਿੱਧੂ ਸਿਰਫ ਇੱਕ ਗਾਇਕ ਨਹੀਂ, ਸਗੋਂ ਇੱਕ ਅਹਿਸਾਸ ਹਨ ਜੋ ਆਪਣੇ ਗੀਤਾਂ ਰਾਹੀਂ ਹਮੇਸ਼ਾਂ ਜ਼ਿੰਦਾ ਰਹਿਣਗੇ।