ਮੋਬਾਈਲ ‘ਤੇ ਆਵੇ ਬੀਪ ਅਲਰਟ? ਨਾ ਘਬਰਾਓ—NDMA ਦੀ ਦੇਸ਼-ਪੱਧਰੀ ਮੌਕ ਡ੍ਰਿੱਲ

ਜੇ ਤੁਹਾਡੇ ਮੋਬਾਈਲ ਫੋਨ ‘ਤੇ ਅਚਾਨਕ ਬੀਪ ਦੀ ਆਵਾਜ਼ ਜਾਂ ਵਾਈਬ੍ਰੇਸ਼ਨ ਮਹਿਸੂਸ ਹੁੰਦੀ ਹੈ ਤਾਂ ਘਬਰਾਉਣ ਦੀ ਲੋੜ ਨਹੀਂ। ਇਹ ਦਰਅਸਲ ਭਾਰਤ ਦੀ ਰਾਸ਼ਟਰੀ ਆਫ਼ਤ ਪ੍ਰਬੰਧਨ ਅਥਾਰਟੀ (NDMA) ਵੱਲੋਂ ਕੀਤੀ ਜਾ ਰਹੀ ਇੱਕ ਦੇਸ਼-ਪੱਧਰੀ ਐਮਰਜੈਂਸੀ ਅਲਰਟ ਸਿਸਟਮ ਦੀ ਟੈਸਟਿੰਗ ਦਾ ਹਿੱਸਾ ਹੈ।

NDMA 2 ਮਈ 2026 ਨੂੰ ਸੈੱਲ ਬ੍ਰੌਡਕਾਸਟ ਅਲਰਟ ਸਿਸਟਮ ਦੀ ਜਾਂਚ ਕਰ ਰਹੀ ਹੈ, ਜਿਸਦਾ ਮਕਸਦ ਦੇਸ਼ ਦੇ ਐਮਰਜੈਂਸੀ ਸੰਚਾਰ ਬੁਨਿਆਦੀ ਢਾਂਚੇ ਨੂੰ ਹੋਰ ਮਜ਼ਬੂਤ ਬਣਾਉਣਾ ਹੈ। ਇਸ ਮੌਕ ਡ੍ਰਿੱਲ ਦੌਰਾਨ ਲੋਕਾਂ ਦੇ ਮੋਬਾਈਲ ਫੋਨਾਂ ‘ਤੇ ਉੱਚੀ ਬੀਪ ਦੀ ਆਵਾਜ਼ ਜਾਂ ਵਾਈਬ੍ਰੇਸ਼ਨ ਨਾਲ ਐਮਰਜੈਂਸੀ ਸੂਚਨਾ ਮਿਲ ਸਕਦੀ ਹੈ।

ਅਧਿਕਾਰੀਆਂ ਵੱਲੋਂ ਸਪੱਸ਼ਟ ਕੀਤਾ ਗਿਆ ਹੈ ਕਿ ਇਹ ਸਿਰਫ ਇੱਕ ਟੈਸਟ ਸੁਨੇਹਾ ਹੈ ਅਤੇ ਇਸਦਾ ਕਿਸੇ ਅਸਲ ਐਮਰਜੈਂਸੀ ਨਾਲ ਕੋਈ ਸੰਬੰਧ ਨਹੀਂ। ਇਸ ਲਈ ਨਾਗਰਿਕਾਂ ਨੂੰ ਅਪੀਲ ਕੀਤੀ ਗਈ ਹੈ ਕਿ ਉਹ ਸ਼ਾਂਤ ਰਹਿਣ ਅਤੇ ਕਿਸੇ ਵੀ ਤਰ੍ਹਾਂ ਦੀ ਅਫ਼ਵਾਹ ‘ਤੇ ਧਿਆਨ ਨਾ ਦੇਣ।

ਇਹ ਟੈਸਟ ਪੰਜਾਬ ਸਮੇਤ ਦੇਸ਼ ਦੇ ਵੱਖ-ਵੱਖ ਰਾਜਾਂ ਅਤੇ ਕੇਂਦਰ ਸ਼ਾਸਤ ਪ੍ਰਦੇਸ਼ਾਂ ਵਿੱਚ ਕੀਤਾ ਜਾ ਰਿਹਾ ਹੈ, ਹਾਲਾਂਕਿ ਕੁਝ ਸਰਹੱਦੀ ਖੇਤਰਾਂ ਅਤੇ ਚੋਣਾਂ ਵਾਲੇ ਇਲਾਕਿਆਂ ਨੂੰ ਇਸ ਤੋਂ ਬਾਹਰ ਰੱਖਿਆ ਗਿਆ ਹੈ।