Baisakhi Bumper 2026 Lottery: ਸੇਵਾਮੁਕਤ ਮੁਲਾਜ਼ਮ ਓਮ ਪ੍ਰਕਾਸ਼ ਦੀ ਨਿਕਲੀ 6 ਕਰੋੜ ਦੀ ਲਾਟਰੀ, ਲੁਧਿਆਣਾ ਤੋਂ ਖਰੀਦੀ ਟਿਕਟ ਬਣੀ ਕਿਸਮਤ

Baisakhi Bumper 2026 Lottery: ਪੰਜਾਬ ਸਟੇਟ ਵਿਸਾਖੀ ਬੰਪਰ 2026 ਦਾ ਪਹਿਲਾ ਇਨਾਮ ਇਸ ਵਾਰ ਦਿੱਲੀ ਦੇ ਸੇਵਾਮੁਕਤ ਮੁਲਾਜ਼ਮ ਓਮ ਪ੍ਰਕਾਸ਼ ਦੇ ਨਾਮ ਰਿਹਾ ਹੈ, ਜਿਨ੍ਹਾਂ ਨੇ 6 ਕਰੋੜ ਰੁਪਏ ਦੀ ਵੱਡੀ ਰਕਮ ਜਿੱਤੀ ਹੈ। ਇਸ ਜਿੱਤ ਨਾਲ ਓਮ ਪ੍ਰਕਾਸ਼ ਅਤੇ ਉਨ੍ਹਾਂ ਦੇ ਪਰਿਵਾਰ ਵਿੱਚ ਖੁਸ਼ੀ ਦੀ ਲਹਿਰ ਦੌੜ ਗਈ ਹੈ ਅਤੇ ਲੁਧਿਆਣਾ ਵਿੱਚ ਵੀ ਉਨ੍ਹਾਂ ਦਾ ਢੋਲ-ਨਗਾਰਿਆਂ ਨਾਲ ਸਵਾਗਤ ਕੀਤਾ ਗਿਆ।

ਜਾਣਕਾਰੀ ਮੁਤਾਬਕ, ਇਹ ਖੁਸ਼ਕਿਸਮਤ ਟਿਕਟ ਲੁਧਿਆਣਾ ਦੇ ਘੰਟਾ ਘਰ ਇਲਾਕੇ ਵਿੱਚ ਸਥਿਤ ਗਾਂਧੀ ਬ੍ਰਦਰ ਸਟੋਰ ਤੋਂ ਖਰੀਦੀ ਗਈ ਸੀ। ਜਿੱਤਣ ਵਾਲਾ ਟਿਕਟ ਨੰਬਰ B520729 ਹੈ, ਜਿਸਨੇ ਇਸ ਵਾਰ ਦਾ ਵੱਡਾ ਇਨਾਮ ਆਪਣੇ ਨਾਮ ਕੀਤਾ।

ਓਮ ਪ੍ਰਕਾਸ਼ ਨੇ ਦੱਸਿਆ ਕਿ ਉਹ ਪਿਛਲੇ ਕਰੀਬ 30 ਸਾਲਾਂ ਤੋਂ ਲਾਟਰੀ ਖਰੀਦਦੇ ਆ ਰਹੇ ਹਨ। ਜਦੋਂ ਵੀ ਉਹ ਲੁਧਿਆਣਾ ਵਿੱਚ ਆਪਣੇ ਰਿਸ਼ਤੇਦਾਰਾਂ ਨੂੰ ਮਿਲਣ ਆਉਂਦੇ ਸਨ, ਉਹ ਲਾਟਰੀ ਦੀ ਟਿਕਟ ਜਰੂਰ ਖਰੀਦਦੇ ਸਨ। ਇਸ ਤੋਂ ਪਹਿਲਾਂ ਵੀ ਉਨ੍ਹਾਂ ਨੂੰ ਛੋਟੇ-ਮੋਟੇ ਇਨਾਮ ਮਿਲੇ ਸਨ, ਪਰ ਇਸ ਵਾਰ ਕਿਸਮਤ ਨੇ ਵੱਡਾ ਸਾਥ ਦਿੱਤਾ ਅਤੇ ਉਹ ਕਰੋੜਪਤੀ ਬਣ ਗਏ।

ਉਨ੍ਹਾਂ ਨੇ ਆਪਣੀ ਖੁਸ਼ੀ ਸਾਂਝੀ ਕਰਦਿਆਂ ਕਿਹਾ ਕਿ ਇਹ ਰਕਮ ਉਹ ਨੇਕ ਕੰਮਾਂ ਵਿੱਚ ਲਗਾਉਣਗੇ ਅਤੇ ਸਮਾਜ ਦੀ ਭਲਾਈ ਲਈ ਵਰਤਣਗੇ। ਉਨ੍ਹਾਂ ਦੇ ਪਰਿਵਾਰਕ ਮੈਂਬਰਾਂ ਨੇ ਵੀ ਇਸ ਜਿੱਤ ਨੂੰ ਰੱਬ ਦੀ ਮੇਹਰ ਦੱਸਿਆ।

ਦੂਜੇ ਪਾਸੇ, ਗਾਂਧੀ ਬ੍ਰਦਰ ਸਟੋਰ ਦੇ ਮਾਲਕ ਤਰਨਪ੍ਰੀਤ ਗਾਂਧੀ ਨੇ ਵੀ ਖੁਸ਼ੀ ਜ਼ਾਹਰ ਕਰਦਿਆਂ ਕਿਹਾ ਕਿ ਇਹ ਉਨ੍ਹਾਂ ਲਈ ਮਾਣ ਦੀ ਗੱਲ ਹੈ ਕਿ ਉਨ੍ਹਾਂ ਦੇ ਸਟੋਰ ਤੋਂ ਖਰੀਦੀ ਗਈ ਟਿਕਟ ਨੇ ਇੱਕ ਹੋਰ ਵਿਅਕਤੀ ਨੂੰ ਕਰੋੜਪਤੀ ਬਣਾਇਆ ਹੈ। ਉਨ੍ਹਾਂ ਮੁਤਾਬਕ, ਇਸ ਤੋਂ ਪਹਿਲਾਂ ਵੀ ਉਨ੍ਹਾਂ ਦੇ ਸਟੋਰ ਤੋਂ ਕਈ ਵੱਡੇ ਇਨਾਮ ਜਿੱਤੇ ਜਾ ਚੁੱਕੇ ਹਨ।

ਇਹ ਜਿੱਤ ਸਿਰਫ਼ ਓਮ ਪ੍ਰਕਾਸ਼ ਲਈ ਹੀ ਨਹੀਂ, ਸਗੋਂ ਲਾਟਰੀ ਖਰੀਦਣ ਵਾਲੇ ਹੋਰ ਲੋਕਾਂ ਲਈ ਵੀ ਉਮੀਦ ਦੀ ਇੱਕ ਨਵੀਂ ਕਿਰਨ ਬਣ ਕੇ ਸਾਹਮਣੇ ਆਈ ਹੈ।