ਸਰਕਾਰੀ ਬੈਂਕ ਯੂਨੀਅਨ ਬੈਂਕ ਆਫ ਇੰਡੀਆ ਵਿੱਚ ਇੱਕ ਗੰਭੀਰ ਧੋਖਾਧੜੀ ਮਾਮਲੇ ਦੀ ਜਾਂਚ ਸ਼ੁਰੂ ਹੋ ਚੁੱਕੀ ਹੈ, ਜਿਸ ਵਿੱਚ ਉਦਯੋਗਪਤੀ ਅਨਿਲ ਅੰਬਾਨੀ ਦੇ ਪੁੱਤਰ ਜੈ ਅਨਮੋਲ ਅਨਿਲ ਅੰਬਾਨੀ ਅਤੇ ਰਿਲਾਇੰਸ ਹੋਮ ਫਾਈਨਾਂਸ ਲਿਮਟਿਡ ਦਾ ਨਾਮ ਸਾਹਮਣੇ ਆਇਆ ਹੈ। ਬੈਂਕ ਦੀ ਸ਼ਿਕਾਇਤ ਦੇ ਆਧਾਰ ’ਤੇ ਦੋਸ਼ੀਆਂ ਦੇ ਖ਼ਿਲਾਫ਼ ਮਾਮਲਾ ਦਰਜ ਕੀਤਾ ਗਿਆ ਹੈ, ਕਿਉਂਕਿ ਕਰਜ਼ੇ ਦੀ ਰਕਮ ਨਿਰਧਾਰਤ ਉਦੇਸ਼ ਲਈ ਵਰਤੀ ਨਾ ਗਈ ਅਤੇ ਇਸਨੂੰ ਹੋਰ ਮਕਸਦ ਲਈ ਮੋੜ ਦਿੱਤਾ ਗਿਆ।

ਜਾਣਕਾਰੀ ਮੁਤਾਬਕ, ਰਿਲਾਇੰਸ ਹੋਮ ਫਾਈਨਾਂਸ ਲਿਮਟਿਡ ਨੇ ਬੈਂਕ ਦੀ ਮੁੰਬਈ ਸਥਿਤ ਸ਼ਾਖਾ ਤੋਂ 450 ਕਰੋੜ ਰੁਪਏ ਦੀ ਕ੍ਰੈਡਿਟ ਲਿਮਟ ਲਈ ਸੀ। ਇਹ ਰਕਮ ਕਾਰੋਬਾਰੀ ਜ਼ਰੂਰਤਾਂ ਲਈ ਮਨਜ਼ੂਰ ਕੀਤੀ ਗਈ ਸੀ ਅਤੇ ਬੈਂਕ ਨੇ ਸ਼ਰਤ ਰੱਖੀ ਸੀ ਕਿ ਕੰਪਨੀ ਸਮੇਂ ਸਿਰ ਕਿਸ਼ਤਾਂ ਦੀ ਅਦਾਇਗੀ ਕਰੇਗੀ, ਵਿਆਜ ਅਤੇ ਹੋਰ ਖਰਚਿਆਂ ਦੀ ਪੂਰੀ ਸੇਵਾ ਕਰੇਗੀ ਅਤੇ ਵਿਕਰੀ ਤੋਂ ਹੋਈ ਸਾਰੀ ਆਮਦਨ ਬੈਂਕ ਖਾਤੇ ਰਾਹੀਂ ਹੀ ਜਾਵੇਗੀ।

ਪਰ ਜਾਂਚ ਵਿੱਚ ਸਾਹਮਣੇ ਆਇਆ ਕਿ ਕੰਪਨੀ ਨੇ ਇਸ ਵਿੱਤੀ ਅਨੁਸ਼ਾਸਨ ਦੀ ਪਾਲਣਾ ਨਹੀਂ ਕੀਤੀ। ਕੰਪਨੀ ਵੱਲੋਂ ਕਿਸ਼ਤਾਂ ਦਾ ਭੁਗਤਾਨ ਨਹੀਂ ਕੀਤਾ ਗਿਆ, ਜਿਸ ਕਾਰਨ 30 ਸਤੰਬਰ 2019 ਨੂੰ ਇਸ ਖਾਤੇ ਨੂੰ ਗੈਰ-ਕਾਰਗੁਜ਼ਾਰ ਸੰਪੱਤੀ (NPA) ਵਜੋਂ ਘੋਸ਼ਿਤ ਕਰ ਦਿੱਤਾ ਗਿਆ।

ਆਗੇ ਜਾਂਚ ਲਈ ਇੱਕ ਫੋਰੈਂਸਿਕ ਆਡੀਟ ਕਰਵਾਇਆ ਗਿਆ, ਜਿਸ ਵਿੱਚ 1 ਅਪ੍ਰੈਲ 2016 ਤੋਂ 30 ਜੂਨ 2019 ਤੱਕ ਦੇ ਖਾਤਿਆਂ ਦੀ ਗਹਿਰਾਈ ਨਾਲ ਜਾਂਚ ਹੋਈ। ਇਸ ਜਾਂਚ ਵਿੱਚ ਖੁਲਾਸਾ ਹੋਇਆ ਕਿ ਕਰਜ਼ੇ ਦੀ ਰਕਮ ਨੂੰ ਕਾਰੋਬਾਰ ਦੇ ਅਸਲੀ ਕੰਮ ਲਈ ਵਰਤਣ ਦੀ ਬਜਾਏ ਹੋਰ ਥਾਵਾਂ ‘ਤੇ ਭੇਜਿਆ ਗਿਆ ਸੀ। ਇਸਨੂੰ ਫੰਡਾਂ ਦੀ ਗਲਤ ਵੰਡ ਅਤੇ ਗਬਨ ਮੰਨਿਆ ਗਿਆ।

ਬੈਂਕ ਵੱਲੋਂ ਲਗਾਏ ਦੋਸ਼ਾਂ ਵਿੱਚ ਕਿਹਾ ਗਿਆ ਕਿ ਕੰਪਨੀ ਦੇ ਉਸ ਸਮੇਂ ਦੇ ਪ੍ਰਮੋਟਰਾਂ ਅਤੇ ਡਾਇਰੈਕਟਰਾਂ ਨੇ ਰਿਕਾਰਡਾਂ ਨਾਲ ਹੇਰਾਫੇਰੀ ਕੀਤੀ, ਫੰਡਾਂ ਦਾ ਦੁਰਵਰਤੋਂ ਕੀਤਾ ਅਤੇ ਕਰਜ਼ੇ ਦੀ ਰਕਮ ਨੂੰ ਉਹਨਾਂ ਉਦੇਸ਼ਾਂ ਤੋਂ ਇਲਾਵਾ ਹੋਰ ਥਾਵਾਂ ਲਈ ਮੋੜ ਦਿੱਤਾ, ਜਿਨ੍ਹਾਂ ਲਈ ਇਹ ਰਕਮ ਦਿੱਤੀ ਗਈ ਸੀ। ਵਿੱਤੀ ਗੜਬੜਾਂ ਅਤੇ ਹੇਰਾਫੇਰੀ ਕਾਰਨ ਸਰਕਾਰੀ ਬੈਂਕ ਨੂੰ ਲੱਗਭਗ 228 ਕਰੋੜ ਰੁਪਏ ਦਾ ਭਾਰੀ ਨੁਕਸਾਨ ਹੋਇਆ।

ਹੁਣ ਸਾਰੇ ਮਾਮਲੇ ਦੀ ਗਹਿਰਾਈ ਨਾਲ ਜਾਂਚ ਕੀਤੀ ਜਾ ਰਹੀ ਹੈ ਅਤੇ ਜੁੜੇ ਹੋਏ ਵਿਅਕਤੀਆਂ ਤੋਂ ਜਵਾਬ ਤਲਬ ਕੀਤੇ ਜਾ ਰਹੇ ਹਨ। ਇਹ ਮਾਮਲਾ ਵਿੱਤੀ ਖੇਤਰ ਵਿੱਚ ਇੱਕ ਵੱਡਾ ਝਟਕਾ ਮੰਨਿਆ ਜਾ ਰਿਹਾ ਹੈ, ਕਿਉਂਕਿ ਇਸ ਨੇ ਬੈਂਕ ਦੇ ਸਿਸਟਮ ‘ਤੇ ਸੰਭਾਵਿਤ ਖਤਰੇ ਬਾਰੇ ਸਵਾਲ ਖੜ੍ਹੇ ਕਰ ਦਿੱਤੇ ਹਨ।