ਗੋਆ ਦੇ ਅਰਪੋਰਾ ਇਲਾਕੇ ਵਿੱਚ ਅੱਧੀ ਰਾਤ ਵਾਪਰੀ ਭਿਆਨਕ ਅੱਗ ਨੇ ਨਾਈਟ ਕਲੱਬ ਨੂੰ ਕੁਝ ਮਿੰਟਾਂ ਵਿੱਚ ਮੌਤ ਦੇ ਜਾਲ ਵਿੱਚ ਬਦਲ ਦਿੱਤਾ। ਇਸ ਹਾਦਸੇ ਵਿੱਚ ਪੰਜ ਸੈਲਾਨੀਆਂ ਸਮੇਤ ਕੁੱਲ 25 ਲੋਕਾਂ ਦੀ ਦਰਦਨਾਕ ਮੌਤ ਹੋ ਗਈ। ਕਲੱਬ ਅੰਦਰ ਮੌਜੂਦ ਭੀੜ ਵਿੱਚ ਹਾਹਾਕਾਰ ਮਚ ਗਿਆ, ਅਤੇ ਦਮਘੁੱਟੂ ਧੂੰਏ ਨੇ ਬਚਾਅ ਦੇ ਰਾਹ ਬੰਦ ਕਰ ਦਿੱਤੇ।

ਪੁਲਿਸ ਨੇ ਤੁਰੰਤ ਵੱਡੀ ਕਾਰਵਾਈ ਕਰਦਿਆਂ ਕਲੱਬ ਦੇ ਜਨਰਲ ਮੈਨੇਜਰ ਰਾਜੀਵ ਮੋਡਕ, ਵਿਵੇਕ ਸਿੰਘ, ਬਾਰ ਮੈਨੇਜਰ ਰਾਜੀਵ ਸਿੰਘਾਨੀਆ ਅਤੇ ਗੇਟ ਮੈਨੇਜਰ ਰਿਆਂਸ਼ੂ ਠਾਕੁਰ ਨੂੰ ਗ੍ਰਿਫ਼ਤਾਰ ਕਰ ਲਿਆ। ਕਲੱਬ ਮਾਲਕਾਂ ਸੌਰਭ ਲੂਥਰਾ, ਗੌਰਵ ਲੂਥਰਾ ਅਤੇ ਪ੍ਰੋਗਰਾਮ ਪ੍ਰਬੰਧਕ ਵਿਰੁੱਧ ਐਫਆਈਆਰ ਦਰਜ ਕੀਤੀ ਗਈ ਹੈ।

ਜਾਂਚ ਦੀ ਲਪੇਟ ਅਰਪੋਰਾ ਨਾਓ ਪੰਚਾਇਤ ਤੱਕ ਵੀ ਪਹੁੰਚੀ ਹੈ। ਪੰਚਾਇਤ ਦੇ ਤਤਕਾਲੀ ਸਰਪੰਚ ਨੂੰ 2023 ਵਿੱਚ ਕਥਿਤ ਤੌਰ ’ਤੇ ਗਲਤ ਵਪਾਰ ਲਾਇਸੈਂਸ ਜਾਰੀ ਕਰਨ ਦੇ ਦੋਸ਼ਾਂ ’ਤੇ ਹਿਰਾਸਤ ਵਿੱਚ ਲਿਆ ਗਿਆ। ਇਸਦੇ ਨਾਲ ਹੀ ਤਿੰਨ ਸਰਕਾਰੀ ਅਧਿਕਾਰੀ ਵੀ ਮੁਅੱਤਲ ਹੋ ਚੁੱਕੇ ਹਨ।

ਮੌਕੇ ’ਤੇ ਪਹੁੰਚੀ ਫਾਇਰ ਬ੍ਰਿਗੇਡ ਨੇ ਦੱਸਿਆ ਕਿ ਕਲੱਬ ਦੇ ਬਾਹਰ ਤੰਗ ਗਲੀਆਂ ਕਾਰਨ ਫਾਇਰ ਟੈਂਡਰਾਂ ਨੂੰ ਅੰਦਰ ਜਾਣ ਵਿੱਚ ਵੱਡੀ ਮੁਸ਼ਕਲ ਆਈ। ਪਾਣੀ ਦੇ ਟੈਂਕਰਾਂ ਨੂੰ ਵੀ 400 ਮੀਟਰ ਦੂਰ ਖੜ੍ਹਾ ਕਰਨਾ ਪਿਆ, ਜਿਸ ਕਾਰਨ ਅੱਗ ’ਤੇ ਕਾਬੂ ਪਾਉਣਾ ਔਖਾ ਹੋ ਗਿਆ। ਜਾਂਚ ਮੁਤਾਬਕ ਜ਼ਿਆਦਾਤਰ ਮੌਤਾਂ ਦਮ ਘੁੱਟਣ ਕਾਰਨ ਹੋਈਆਂ, ਕਿਉਂਕਿ ਲੋਕ ਜ਼ਮੀਨੀ ਮੰਜ਼ਿਲ ਅਤੇ ਰਸੋਈ ਵਾਲੇ ਹਿੱਸਿਆਂ ਵਿੱਚ ਫਸੇ ਹੋਏ ਸਨ।

ਪਹਿਲੀ ਜਾਂਚ ਤੋਂ ਇਹ ਵੀ ਸਾਫ਼ ਹੋਇਆ ਹੈ ਕਿ ਕਲੱਬ ਨੇ ਕਈ ਅਹਿਮ ਅੱਗ ਸੁਰੱਖਿਆ ਨਿਯਮਾਂ ਦੀ ਪਾਲਣਾ ਨਹੀਂ ਕੀਤੀ ਸੀ। ਰਾਹਤ ਟੀਮਾਂ ਅਤੇ ਪੁਲਿਸ ਨੇ ਸਾਰੇ ਪਹਿਲੂਆਂ ਦੀ ਜਾਂਚ ਸ਼ੁਰੂ ਕਰ ਦਿੱਤੀ ਹੈ, ਅਤੇ ਮਾਮਲੇ ਦੀ ਅੰਤਿਮ ਰਿਪੋਰਟ ਜਲਦੀ ਜਾਰੀ ਹੋਣ ਦੀ ਸੰਭਾਵਨਾ ਹੈ।