Cannes Film Festival 2026: ਭਾਰਤੀ ਵਿਦਿਆਰਥਣ ਦੀ ਪੰਜਾਬੀ ਲਘੂ ਫਿਲਮ ‘Shadows of the Moonless Nights’ ਦੀ ‘La Cinef’ ਸੈਕਸ਼ਨ ਲਈ ਚੋਣ

ਭਾਰਤ ਲਈ ਮਾਣ ਵਾਲੀ ਖ਼ਬਰ ਸਾਹਮਣੇ ਆਈ ਹੈ। Cannes Film Festival 2026 ਲਈ ਫਿਲਮ ਐਂਡ ਟੈਲੀਵਿਜ਼ਨ ਇੰਸਟੀਚਿਊਟ ਆਫ ਇੰਡੀਆ (FTII) ਦੀ ਵਿਦਿਆਰਥਣ ਮੇਹਰ ਮਲਹੋਤਰਾ ਦੀ ਲਘੂ ਫਿਲਮ ‘ਪਰਛਾਵੇਂ ਮੱਸਿਆ ਰਾਤਾਂ ਦੇ’ (Shadows of the Moonless Nights) ਦੀ ਚੋਣ ਕੀਤੀ ਗਈ ਹੈ। ਇਹ ਫਿਲਮ ਕਾਨਸ ਦੇ ਪ੍ਰਸਿੱਧ ‘La Cinef’ ਮੁਕਾਬਲੇ ਵਾਲੇ ਸੈਕਸ਼ਨ ਵਿੱਚ ਸ਼ਾਮਲ ਕੀਤੀ ਗਈ ਹੈ।

ਇਹ 24 ਮਿੰਟ ਦੀ ਲਘੂ ਫਿਲਮ ਦੁਨੀਆ ਭਰ ਦੀਆਂ ਚੁਣੀ ਗਈਆਂ 14 ਲਾਈਵ-ਐਕਸ਼ਨ ਅਤੇ 5 ਐਨੀਮੇਟਡ ਫਿਲਮਾਂ ਵਿੱਚ ਆਪਣੀ ਜਗ੍ਹਾ ਬਣਾਉਣ ਵਿੱਚ ਕਾਮਯਾਬ ਰਹੀ ਹੈ। ਇਸ ਸਾਲ ਕਾਨਸ ਫਿਲਮ ਫੈਸਟੀਵਲ ਲਈ ਲਗਭਗ 2,750 ਐਂਟਰੀਆਂ ਆਈਆਂ ਸਨ, ਜਿਨ੍ਹਾਂ ਵਿੱਚੋਂ ਕੁਝ ਚੁਣੀਆਂ ਗਈਆਂ ਫਿਲਮਾਂ ਨੂੰ ਹੀ ਇਸ ਮੰਚ ‘ਤੇ ਮੌਕਾ ਮਿਲਿਆ ਹੈ।

ਮੇਹਰ ਮਲਹੋਤਰਾ, ਜੋ ਕਿ ਪੁਣੇ ਸਥਿਤ FTII ਵਿੱਚ ਨਿਰਦੇਸ਼ਨ ਅਤੇ ਪਟਕਥਾ ਲੇਖਨ ਦੀ ਵਿਦਿਆਰਥਣ ਹੈ, ਇਸ ਫਿਲਮ ਦੀ ਲੇਖਿਕਾ ਅਤੇ ਨਿਰਦੇਸ਼ਕ ਦੋਵੇਂ ਹਨ। ਇਹ ਫਿਲਮ ਮੁੱਖ ਤੌਰ ‘ਤੇ ਪੰਜਾਬੀ ਭਾਸ਼ਾ ਵਿੱਚ ਬਣਾਈ ਗਈ ਹੈ, ਜੋ ਭਾਰਤੀ ਸਿਨੇਮਾ ਲਈ ਇੱਕ ਵੱਡੀ ਉਪਲਬਧੀ ਮੰਨੀ ਜਾ ਰਹੀ ਹੈ।

ਫਿਲਮ ਦੀ ਕਹਾਣੀ ਰਾਜਨ ਨਾਮਕ ਇੱਕ ਫੈਕਟਰੀ ਕਰਮਚਾਰੀ ਦੇ ਆਲੇ-ਦੁਆਲੇ ਘੁੰਮਦੀ ਹੈ, ਜੋ ਥਕਾਵਟ ਭਰੀ ਜ਼ਿੰਦਗੀ, ਲੰਬੀਆਂ ਸ਼ਿਫਟਾਂ ਅਤੇ ਘਰੇਲੂ ਤਣਾਅ ਨਾਲ ਜੂਝਦਾ ਹੈ। ਉਹ ਸ਼ਹਿਰ ਵਿੱਚ ਨੀਂਦ ਤੋਂ ਬਿਨਾਂ ਰਾਤਾਂ ਬਿਤਾਉਂਦਾ ਹੈ ਅਤੇ ਇੱਕ ਅਜਿਹੇ ਸੁੱਖ ਦੀ ਖੋਜ ਕਰਦਾ ਹੈ ਜੋ ਹਮੇਸ਼ਾਂ ਉਸ ਤੋਂ ਦੂਰ ਰਹਿੰਦਾ ਹੈ।

ਇਸ ਫਿਲਮ ਵਿੱਚ ਪ੍ਰੇਰਕ ਮਹਿਤਾ, ਨਿਕਿਤਾ ਗਰੋਵਰ ਅਤੇ ਹਿਮਾਂਸ਼ੂ ਕੋਹਲੀ ਨੇ ਅਦਾਕਾਰੀ ਕੀਤੀ ਹੈ। ਫਿਲਮ ਦੇ ਟੈਕਨੀਕਲ ਟੀਮ ਵਿੱਚ ਸਿਨੇਮਾਟੋਗ੍ਰਾਫਰ ਦਿਗੰਤ ਸੂਰਤੀ, ਪ੍ਰੋਡਕਸ਼ਨ ਡਿਜ਼ਾਈਨਰ ਰਸ਼ਮੀ ਕੁਸ਼ਵਾਹਾ, ਐਡੀਟਰ ਸ਼੍ਰੇਅਸ ਭੋਪੀ, ਸਾਊਂਡ ਡਿਜ਼ਾਈਨਰ ਸਾਈ ਸੰਜੇ ਅਤੇ ਸੰਗੀਤਕਾਰ ਸੁਦਿਨ ਸ਼ਾਮਲ ਹਨ।

ਇਹ ਫਿਲਮ ਹੁਣ ‘La Cinef’ ਸੈਕਸ਼ਨ ਦੇ ਤਿੰਨ ਇਨਾਮਾਂ ਲਈ ਮੁਕਾਬਲਾ ਕਰੇਗੀ, ਜਿਨ੍ਹਾਂ ਦੇ ਨਤੀਜੇ 21 ਮਈ ਨੂੰ ਘੋਸ਼ਿਤ ਕੀਤੇ ਜਾਣਗੇ। ਮੇਹਰ ਮਲਹੋਤਰਾ ਨੇ ਇਸ ਚੋਣ ‘ਤੇ ਖੁਸ਼ੀ ਜ਼ਾਹਰ ਕਰਦਿਆਂ ਕਿਹਾ ਕਿ ਉਹ ਇਸ ਮੌਕੇ ਲਈ ਨਿਮਰ ਅਤੇ ਮਾਣ ਮਹਿਸੂਸ ਕਰ ਰਹੀ ਹੈ।