Sikh Woman Assault Case UK: ਬਰਮਿੰਘਮ ਕੋਰਟ 'ਚ ਮੁਲਜ਼ਮ ਨੇ ਕਬੂਲਿਆ ਗੁਨਾਹ, ਗੰਭੀਰ ਹਿੰਸਾ ਤੇ ਧਾਰਮਿਕ ਬਦਸਲੂਕੀ ਦਾ ਮਾਮਲਾ

ਯੂਨਾਈਟਡ ਕਿੰਗਡਮ ਤੋਂ ਇੱਕ ਗੰਭੀਰ ਮਾਮਲਾ ਸਾਹਮਣੇ ਆਇਆ ਹੈ, ਜਿਸ ਵਿੱਚ ਇੱਕ ਸਿੱਖ ਔਰਤ ਨਾਲ ਹਿੰਸਾ ਅਤੇ ਯੌਨ ਹਮਲੇ ਦੀ ਘਟਨਾ ਨੇ ਸਭ ਨੂੰ ਹਿਲਾ ਕੇ ਰੱਖ ਦਿੱਤਾ ਹੈ। ਇਹ ਮਾਮਲਾ ਬਰਮਿੰਘਮ ਕਰਾਊਨ ਕੋਰਟ ਵਿੱਚ ਸੁਣਵਾਈ ਦੌਰਾਨ ਸਾਹਮਣੇ ਆਇਆ, ਜਿੱਥੇ ਮੁਲਜ਼ਮ ਨੇ ਆਪਣੇ ਅਪਰਾਧ ਕਬੂਲ ਕਰ ਲਏ ਹਨ।

ਅਦਾਲਤੀ ਜਾਣਕਾਰੀ ਮੁਤਾਬਕ, 32 ਸਾਲਾ ਜੌਨ ਐਸ਼ਬੀ ਨੇ ਸ਼ੁਰੂ ਵਿੱਚ ਦੋਸ਼ਾਂ ਤੋਂ ਇਨਕਾਰ ਕੀਤਾ ਸੀ, ਪਰ ਬਾਅਦ ਵਿੱਚ ਉਸ ਨੇ ਸਿੱਖ ਔਰਤ ਨਾਲ ਹਿੰਸਾ, ਡਕੈਤੀ ਅਤੇ ਯੌਨ ਹਮਲੇ ਸਮੇਤ ਕਈ ਗੰਭੀਰ ਅਪਰਾਧਾਂ ਨੂੰ ਸਵੀਕਾਰ ਕਰ ਲਿਆ।

ਇਹ ਘਟਨਾ ਅਕਤੂਬਰ 2025 ਵਿੱਚ ਵਾਲਸਾਲ ਖੇਤਰ ਵਿੱਚ ਵਾਪਰੀ ਦੱਸੀ ਜਾਂਦੀ ਹੈ। ਪੀੜਤਾ ਉਸ ਸਮੇਂ ਆਪਣੇ ਘਰ ਵਾਪਸ ਆ ਰਹੀ ਸੀ ਜਦੋਂ ਮੁਲਜ਼ਮ ਨੇ ਉਸ ਦਾ ਪਿੱਛਾ ਕੀਤਾ ਅਤੇ ਉਸਦੇ ਘਰ ਵਿੱਚ ਜਬਰਦਸਤੀ ਦਾਖਲ ਹੋ ਗਿਆ।

ਰਿਪੋਰਟਾਂ ਅਨੁਸਾਰ, ਹਮਲੇ ਦੌਰਾਨ ਮੁਲਜ਼ਮ ਨੇ ਔਰਤ ਨਾਲ ਹਿੰਸਕ ਵਤੀਰਾ ਕੀਤਾ ਅਤੇ ਉਸਨੂੰ ਡਰਾਉਣ ਲਈ ਸੋਟੀ ਦੀ ਵਰਤੋਂ ਵੀ ਕੀਤੀ। ਪੀੜਤਾ ਨੇ ਆਪਣੀ ਜਾਨ ਬਚਾਉਣ ਲਈ ਬਾਥਰੂਮ ਵਿੱਚ ਲੁਕਣ ਦੀ ਕੋਸ਼ਿਸ਼ ਕੀਤੀ, ਪਰ ਮੁਲਜ਼ਮ ਨੇ ਉਸਨੂੰ ਉਥੇ ਵੀ ਨੁਕਸਾਨ ਪਹੁੰਚਾਇਆ।

ਅਦਾਲਤ ਵਿੱਚ ਇਹ ਵੀ ਸਾਹਮਣੇ ਆਇਆ ਕਿ ਹਮਲੇ ਦੌਰਾਨ ਮੁਲਜ਼ਮ ਨੇ ਧਾਰਮਿਕ ਤੌਰ 'ਤੇ ਵੀ ਬਦਸਲੂਕੀ ਕੀਤੀ ਅਤੇ ਪੀੜਤਾ ਦੇ ਧਰਮ ਬਾਰੇ ਗਲਤ ਧਾਰਨਾ ਬਣਾਈ।

ਜਸਟਿਸ ਪੇਪਰਾਲ ਨੇ ਇਸ ਮਾਮਲੇ ਨੂੰ ਬਹੁਤ ਗੰਭੀਰ ਦੱਸਦੇ ਹੋਏ ਕਿਹਾ ਕਿ ਮੁਲਜ਼ਮ ਇੱਕ ਖ਼ਤਰਨਾਕ ਵਿਅਕਤੀ ਹੈ ਅਤੇ ਉਸਨੂੰ ਉਮਰ ਕੈਦ ਦੀ ਸਜ਼ਾ ਤੱਕ ਹੋ ਸਕਦੀ ਹੈ। ਸਜ਼ਾ ਦਾ ਫੈਸਲਾ ਆਉਣ ਵਾਲੇ ਸ਼ੁੱਕਰਵਾਰ ਨੂੰ ਸੁਣਾਇਆ ਜਾਵੇਗਾ।

ਇਹ ਮਾਮਲਾ ਯੂਕੇ ਵਿੱਚ ਸੁਰੱਖਿਆ ਅਤੇ ਨਫਰਤੀ ਅਪਰਾਧਾਂ (Hate Crimes) ਨੂੰ ਲੈ ਕੇ ਵੱਡੇ ਸਵਾਲ ਖੜੇ ਕਰਦਾ ਹੈ।