Author : Lovepreet Singh

ਗੁਰਦਾਸਪੁਰ ਦੇ ਡੇਰਾ ਬਾਬਾ ਨਾਨਕ ਦੇ ਨਜ਼ਦੀਕ ਪੈਂਦੇ ਪਿੰਡ ਮਾਣ ਤੋਂ ਇੱਕ ਦਿਲ ਦਹਿਲਾ ਦੇਣ ਵਾਲਾ ਮਾਮਲਾ ਸਾਹਮਣੇ ਆਇਆ ਹੈ, ਜਿੱਥੇ ਇੱਕ ਛੋਟਾ ਮਸੂਮ ਬੱਚਾ ਆਪਣੀ ਮਾਂ ਵੱਲੋਂ ਛੱਡ ਦਿੱਤਾ ਗਿਆ। ਜਾਣਕਾਰੀ ਮੁਤਾਬਕ, ਬੱਚੇ ਦੀ ਮਾਂ ਕਿਸੇ ਹੋਰ ਨਾਲ ਚਲੀ ਗਈ, ਜਿਸ ਤੋਂ ਬਾਅਦ ਮਸੂਮ ਬੱਚਾ ਆਪਣੀ ਬਜ਼ੁਰਗ ਦਾਦੀ ਦੇ ਕੋਲ ਰਹਿ ਗਿਆ।

ਅਜਿਹੇ ਮਾਮਲੇ ਅੱਜ ਵੀ ਕਈ ਪਿੰਡਾਂ ਵਿੱਚ ਵੇਖਣ ਨੂੰ ਮਿਲ ਰਹੇ ਹਨ, ਜਿੱਥੇ ਮਾਵਾਂ ਆਪਣੇ ਮਸੂਮ ਬੱਚਿਆਂ ਨੂੰ ਛੱਡ ਕੇ ਚਲੀ ਜਾਂਦੀਆਂ ਹਨ। ਇਹ ਹਾਲਾਤ ਸਮਾਜ ਦੀ ਸੋਚ ‘ਤੇ ਗੰਭੀਰ ਸਵਾਲ ਖੜੇ ਕਰਦੇ ਹਨ, ਖ਼ਾਸ ਕਰਕੇ ਇੰਨੇ ਠੰਢੇ ਸਿਆਲਾਂ ਦੇ ਦਿਨਾਂ ਵਿੱਚ ਇੱਕ ਬੱਚੇ ਦਾ ਮਾਂ ਤੋਂ ਵਿੱਛੋੜਾ ਦਿਲ ਨੂੰ ਝੰਝੋੜ ਕੇ ਰੱਖ ਦਿੰਦਾ ਹੈ।

ਬਜ਼ੁਰਗ ਮਾਤਾ ਦੀ ਜ਼ਿੰਦਗੀ ਪਹਿਲਾਂ ਹੀ ਦੁੱਖਾਂ ਨਾਲ ਭਰੀ ਰਹੀ ਹੈ। ਭਰ ਜਵਾਨੀ ਵਿੱਚ ਉਸ ਨੇ ਆਪਣੇ ਦੋ ਜਵਾਨ ਪੁੱਤਰ ਗਵਾ ਦਿੱਤੇ। ਇਸ ਤੋਂ ਇਲਾਵਾ, ਕੁਦਰਤ ਦੀ ਮਾਰ ਕਾਰਨ ਆਏ ਹੜ੍ਹਾਂ ਨੇ ਉਸਦਾ ਘਰ ਵੀ ਬੁਰੀ ਤਰ੍ਹਾਂ ਨੁਕਸਾਨੀ ਹਾਲਤ ਵਿੱਚ ਪਾ ਦਿੱਤਾ।

ਹਾਲਾਤ ਇੰਨੇ ਮਾੜੇ ਹਨ ਕਿ ਮਾਤਾ ਨੂੰ ਬੱਚੇ ਲਈ ਪੀਣ ਵਾਲਾ ਪਾਣੀ ਵੀ ਦੂਰੋਂ ਲਿਆਉਣਾ ਪੈਂਦਾ ਹੈ, ਕਿਉਂਕਿ ਘਰ ਵਿੱਚ ਪੀਣ ਦੇ ਪਾਣੀ ਦਾ ਕੋਈ ਪ੍ਰਬੰਧ ਨਹੀਂ। ਇਸ ਸਭ ਦੇ ਬਾਵਜੂਦ, ਬਜ਼ੁਰਗ ਮਾਤਾ ਉਸ ਮਸੂਮ ਬੱਚੇ ਦੀ ਪਰਵਰਿਸ਼ ਆਪਣੇ ਸਹਾਰੇ ਕਰ ਰਹੀ ਹੈ।

ਇਹ ਮਾਮਲਾ ਸਿਰਫ਼ ਇੱਕ ਪਰਿਵਾਰ ਦੀ ਕਹਾਣੀ ਨਹੀਂ, ਸਗੋਂ ਪਿੰਡਾਂ ਵਿੱਚ ਲੁਕੀਆਂ ਉਹਨਾਂ ਹਕੀਕਤਾਂ ਦੀ ਤਸਵੀਰ ਹੈ, ਜੋ ਅੱਜ ਵੀ ਕਈ ਮਸੂਮ ਜਿੰਦਗੀਆਂ ਨੂੰ ਪ੍ਰਭਾਵਿਤ ਕਰ ਰਹੀਆਂ ਹਨ।