Punjabi Driver UK Murder Case: ਯੂਕੇ ‘ਚ ਪੰਜਾਬੀ ਡਰਾਈਵਰ ਨੂੰ 29 ਸਾਲ ਕੈਦ, ਔਰਤ ਦਾ ਕਤਲ ਕਰ ਲਾਸ਼ ਕੂੜੇ ‘ਚ ਸੁੱਟਣ ਦਾ ਦੋਸ਼ ਸਾਬਤ

ਯੂਕੇ ਦੇ ਵੈਸਟ ਮਿਡਲੈਂਡਜ਼ ਵਿੱਚ ਇੱਕ ਦਿਲ ਦਹਿਲਾ ਦੇਣ ਵਾਲੇ ਮਾਮਲੇ ਵਿੱਚ 32 ਸਾਲਾ ਪੰਜਾਬੀ ਮੂਲ ਦੇ ਡਰਾਈਵਰ ਨੂੰ ਇੱਕ ਔਰਤ ਦੇ ਕਤਲ ਦੇ ਦੋਸ਼ ਵਿੱਚ 29 ਸਾਲ ਦੀ ਕੈਦ ਦੀ ਸਜ਼ਾ ਸੁਣਾਈ ਗਈ ਹੈ।

ਇਹ ਫੈਸਲਾ ਵਾਲਵਰਹੈਂਪਟਨ ਕਰਾਊਨ ਕੋਰਟ ਦੇ ਜੱਜ ਮਾਈਕਲ ਚੈਂਬਰਜ਼ ਕੇਸੀ ਨੇ ਸੁਣਾਇਆ, ਜਿਨ੍ਹਾਂ ਨੇ ਕਿਹਾ ਕਿ ਦੋਸ਼ੀ ਨੇ ਬਹੁਤ ਹੀ ਬੇਰਹਿਮ ਅਤੇ ਸੋਚੀ ਸਮਝੀ ਤਰੀਕੇ ਨਾਲ ਇਹ ਜੁਰਮ ਕੀਤਾ ਹੈ ਅਤੇ ਕਿਸੇ ਵੀ ਤਰ੍ਹਾਂ ਦੀ ਨਰਮੀ ਦੇ ਯੋਗ ਨਹੀਂ ਹੈ।

ਦੋਸ਼ੀ ਦੀ ਪਛਾਣ ਤਨਵੀਰ ਸਿੰਘ ਵਜੋਂ ਹੋਈ ਹੈ। ਇਹ ਘਟਨਾ 11 ਅਗਸਤ 2025 ਦੀ ਸਵੇਰ ਵੈਸਟ ਮਿਡਲੈਂਡਜ਼ ਦੇ ਸਮੈਥਵਿਕ ਇਲਾਕੇ ਦੇ ਵੁੱਡਬਰਨ ਰੋਡ ਇੰਡਸਟਰੀਅਲ ਅਸਟੇਟ ‘ਚ ਵਾਪਰੀ।

ਰਿਪੋਰਟਾਂ ਮੁਤਾਬਕ, ਸਵੇਰੇ ਕਰੀਬ 6 ਵਜੇ ਇੱਕ ਰਾਹਗੀਰ ਨੇ ਇੱਕ ਔਰਤ ਦੀ ਲਾਸ਼ ਕੂੜੇ ਦੇ ਢੇਰ ਨੇੜੇ ਨਗਨ ਹਾਲਤ ਵਿੱਚ ਪਈ ਦੇਖੀ ਅਤੇ ਤੁਰੰਤ ਪੁਲਿਸ ਨੂੰ ਸੂਚਿਤ ਕੀਤਾ। ਇਸ ਤੋਂ ਬਾਅਦ ਮੌਕੇ ‘ਤੇ ਪੁਲਿਸ ਨੇ ਪਹੁੰਚ ਕੇ ਇਲਾਕਾ ਸੀਲ ਕਰ ਦਿੱਤਾ।

ਪੋਸਟਮਾਰਟਮ ਰਿਪੋਰਟ ਵਿੱਚ ਮੌਤ ਦਾ ਕਾਰਨ ਗਲਾ ਘੁੱਟਣਾ (strangulation) ਸਾਹਮਣੇ ਆਇਆ। ਜਾਂਚ ਦੌਰਾਨ ਇਹ ਵੀ ਸਾਹਮਣੇ ਆਇਆ ਕਿ ਮ੍ਰਿਤਕ ਦੇ ਚਿਹਰੇ ਅਤੇ ਸਿਰ ‘ਤੇ ਗੰਭੀਰ ਸੱਟਾਂ ਸਨ, ਜੋ ਹਮਲੇ ਤੋਂ ਪਹਿਲਾਂ ਜਾਂ ਬਾਅਦ ਮਾਰੇ ਗਏ ਮੁੱਕਿਆਂ ਨਾਲ ਹੋਈਆਂ।

ਪੁਲਿਸ ਅਨੁਸਾਰ ਹਮਲੇ ਤੋਂ ਬਾਅਦ ਲਾਸ਼ ਨੂੰ ਬੇਰਹਿਮੀ ਨਾਲ ਕੂੜੇ ਦੇ ਢੇਰ ਨੇੜੇ ਸੁੱਟਿਆ ਗਿਆ ਅਤੇ ਸਬੂਤ ਮਿਟਾਉਣ ਲਈ ਸਰੀਰ ‘ਤੇ ਡੀਜ਼ਲ ਵੀ ਪਾਇਆ ਗਿਆ। ਮ੍ਰਿਤਕ ਦੇ ਪਰਸ ਵਿੱਚੋਂ ਪੈਸੇ ਵੀ ਗਾਇਬ ਸਨ।

ਵੈਸਟ ਮਿਡਲੈਂਡਜ਼ ਪੁਲਿਸ ਦੇ ਡਿਟੈਕਟਿਵ ਇੰਸਪੈਕਟਰ ਜੋਅ ਡੇਵਨਪੋਰਟ ਨੇ ਕਿਹਾ ਕਿ ਇਹ ਇੱਕ ਬਹੁਤ ਹੀ ਖ਼ਤਰਨਾਕ ਅਤੇ ਸੋਚੀ ਸਮਝੀ ਹੱਤਿਆ ਸੀ। ਪੁਲਿਸ ਨੇ ਸੀਸੀਟੀਵੀ ਫੁਟੇਜ, ਵੈਨ ਟਰੇਸਿੰਗ ਅਤੇ ਫੋਰੈਂਸਿਕ ਸਬੂਤਾਂ ਦੀ ਮਦਦ ਨਾਲ ਦੋਸ਼ੀ ਤਕ ਪਹੁੰਚ ਕੀਤੀ ਅਤੇ ਉਸਨੂੰ ਉਸਦੇ ਘਰ ਨੇੜੇ ਤੋਂ ਗ੍ਰਿਫਤਾਰ ਕੀਤਾ ਗਿਆ।

ਅਦਾਲਤ ਵਿੱਚ ਟ੍ਰਾਇਲ ਦੌਰਾਨ ਤਨਵੀਰ ਸਿੰਘ ਨੇ ਦਾਅਵਾ ਕੀਤਾ ਕਿ ਇਹ ਇੱਕ ਹਾਦਸਾ ਸੀ ਅਤੇ ਉਸਨੇ ਅਣਜਾਣੇ ਵਿੱਚ ਮੌਤ ਹੋਈ, ਪਰ ਜਿਊਰੀ ਨੇ ਉਸਦੀ ਦਲੀਲ ਨੂੰ ਖਾਰਜ ਕਰਦਿਆਂ ਉਸਨੂੰ ਕਤਲ ਦਾ ਦੋਸ਼ੀ ਕਰਾਰ ਦਿੱਤਾ।

ਲੰਬੀ ਸੁਣਵਾਈ ਤੋਂ ਬਾਅਦ ਕੋਰਟ ਨੇ ਉਸਨੂੰ ਉਮਰ ਕੈਦ ਦੀ ਸਜ਼ਾ ਸੁਣਾਈ, ਜਿਸ ਵਿੱਚ ਘੱਟੋ-ਘੱਟ 29 ਸਾਲ ਜੇਲ੍ਹ ਵਿੱਚ ਕੱਟਣੇ ਹੋਣਗੇ। ਰਿਮਾਂਡ ਦੌਰਾਨ ਬਿਤਾਏ 286 ਦਿਨ ਵੀ ਉਸਦੀ ਸਜ਼ਾ ਵਿੱਚ ਸ਼ਾਮਲ ਕੀਤੇ ਗਏ ਹਨ।