Hormuz Strait Crisis: ਹਰਮੁਜ਼ ਜਲ ਮਾਰਗ ਮੁੜ ਬੰਦ, ਦੋ ਭਾਰਤੀ ਜਹਾਜ਼ਾਂ ’ਤੇ ਗੋਲੀਬਾਰੀ

ਪੱਛਮੀ ਏਸ਼ੀਆ ਵਿੱਚ ਤਣਾਅ ਇੱਕ ਵਾਰ ਫਿਰ ਚਰਮ ’ਤੇ ਪਹੁੰਚ ਗਿਆ ਹੈ ਜਦੋਂ Iran ਨੇ Strait of Hormuz (ਹਰਮੁਜ਼ ਜਲ ਮਾਰਗ) ਨੂੰ ਮੁੜ ਬੰਦ ਕਰਨ ਦਾ ਐਲਾਨ ਕਰ ਦਿੱਤਾ। ਇਸ ਗੰਭੀਰ ਸਥਿਤੀ ਦੌਰਾਨ ਉਥੋਂ ਲੰਘ ਰਹੇ ਦੋ ਭਾਰਤੀ ਜਹਾਜ਼ਾਂ ’ਤੇ ਇਰਾਨੀ ਫੌਜ ਦੇ Islamic Revolutionary Guard Corps ਵੱਲੋਂ ਗੋਲੀਬਾਰੀ ਕੀਤੀ ਗਈ, ਜਿਸ ਨਾਲ ਇੱਕ ਜਹਾਜ਼ ਨੂੰ ਨੁਕਸਾਨ ਪਹੁੰਚਿਆ ਹੈ।

ਇਰਾਨ ਦੀ ਸਾਂਝੀ ਫੌਜੀ ਕਮਾਂਡ ਨੇ ਸਪਸ਼ਟ ਕੀਤਾ ਹੈ ਕਿ ਹਰਮੁਜ਼ ਜਲ ਮਾਰਗ ਹੁਣ ਪੂਰੀ ਤਰ੍ਹਾਂ ਹਥਿਆਰਬੰਦ ਬਲਾਂ ਦੇ ਕੰਟਰੋਲ ਹੇਠ ਹੈ ਅਤੇ ਜਦ ਤੱਕ United States ਵੱਲੋਂ ਇਰਾਨੀ ਬੰਦਰਗਾਹਾਂ ’ਤੇ ਲੱਗੀ ਨਾਕਾਬੰਦੀ ਨਹੀਂ ਹਟਾਈ ਜਾਂਦੀ, ਤਦ ਤੱਕ ਇਹ ਜਲ ਮਾਰਗ ਬੰਦ ਹੀ ਰਹੇਗਾ।

ਇਰਾਨ ਦੇ ਸੁਪਰੀਮ ਆਗੂ Ali Khamenei ਨੇ ਵੀ ਸਖ਼ਤ ਰੁਖ ਅਖਤਿਆਰ ਕਰਦਿਆਂ ਕਿਹਾ ਕਿ ਇਰਾਨੀ ਜਲ ਸੈਨਾ ਹਰ ਤਰ੍ਹਾਂ ਦੀ ਕਾਰਵਾਈ ਲਈ ਤਿਆਰ ਹੈ ਅਤੇ ਦੁਸ਼ਮਣਾਂ ਨੂੰ ਮੂੰਹਤੋੜ ਜਵਾਬ ਦੇਵੇਗੀ। ਉਨ੍ਹਾਂ ਨੇ ਬੀਤੇ ਹਫ਼ਤਿਆਂ ਦੌਰਾਨ ਇਜ਼ਰਾਈਲ ਅਤੇ ਅਮਰੀਕਾ ਨਾਲ ਜੁੜੇ ਟੀਚਿਆਂ ’ਤੇ ਕੀਤੇ ਡਰੋਨ ਹਮਲਿਆਂ ਦੀ ਵੀ ਪ੍ਰਸ਼ੰਸਾ ਕੀਤੀ।

ਸਮੁੰਦਰੀ ਨਿਗਰਾਨੀ ਏਜੰਸੀ TankerTrackers ਮੁਤਾਬਕ, ਇਰਾਕੀ ਤੇਲ ਲਿਜਾ ਰਹੇ ਇੱਕ ਸੁਪਰ ਟੈਂਕਰ ਸਮੇਤ ਕੁੱਲ 14 ਜਹਾਜ਼ਾਂ ਦੇ ਕਾਫਲੇ ਨੂੰ ਇਰਾਨੀ ਫੌਜ ਨੇ ਰੋਕ ਲਿਆ ਸੀ। ਇਨ੍ਹਾਂ ਵਿੱਚੋਂ ਦੋ ਭਾਰਤੀ ਜਹਾਜ਼ਾਂ ’ਤੇ ਗੋਲੀਬਾਰੀ ਕੀਤੀ ਗਈ। ਇੱਕ ਜਹਾਜ਼ ਦੀ ਖਿੜਕੀ ਟੁੱਟ ਗਈ ਅਤੇ ਉਸ ਨੂੰ ਵਾਪਸ ਮੋੜਨਾ ਪਿਆ, ਜਦਕਿ ਦੂਜੇ ਜਹਾਜ਼ ਨੂੰ ਹੋਏ ਨੁਕਸਾਨ ਦੀ ਪੂਰੀ ਜਾਣਕਾਰੀ ਹਾਲੇ ਸਾਹਮਣੇ ਨਹੀਂ ਆਈ।

ਇਸ ਘਟਨਾ ਤੋਂ ਬਾਅਦ 13 ਜਹਾਜ਼ ਫ਼ਾਰਸ ਦੀ ਖਾੜੀ ਵਿੱਚ ਵੱਖ-ਵੱਖ ਦਿਸ਼ਾਵਾਂ ਵੱਲ ਮੁੜ ਗਏ। ਹਾਲਾਂਕਿ, Hindustan Petroleum Corporation Limited ਲਈ ਕੱਚਾ ਤੇਲ ਲਿਜਾ ਰਿਹਾ ਇੱਕ ਜਹਾਜ਼ ਹਾਲੇ ਵੀ ਭਾਰਤ ਵੱਲ ਵਧ ਰਿਹਾ ਹੈ।

ਇਹ ਹਮਲੇ ਕੇਸ਼ਮ ਅਤੇ ਲਾਰਾਕ ਟਾਪੂਆਂ ਦੇ ਵਿਚਕਾਰ ਵਾਪਰੇ। ਬਰਤਾਨਵੀ ਫੌਜ ਦੇ ਸਮੁੰਦਰੀ ਵਪਾਰ ਅਪਰੇਸ਼ਨ ਕੇਂਦਰ ਨੇ ਵੀ ਪੁਸ਼ਟੀ ਕੀਤੀ ਹੈ ਕਿ ਇੱਕ ਟੈਂਕਰ ’ਤੇ ਗੋਲੀਬਾਰੀ ਅਤੇ ਇੱਕ ਕੰਟੇਨਰ ਜਹਾਜ਼ ’ਤੇ ਰਾਕੇਟ ਹਮਲਾ ਕੀਤਾ ਗਿਆ।

ਇਸ ਸਾਰੇ ਮਾਮਲੇ ’ਤੇ ਭਾਰਤ ਨੇ ਵੀ ਤੁਰੰਤ ਕਾਰਵਾਈ ਕਰਦਿਆਂ India ਵਿੱਚ ਇਰਾਨ ਦੇ ਰਾਜਦੂਤ ਮੁਹੰਮਦ ਫਤਹਲੀ ਨੂੰ ਤਲਬ ਕੀਤਾ ਹੈ ਅਤੇ ਇਸ ਘਟਨਾ ’ਤੇ ਸਖ਼ਤ ਵਿਰੋਧ ਦਰਜ ਕਰਵਾਇਆ ਹੈ।

ਇਰਾਨ ਦੇ ਉਪ ਵਿਦੇਸ਼ ਮੰਤਰੀ ਸਈਦ ਖ਼ਾਤਿਬਜ਼ਾਦੇਹ ਨੇ ਦੋਸ਼ ਲਗਾਇਆ ਹੈ ਕਿ ਅਮਰੀਕਾ ਦੀ ਨਾਕਾਬੰਦੀ ਹੀ ਇਸ ਤਣਾਅ ਦਾ ਮੁੱਖ ਕਾਰਨ ਹੈ ਅਤੇ ਇਹ ਸਥਿਤੀ ਕੌਮਾਂਤਰੀ ਵਪਾਰ ਅਤੇ ਆਰਥਿਕਤਾ ਲਈ ਖ਼ਤਰਾ ਬਣ ਸਕਦੀ ਹੈ।

ਹਰਮੁਜ਼ ਜਲ ਮਾਰਗ ਦੁਨੀਆ ਦੇ ਸਭ ਤੋਂ ਮਹੱਤਵਪੂਰਨ ਤੇਲ ਵਪਾਰ ਰਸਤੇ ਵਿੱਚੋਂ ਇੱਕ ਹੈ। ਇਸ ਦੇ ਬੰਦ ਹੋਣ ਨਾਲ ਨਾ ਸਿਰਫ ਮੱਧ-ਪੂਰਬ, ਸਗੋਂ ਪੂਰੀ ਦੁਨੀਆ ਦੇ ਤੇਲ ਸਪਲਾਈ ਅਤੇ ਆਰਥਿਕਤਾ ’ਤੇ ਵੱਡਾ ਅਸਰ ਪੈ ਸਕਦਾ ਹੈ।