ਵੱਖ-ਵੱਖ ਜਾਤੀਆਂ ਦੇ ਬੋਰਡ ਬਣਾਉਣ ਦੀ ਬਜਾਏ ਮਾਨ ਸਰਕਾਰ ਨਿਰਪੱਖ ਹੋ ਕੇ ਜਾਤੀ ਜਨਗਣਨਾ ਕਰਵਾਵੇ - ਡਾ. ਸੋਹਣ ਲਾਲ ਬਲੱਗਣ

ਖੰਨਾ ਵਿੱਚ ਮੀਡੀਆ ਨਾਲ ਗੱਲਬਾਤ ਕਰਦਿਆਂ ਸਮਾਜਵਾਦੀ ਪਾਰਟੀ ਪੰਜਾਬ ਦੇ ਪ੍ਰਧਾਨ ਡਾ. ਸੋਹਣ ਲਾਲ ਬਲੱਗਣ ਨੇ ਪੰਜਾਬ ਸਰਕਾਰ ਦੀ ਨੀਤੀਆਂ ’ਤੇ ਕੜੀ ਟਿੱਪਣੀ ਕੀਤੀ। ਉਨ੍ਹਾਂ ਕਿਹਾ ਕਿ ਹਾਲ ਹੀ ਵਿੱਚ ਅਖਬਾਰਾਂ ਰਾਹੀਂ ਇਹ ਜਾਣਕਾਰੀ ਸਾਹਮਣੇ ਆਈ ਹੈ ਕਿ ਸਰਕਾਰ ਵੱਖ-ਵੱਖ ਜਾਤੀਆਂ ਦੇ ਬੋਰਡ ਬਣਾਕੇ ਉਨ੍ਹਾਂ ਲਈ ਚੇਅਰਮੈਨ, ਉਪ-ਚੇਅਰਮੈਨ ਅਤੇ ਮੈਂਬਰ ਨਿਯੁਕਤ ਕਰਨ ਦੀ ਤਿਆਰੀ ਕਰ ਰਹੀ ਹੈ, ਜੋ ਅਸਲ ਵਿੱਚ ਸਮਾਜ ਦੇ ਭਲੇ ਦੀ ਬਜਾਏ ਸਿਰਫ ਕੁਝ ਲੋਕਾਂ ਨੂੰ ਵਿਸ਼ੇਸ਼ ਸੁਵਿਧਾਵਾਂ ਦੇਣ ਵਰਗਾ ਹੈ।

ਡਾ. ਬਲੱਗਣ ਨੇ ਕਿਹਾ ਕਿ ਇਸ ਤਰ੍ਹਾਂ ਦੀਆਂ ਯੋਜਨਾਵਾਂ ਪਹਿਲਾਂ ਵੀ ਹੋ ਚੁੱਕੀਆਂ ਹਨ, ਪਰ ਇਨ੍ਹਾਂ ਨਾਲ ਕਿਸੇ ਵੀ ਭਾਈਚਾਰੇ ਦੀ ਹਕੀਕੀ ਤਰੱਕੀ ਨਹੀਂ ਹੋਈ। ਉਨ੍ਹਾਂ ਦੱਸਿਆ ਕਿ ਹਰ ਸਮਾਜ ਵਿੱਚ ਕੁਝ ਅਜਿਹੇ ਰਾਜਨੀਤਿਕ ਲੋਕ ਹੁੰਦੇ ਹਨ ਜੋ ਸਮਾਜਿਕ ਹਿੱਤਾਂ ਦੀ ਥਾਂ ਨਿੱਜੀ ਫਾਇਦੇ ਲਈ ਕੰਮ ਕਰਦੇ ਹਨ ਅਤੇ ਅਹੁਦੇ ਹਾਸਲ ਕਰਕੇ ਆਪਣਾ ਲਾਭ ਲੈਂਦੇ ਹਨ।

ਉਨ੍ਹਾਂ ਜ਼ੋਰ ਦੇ ਕੇ ਕਿਹਾ ਕਿ ਜੇਕਰ ਸਰਕਾਰ ਵਾਕਈ ਵੱਖ-ਵੱਖ ਭਾਈਚਾਰਿਆਂ ਦੀ ਭਲਾਈ ਚਾਹੁੰਦੀ ਹੈ ਤਾਂ ਬਿਨਾਂ ਕਿਸੇ ਭੇਦਭਾਵ ਦੇ ਪੰਜਾਬ ਵਿੱਚ ਜਾਤੀ ਜਨਗਣਨਾ ਕਰਵਾਈ ਜਾਵੇ। ਇਸ ਨਾਲ ਇਹ ਸਾਫ਼ ਹੋ ਸਕੇਗਾ ਕਿ ਕਿਹੜੀ ਜਾਤੀ ਦੀ ਜਨਸੰਖਿਆ ਕਿੰਨੀ ਹੈ, ਕਿਹੜੀਆਂ ਜਾਤੀਆਂ ਸਰਕਾਰੀ ਤੇ ਆਰਥਿਕ ਸਾਧਨਾਂ ’ਤੇ ਵੱਧ ਕਾਬਜ਼ ਹਨ ਅਤੇ ਕਿਹੜੇ ਵਰਗ ਅਜੇ ਵੀ ਪਿੱਛੜੇ ਅਤੇ ਸਾਧਨਹੀਣ ਹਨ।

ਡਾ. ਬਲੱਗਣ ਨੇ ਇਹ ਵੀ ਕਿਹਾ ਕਿ ਸਮਾਜਿਕ ਨਿਆਂ ਨੂੰ ਯਕੀਨੀ ਬਣਾਉਣ ਲਈ ਮੰਡਲ ਕਮਿਸ਼ਨ ਦੀ ਰਿਪੋਰਟ ਨੂੰ ਪੂਰੀ ਤਰ੍ਹਾਂ ਲਾਗੂ ਕਰਨਾ ਸਮੇਂ ਦੀ ਲੋੜ ਹੈ। ਉਨ੍ਹਾਂ ਮੁਤਾਬਕ ਅਸਲ ਬਰਾਬਰੀ ਤਦੋਂ ਹੀ ਆ ਸਕਦੀ ਹੈ ਜਦੋਂ ਸਰਕਾਰ ਅੰਕੜਿਆਂ ਦੇ ਆਧਾਰ ’ਤੇ ਨੀਤੀਆਂ ਬਣਾਏ, ਨਾ ਕਿ ਸਿਰਫ਼ ਪ੍ਰਤੀਕਾਤਮਕ ਬੋਰਡ ਬਣਾਕੇ।