ਪਟਿਆਲਾ ‘ਚ ਦਿਲਜੀਤ ਦੋਸਾਂਝ ਦੀ ਸ਼ੂਟਿੰਗ ‘ਤੇ ਹੰਗਾਮਾ

ਪਟਿਆਲਾ ਦੇ ਇਕ ਰੌਣਕਭਰੇ ਬਾਜ਼ਾਰ ਵਿੱਚ ਮੰਗਲਵਾਰ ਨੂੰ ਦਿਲਜੀਤ ਦੋਸਾਂਝ ਦੀ ਨਵੀਂ ਫਿਲਮ ਦੀ ਸ਼ੂਟਿੰਗ ਦੌਰਾਨ ਅਚਾਨਕ ਤਣਾਅ ਪੈਦਾ ਹੋ ਗਿਆ। ਸ਼ੂਟਿੰਗ ਟੀਮ ਵੱਲੋਂ ਬਾਜ਼ਾਰ ਦੀਆਂ ਕਈ ਦੁਕਾਨਾਂ ਦੇ ਬਾਹਰ ਉਰਦੂ ਵਿੱਚ ਲਿਖੇ ਬੋਰਡ ਲਗਾਏ ਗਏ, ਜਿਸ ਕਾਰਨ ਸਥਾਨਕ ਦੁਕਾਨਦਾਰ ਭੜਕ ਉੱਠੇ। ਦੁਕਾਨਦਾਰਾਂ ਦਾ ਕਹਿਣਾ ਸੀ ਕਿ ਇਹ ਸਭ ਕੁਝ ਬਿਨਾਂ ਉਨ੍ਹਾਂ ਦੀ ਇਜਾਜ਼ਤ ਕੀਤਾ ਗਿਆ, ਜੋ ਗਲਤ ਹੈ ਅਤੇ ਉਨ੍ਹਾਂ ਦੇ ਕੰਮ ਵਿੱਚ ਰੁਕਾਵਟ ਪੈਦਾ ਕਰ ਰਿਹਾ ਹੈ।

ਦੁਕਾਨਦਾਰਾਂ ਦਾ ਇਹ ਵੀ ਦੋਸ਼ ਹੈ ਕਿ ਉਰਦੂ ਬੋਰਡਾਂ ਕਾਰਨ ਗਾਹਕਾਂ ਨੂੰ ਲੱਗ ਰਿਹਾ ਸੀ ਕਿ ਦੁਕਾਨਾਂ ਸ਼ਾਇਦ ਬੰਦ ਹਨ ਜਾਂ ਸ਼ੂਟਿੰਗ ਕਾਰਨ ਉਪਲਬਧ ਨਹੀਂ, ਜਿਸ ਨਾਲ ਉਨ੍ਹਾਂ ਦੀ ਰੋਜ਼ੀ-ਰੋਟੀ ਪ੍ਰਭਾਵਿਤ ਹੋ ਰਹੀ ਸੀ। ਕੁਝ ਦੁਕਾਨਦਾਰਾਂ ਨੇ ਇਹ ਵੀ ਦੱਸਿਆ ਕਿ ਸੈੱਟ ‘ਤੇ ਮੌਜੂਦ ਬਾਉਂਸਰਾਂ ਨੇ ਮੀਡੀਆ ਵੱਲੋਂ ਫੁਟੇਜ਼ ਬਣਾਉਣ ਵਿੱਚ ਵੀ ਦਖ਼ਲ ਦਿੱਤਾ ਅਤੇ ਕੈਮਰੇ ਨੂੰ ਹੱਥ ਵੀ ਲਾਇਆ।

ਸਥਿਤੀ ਤਪਣ ‘ਤੇ ਪੁਲਿਸ ਦੀ ਟੀਮ ਮੌਕੇ ‘ਤੇ ਪਹੁੰਚੀ ਅਤੇ ਦੋਵਾਂ ਪਾਸਿਆਂ ਨੂੰ ਸ਼ਾਂਤ ਕਰਵਾਇਆ। ਪੁਲਿਸ ਨੇ ਦੁਕਾਨਦਾਰਾਂ ਦੀਆਂ ਗੱਲਾਂ ਸੁਣੀਆਂ ਅਤੇ ਸ਼ੂਟਿੰਗ ਟੀਮ ਨਾਲ ਗੱਲਬਾਤ ਕਰਕੇ ਹੰਗਾਮੇ ਨੂੰ ਕਾਬੂ ਕੀਤਾ। ਦੁਕਾਨਦਾਰਾਂ ਦਾ ਸਿਰਫ਼ ਇਹ ਮੰਗ ਸੀ ਕਿ ਜਿਸ ਵੀ ਇਲਾਕੇ ਵਿੱਚ ਸ਼ੂਟਿੰਗ ਕੀਤੀ ਜਾਵੇ, ਉੱਥੇ ਪਹਿਲਾਂ ਪਰਮਿਸ਼ਨ ਲਈ ਜਾਵੇ ਅਤੇ ਸਥਾਨਕ ਵਪਾਰੀਆਂ ਨਾਲ ਸਲਾਹ–ਮਸ਼ਵਰਾ ਕੀਤਾ ਜਾਵੇ।

ਸ਼ੂਟਿੰਗ ਟੀਮ ਵੱਲੋਂ ਹਾਲੇ ਤੱਕ ਇਸ ਮਾਮਲੇ ‘ਤੇ ਕੋਈ ਸਪਸ਼ਟ ਜਵਾਬ ਨਹੀਂ ਦਿੱਤਾ ਗਿਆ। ਪਰ ਇਹ ਘਟਨਾ ਬਾਜ਼ਾਰ ਵਿੱਚ ਦਿਨ ਭਰ ਚਰਚਾ ਦਾ ਵਿਸ਼ਾ ਬਣੀ ਰਹੀ ਅਤੇ ਇਸ ਨਾਲ ਸਥਾਨਕ ਵਪਾਰੀਆਂ ਅਤੇ ਫਿਲਮ ਯੂਨਿਟ ਵਿਚਕਾਰ ਹਲਕਾ ਤਣਾਅ ਦੇਖਣ ਨੂੰ ਮਿਲਿਆ।

ਪਟਿਆਲਾ ਦੇ ਲੋਕਾਂ ਮੁਤਾਬਕ, ਇਲਾਕੇ ਵਿੱਚ ਫਿਲਮਾਂ ਦੀ ਸ਼ੂਟਿੰਗ ਆਮ ਗੱਲ ਹੈ, ਪਰ ਬਿਨਾਂ ਇਜਾਜ਼ਤ ਇਸ ਤਰ੍ਹਾਂ ਦੇ ਬੋਰਡ ਲਗਾਉਣ ਨਾਲ ਵਪਾਰੀਆਂ ਦੀ ਨਾਰਾਜ਼ਗੀ ਵਾਜਬ ਹੈ। ਘਟਨਾ ਤੋਂ ਬਾਅਦ ਸ਼ਾਮ ਤੱਕ ਬਾਜ਼ਾਰ ਦੀ ਸਥਿਤੀ ਮੁੜ ਸਧਾਰਨ ਹੋ ਗਈ।