RBI ਨੇ ਰੈਪੋ ਰੇਟ ਘਟਾਇਆ, EMI ਹੋਈ ਸਸਤੀ: ਆਮ ਲੋਕਾਂ ਨੂੰ ਰਾਹਤ

ਭਾਰਤੀ ਰਿਜ਼ਰਵ ਬੈਂਕ ਨੇ ਸ਼ੁੱਕਰਵਾਰ, 5 ਦਸੰਬਰ 2025 ਨੂੰ ਆਮ ਲੋਕਾਂ ਲਈ ਇੱਕ ਵੱਡਾ ਫ਼ੈਸਲਾ ਲਿਆ। ਕੇਂਦਰੀ ਬੈਂਕ ਨੇ ਬੈਂਚਮਾਰਕ ਰੈਪੋ ਰੇਟ ਵਿੱਚ 25 ਬੇਸਿਸ ਪੁਆਇੰਟ ਦੀ ਕਟੌਤੀ ਕਰ ਦਿੱਤੀ, ਜਿਸ ਨਾਲ ਨਵੀਂ ਰੇਟ 5.25 ਪ੍ਰਤੀਸ਼ਤ ਹੋ ਗਈ। ਇਸ ਕਦਮ ਨਾਲ ਘਰ ਖਰੀਦਣ ਵਾਲਿਆਂ ਤੋਂ ਲੈ ਕੇ ਕਾਰ ਲੋਨ ਤੇ ਹੋਰ EMI ਭਰਨ ਵਾਲਿਆਂ ਨੂੰ ਤੁਰੰਤ ਰਾਹਤ ਮਿਲਣ ਦੀ ਉਮੀਦ ਹੈ।

ਮਹਿੰਗਾਈ ਦੇ ਮੋਰਚੇ ’ਤੇ ਤਸਵੀਰ ਇਸ ਸਮੇਂ ਕਾਫੀ ਸਿਹਤਮੰਦ ਹੈ। ਦੇਸ਼ ਵਿੱਚ CPI ਮਹਿੰਗਾਈ 2.2 ਪ੍ਰਤੀਸ਼ਤ ਦੇ ਰਿਕਾਰਡ ਹੇਠਲੇ ਪੱਧਰ ’ਤੇ ਹੈ। ਰਿਪੋਰਟਾਂ ਅਨੁਸਾਰ, ਮੌਜੂਦਾ ਵਿੱਤੀ ਸਾਲ ਲਈ RBI ਨੇ ਆਪਣਾ CPI ਅਨੁਮਾਨ ਘਟਾ ਕੇ 2.0 ਪ੍ਰਤੀਸ਼ਤ ਕਰ ਦਿੱਤਾ ਹੈ, ਜੋ ਪਹਿਲਾਂ 2.6 ਪ੍ਰਤੀਸ਼ਤ ਸੀ। ਤਿਮਾਹੀ ਪੱਧਰ ’ਤੇ ਵੀ ਵੱਡੇ ਬਦਲਾਅ ਕੀਤੇ ਗਏ ਹਨ—ਤੀਜੀ ਤਿਮਾਹੀ ਲਈ ਅਨੁਮਾਨ 1.8 ਪ੍ਰਤੀਸ਼ਤ ਤੋਂ ਘਟਾ ਕੇ 0.6 ਪ੍ਰਤੀਸ਼ਤ ਅਤੇ ਚੌਥੀ ਤਿਮਾਹੀ ਲਈ 4.0 ਤੋਂ ਘਟਾ ਕੇ 2.9 ਪ੍ਰਤੀਸ਼ਤ ਕਰ ਦਿੱਤਾ ਗਿਆ ਹੈ।

ਵਿਕਾਸ ਦੇ ਮੋਰਚੇ ’ਤੇ RBI ਨੇ ਕਾਫ਼ੀ ਅਹਿਮ ਸੁਧਾਰ ਦਿਖਾਇਆ ਹੈ। ਵਿੱਤੀ ਸਾਲ 2025-26 ਲਈ GDP ਵਿਕਾਸ ਅਨੁਮਾਨ ਨੂੰ 6.8 ਪ੍ਰਤੀਸ਼ਤ ਤੋਂ ਵਧਾ ਕੇ 7.3 ਪ੍ਰਤੀਸ਼ਤ ਤੱਕ ਕਰ ਦਿੱਤਾ ਗਿਆ ਹੈ। ਤਿਮਾਹੀ ਅਨੁਮਾਨਾਂ ਵਿੱਚ ਵੀ ਬਿਹਤਰੀ ਨਜ਼ਰ ਆ ਰਹੀ ਹੈ—ਅਕਤੂਬਰ-ਦਸੰਬਰ 2025 ਲਈ ਅੰਦਾਜ਼ਾ 7.0 ਪ੍ਰਤੀਸ਼ਤ ਰੱਖਿਆ ਗਿਆ ਹੈ, ਜੋ ਪਹਿਲਾਂ 6.4 ਪ੍ਰਤੀਸ਼ਤ ਸੀ। ਇਸੇ ਤਰ੍ਹਾਂ ਜਨਵਰੀ-ਮਾਰਚ 2026 ਲਈ ਵਿਕਾਸ ਦਰ ਦਾ ਅਨੁਮਾਨ 6.2 ਤੋਂ ਵਧਾ ਕੇ 6.5 ਪ੍ਰਤੀਸ਼ਤ ਕੀਤਾ ਗਿਆ ਹੈ।

ਕੇਂਦਰੀ ਬੈਂਕ ਦੇ ਇਸ ਕਦਮ ਨੂੰ ਮੋਟੇ ਤੌਰ ’ਤੇ ਰਾਹਤਮੰਦ ਮੰਨਿਆ ਜਾ ਰਿਹਾ ਹੈ। ਘੱਟ ਮਹਿੰਗਾਈ, ਮਜ਼ਬੂਤ ਵਿਕਾਸ ਦਰ ਅਤੇ ਸਥਿਰ ਵਿੱਤੀ ਹਾਲਾਤਾਂ ਨੇ ਰੈਪੋ ਰੇਟ ਘਟਾਉਣ ਲਈ ਰਸਤਾ ਤਿਆਰ ਕੀਤਾ। ਘਰੇਲੂ ਬਜਟ ਚਲਾ ਰਹੇ ਪਰਿਵਾਰਾਂ ਤੋਂ ਲੈ ਕੇ ਨਵੇਂ ਲੋਨ ਲੈਣ ਦੀ ਯੋਜਨਾ ਬਣਾਉਣ ਵਾਲਿਆਂ ਲਈ ਇਹ ਫ਼ੈਸਲਾ ਤੁਰੰਤ ਫ਼ਾਇਦੇ ਵਾਲਾ ਸਾਬਤ ਹੋ ਸਕਦਾ ਹੈ।

ਦੇਸ਼ ਦੀ ਅਰਥਵਿਵਸਥਾ ਜਿੱਥੇ ਮਹਿੰਗਾਈ ਦੇ ਦਬਾਅ ਤੋਂ ਰਾਹਤ ਅਨੁਭਵ ਕਰ ਰਹੀ ਹੈ, ਓਥੇ ਹੀ ਵਿਕਾਸ ਦੇ ਇੰਦੀਕੇਟਰ ਮਜ਼ਬੂਤੀ ਦੀ ਪੇਸ਼ਗੋਈ ਕਰ ਰਹੇ ਹਨ। ਰੈਪੋ ਰੇਟ ਕਟੌਤੀ ਇਸੇ ਰੁਝਾਨ ਨੂੰ ਹੋਰ ਤੇਜ਼ ਕਰਨ ਵਾਲਾ ਕਦਮ ਮੰਨਿਆ ਜਾ ਰਿਹਾ ਹੈ।