ਅਭਿਗਿਆਨ ਕੁੰਡੂ ਦਾ ਇਤਿਹਾਸਕ ਦੋਹਰਾ ਸੈਂਕੜਾ, ਭਾਰਤ ਦੀ ਵੱਡੀ ਜਿੱਤ

ਅੰਡਰ-19 ਏਸ਼ੀਆ ਕੱਪ ਦੇ ਇਸ ਮੈਚ ਵਿੱਚ ਭਾਰਤੀ ਟੀਮ ਨੇ ਐਸਾ ਦਬਦਬਾ ਦਿਖਾਇਆ ਕਿ ਨਤੀਜਾ ਪਹਿਲੀ ਪਾਰੀ ਤੋਂ ਹੀ ਸਪਸ਼ਟ ਹੋ ਗਿਆ। ਵਿਕਟਕੀਪਰ ਬੱਲੇਬਾਜ਼ ਅਭਿਗਿਆਨ ਕੁੰਡੂ ਦੀ ਇਤਿਹਾਸਕ ਨਾਬਾਦ 209 ਦੌੜਾਂ ਦੀ ਪਾਰੀ ਅਤੇ ਗੇਂਦਬਾਜ਼ ਦੀਪੇਸ਼ ਦੇਵੇਂਦਰਨ ਦੀ ਕਮਾਲ ਦੀ ਗੇਂਦਬਾਜ਼ੀ ਦੇ ਬਲ ’ਤੇ ਭਾਰਤ ਨੇ ਮਲੇਸ਼ੀਆ ਨੂੰ 315 ਦੌੜਾਂ ਦੇ ਵੱਡੇ ਅੰਤਰ ਨਾਲ ਹਰਾ ਦਿੱਤਾ।

ਭਾਰਤ ਨੇ ਪਹਿਲਾਂ ਬੱਲੇਬਾਜ਼ੀ ਕਰਦਿਆਂ 7 ਵਿਕਟਾਂ ਦੇ ਨੁਕਸਾਨ ’ਤੇ 408 ਦੌੜਾਂ ਦਾ ਵਿਸ਼ਾਲ ਸਕੋਰ ਖੜਾ ਕੀਤਾ। ਪੰਜਵੇਂ ਨੰਬਰ ’ਤੇ ਉਤਰੇ 17 ਸਾਲਾ ਅਭਿਗਿਆਨ ਕੁੰਡੂ ਨੇ ਸਿਰਫ਼ 125 ਗੇਂਦਾਂ ’ਚ ਨਾਬਾਦ 209 ਦੌੜਾਂ ਬਣਾਈਆਂ। ਉਸ ਦੀ ਪਾਰੀ ਵਿੱਚ 19 ਚੌਕੇ ਅਤੇ 7 ਛੱਕੇ ਸ਼ਾਮਲ ਸਨ। ਇਹ ਪਾਰੀ ਨਾ ਸਿਰਫ਼ ਮੈਚ ਦੀ ਦਿਸ਼ਾ ਤੈਅ ਕਰਨ ਵਾਲੀ ਸਾਬਤ ਹੋਈ, ਸਗੋਂ ਯੂਥ ਇੱਕ ਰੋਜ਼ਾ ਕ੍ਰਿਕਟ ਦੇ ਇਤਿਹਾਸ ਵਿੱਚ ਵੀ ਖਾਸ ਥਾਂ ਬਣਾਉਂਦੀ ਹੈ। ਅਭਿਗਿਆਨ ਯੂਥ ਇੱਕ ਰੋਜ਼ਾ ਵਿੱਚ ਦੋਹਰਾ ਸੈਂਕੜਾ ਜੜਨ ਵਾਲਾ ਪਹਿਲਾ ਭਾਰਤੀ ਬੱਲੇਬਾਜ਼ ਬਣ ਗਿਆ ਹੈ। ਦੁਨੀਆ ਪੱਧਰ ’ਤੇ ਉਹ ਇਹ ਕਾਰਨਾਮਾ ਕਰਨ ਵਾਲਾ ਦੂਜਾ ਖਿਡਾਰੀ ਹੈ।

409 ਦੌੜਾਂ ਦੇ ਟੀਚੇ ਦਾ ਪਿੱਛਾ ਕਰਨ ਉਤਰੀ ਮਲੇਸ਼ੀਆ ਦੀ ਟੀਮ ਸ਼ੁਰੂ ਤੋਂ ਹੀ ਦਬਾਅ ਹੇਠ ਨਜ਼ਰ ਆਈ। ਸੱਜੇ ਹੱਥ ਦੇ ਮੱਧਮ ਤੇਜ਼ ਗੇਂਦਬਾਜ਼ ਦੀਪੇਸ਼ ਦੇਵੇਂਦਰਨ ਨੇ ਕਸਾਵਟ ਭਰੀ ਗੇਂਦਬਾਜ਼ੀ ਕਰਦਿਆਂ ਮਲੇਸ਼ੀਆ ਦੀ ਬੱਲੇਬਾਜ਼ੀ ਦੀ ਰੀੜ੍ਹ ਤੋੜ ਦਿੱਤੀ। ਉਸ ਨੇ 22 ਦੌੜਾਂ ਦੇ ਕੇ 5 ਮਹੱਤਵਪੂਰਨ ਵਿਕਟਾਂ ਹਾਸਲ ਕੀਤੀਆਂ। ਮਲੇਸ਼ੀਆ ਦੀ ਪੂਰੀ ਟੀਮ 32.1 ਓਵਰਾਂ ਵਿੱਚ ਸਿਰਫ਼ 93 ਦੌੜਾਂ ’ਤੇ ਆਲ ਆਉਟ ਹੋ ਗਈ। ਹਮਜ਼ਾ ਪਾਂਗੀ ਨੇ 35 ਦੌੜਾਂ ਬਣਾਕੇ ਆਪਣੀ ਟੀਮ ਵੱਲੋਂ ਸਭ ਤੋਂ ਵੱਧ ਸਕੋਰ ਕੀਤਾ, ਪਰ ਉਹ ਵੀ ਹਾਰ ਨੂੰ ਟਾਲ ਨਾ ਸਕਿਆ।

ਇਸ ਜਿੱਤ ਨਾਲ ਭਾਰਤ ਨੇ ਯੂਥ ਇੱਕ ਰੋਜ਼ਾ ਕ੍ਰਿਕਟ ਵਿੱਚ ਦੌੜਾਂ ਦੇ ਅੰਤਰ ਨਾਲ ਆਪਣੀ ਦੂਜੀ ਸਭ ਤੋਂ ਵੱਡੀ ਜਿੱਤ ਦਰਜ ਕੀਤੀ। ਇਸ ਤੋਂ ਪਹਿਲਾਂ 2022 ਵਿੱਚ ਭਾਰਤ ਨੇ ਯੂਗਾਂਡਾ ਨੂੰ 326 ਦੌੜਾਂ ਨਾਲ ਹਰਾਇਆ ਸੀ। ਮੌਜੂਦਾ ਮੈਚ ਵਿੱਚ ਬੱਲੇਬਾਜ਼ੀ ਅਤੇ ਗੇਂਦਬਾਜ਼ੀ ਦੋਵੇਂ ਵਿਭਾਗਾਂ ਵਿੱਚ ਭਾਰਤ ਦੀ ਪਕੜ ਸਾਫ਼ ਨਜ਼ਰ ਆਈ, ਜੋ ਟੀਮ ਦੀ ਗਹਿਰਾਈ ਅਤੇ ਤਿਆਰੀ ਨੂੰ ਦਰਸਾਉਂਦੀ ਹੈ।