IPL 2026: 26 ਮਾਰਚ ਤੋਂ 31 ਮਈ ਤੱਕ ਹੋਵੇਗਾ ਆਈਪੀਐਲ, ਉਦਘਾਟਨੀ ਮੈਚ ਦੇ ਸਥਾਨ ’ਤੇ ਸਸਪੈਂਸ ਕਾਇਮ

ਇੰਡੀਅਨ ਪ੍ਰੀਮੀਅਰ ਲੀਗ ਦੇ ਪ੍ਰਸ਼ੰਸਕਾਂ ਲਈ ਵੱਡੀ ਖ਼ਬਰ ਸਾਹਮਣੇ ਆਈ ਹੈ। ਆਈਪੀਐਲ ਦਾ 19ਵਾਂ ਸੀਜ਼ਨ ਸਾਲ 2026 ਵਿੱਚ 26 ਮਾਰਚ ਤੋਂ ਸ਼ੁਰੂ ਹੋਵੇਗਾ ਅਤੇ 31 ਮਈ ਤੱਕ ਖੇਡਿਆ ਜਾਵੇਗਾ। ਹਾਲਾਂਕਿ, ਇਸ ਵਾਰ ਟੂਰਨਾਮੈਂਟ ਦੇ ਉਦਘਾਟਨੀ ਮੈਚ ਦੇ ਸਥਾਨ ਨੂੰ ਲੈ ਕੇ ਅਜੇ ਵੀ ਅਨਿਸ਼ਚਿਤਤਾ ਬਣੀ ਹੋਈ ਹੈ।

ਮਿਲੀ ਜਾਣਕਾਰੀ ਮੁਤਾਬਕ ਉਦਘਾਟਨੀ ਮੈਚ ਬੈਂਗਲੁਰੂ ਦੇ ਚਿੰਨਾਸਵਾਮੀ ਸਟੇਡੀਅਮ ਵਿੱਚ ਹੋ ਸਕਦਾ ਹੈ, ਪਰ ਪਿਛਲੇ ਸਾਲ ਆਰਸੀਬੀ ਦੀ ਜਿੱਤ ਦੇ ਜਸ਼ਨ ਦੌਰਾਨ ਹੋਈ ਭਗਦੜ, ਜਿਸ ਵਿੱਚ 11 ਲੋਕਾਂ ਦੀ ਮੌਤ ਹੋ ਗਈ ਸੀ, ਤੋਂ ਬਾਅਦ ਸੁਰੱਖਿਆ ਨੂੰ ਲੈ ਕੇ ਗੰਭੀਰ ਚਿੰਤਾਵਾਂ ਸਾਹਮਣੇ ਆਈਆਂ ਹਨ। ਇਸੀ ਕਾਰਨ ਅਜੇ ਤੱਕ ਬੈਂਗਲੁਰੂ ਵਿੱਚ ਪਹਿਲਾ ਮੈਚ ਕਰਵਾਉਣ ਬਾਰੇ ਕੋਈ ਅੰਤਿਮ ਫੈਸਲਾ ਨਹੀਂ ਲਿਆ ਗਿਆ।

ਆਈਪੀਐਲ ਪ੍ਰਬੰਧਕ ਪੂਰਾ ਸ਼ਡਿਊਲ ਜਾਰੀ ਕਰਨ ਸਮੇਂ ਹੀ ਇਹ ਸਪੱਸ਼ਟ ਕਰਨਗੇ ਕਿ ਉਦਘਾਟਨੀ ਮੈਚ ਕਿਹੜੇ ਸ਼ਹਿਰ ਵਿੱਚ ਖੇਡਿਆ ਜਾਵੇਗਾ। ਦੂਜੇ ਪਾਸੇ, ਆਈਪੀਐਲ 2026 ਲਈ ਮਿਨੀ ਨਿਲਾਮੀ ਵੀ ਖੂਬ ਚਰਚਾ ਵਿੱਚ ਰਹੀ। ਅਬੂ ਧਾਬੀ ਵਿੱਚ ਹੋਈ ਨਿਲਾਮੀ ਦੌਰਾਨ ਕੋਲਕਾਤਾ ਨਾਈਟ ਰਾਈਡਰਜ਼ ਨੇ ਆਸਟਰੇਲੀਆਈ ਆਲਰਾਊਂਡਰ ਕੈਮਰੂਨ ਗ੍ਰੀਨ ਨੂੰ 25.20 ਕਰੋੜ ਰੁਪਏ ਵਿੱਚ ਖਰੀਦ ਕੇ ਇਤਿਹਾਸ ਰਚ ਦਿੱਤਾ।

ਕੈਮਰੂਨ ਗ੍ਰੀਨ ਇਸ ਨਿਲਾਮੀ ਵਿੱਚ ਸਭ ਤੋਂ ਮਹਿੰਗੇ ਵਿਦੇਸ਼ੀ ਖਿਡਾਰੀ ਬਣੇ। ਉਨ੍ਹਾਂ ਲਈ ਕੋਲਕਾਤਾ ਅਤੇ ਚੇਨਈ ਵਿਚਾਲੇ ਤਿੱਖੀ ਬੋਲੀ ਦੀ ਲੜਾਈ ਦੇਖਣ ਨੂੰ ਮਿਲੀ। ਇਸ ਦੇ ਨਾਲ ਹੀ ਭਾਰਤੀ ਖਿਡਾਰੀ ਪ੍ਰਿਥਵੀ ਸ਼ਾਅ ਅਤੇ ਸਰਫਰਾਜ਼ ਖਾਨ ਨਿਲਾਮੀ ਵਿੱਚ ਨਹੀਂ ਵਿਕ ਸਕੇ, ਜੋ ਕਿ ਪ੍ਰਸ਼ੰਸਕਾਂ ਲਈ ਹੈਰਾਨੀ ਵਾਲੀ ਗੱਲ ਰਹੀ।

ਨਿਲਾਮੀ ਵਿੱਚ ਕੁੱਲ 359 ਖਿਡਾਰੀ ਸ਼ਾਮਲ ਸਨ, ਜਿਨ੍ਹਾਂ ਵਿੱਚ 246 ਭਾਰਤੀ ਅਤੇ 113 ਵਿਦੇਸ਼ੀ ਖਿਡਾਰੀ ਸਨ। ਦਸੋਂ ਫ੍ਰੈਂਚਾਇਜ਼ੀਆਂ ਵੱਲੋਂ 77 ਸਲਾਟ ਭਰਨ ਲਈ ਬੋਲੀਆਂ ਲਗਾਈਆਂ ਗਈਆਂ, ਜਿਨ੍ਹਾਂ ਵਿੱਚੋਂ 31 ਸਲਾਟ ਵਿਦੇਸ਼ੀ ਖਿਡਾਰੀਆਂ ਲਈ ਰਾਖਵੇਂ ਹਨ।

ਇਸ ਦਰਮਿਆਨ ਬੈਂਗਲੁਰੂ ਕ੍ਰਿਕਟ ਸੰਘ ਦੇ ਅਧਿਕਾਰੀਆਂ ਨੇ ਵੀ ਕਿਹਾ ਹੈ ਕਿ ਉਹ ਲਗਾਤਾਰ ਆਈਪੀਐਲ ਪ੍ਰਬੰਧਕਾਂ ਨਾਲ ਸੰਪਰਕ ਵਿੱਚ ਹਨ ਤਾਂ ਜੋ ਸੁਰੱਖਿਆ ਪ੍ਰਬੰਧ ਮਜ਼ਬੂਤ ਕਰਕੇ ਮੈਚ ਸ਼ਹਿਰ ਵਿੱਚ ਕਰਵਾਏ ਜਾ ਸਕਣ ਅਤੇ ਦਰਸ਼ਕਾਂ ਨੂੰ ਆਪਣੇ ਘਰੇਲੂ ਮੈਦਾਨ ’ਤੇ ਕ੍ਰਿਕਟ ਦਾ ਆਨੰਦ ਮਿਲ ਸਕੇ।

ਆਈਪੀਐਲ 2026 ਨੂੰ ਲੈ ਕੇ ਹੁਣ ਪ੍ਰਸ਼ੰਸਕਾਂ ਦੀ ਨਜ਼ਰ ਪੂਰੇ ਸ਼ਡਿਊਲ ਅਤੇ ਉਦਘਾਟਨੀ ਮੈਚ ਦੇ ਅਧਿਕਾਰਤ ਐਲਾਨ ’ਤੇ ਟਿਕੀ ਹੋਈ ਹੈ।