ਬੋਂਡੀ ਬੀਚ ਦਹਿਸ਼ਤ: ਪਿਤਾ-ਪੁੱਤਰ ਨੇ ਕੀਤਾ 16 ਲੋਕਾਂ ਕਤਲ

ਸਿਡਨੀ ਦੇ ਪ੍ਰਸਿੱਧ ਬੋਂਡੀ ਬੀਚ ‘ਤੇ ਹਨੂਕਾਹ ਦੇ ਤਿਉਹਾਰ ਦੌਰਾਨ ਪਿਤਾ-ਪੁੱਤਰ ਵੱਲੋਂ ਕੀਤੀ ਗਈ ਬੇਰਹਮੀ ਗੋਲੀਬਾਰੀ ਨੇ 16 ਲੋਕਾਂ ਦੀ ਜਾਨ ਲੈ ਲਈ ਅਤੇ 40 ਤੋਂ ਵੱਧ ਨੂੰ ਜ਼ਖਮੀ ਕਰ ਦਿੱਤਾ। ਘਟਨਾ ਸਥਾਨ ‘ਤੇ ਹਲਚਲ ਮਚ ਗਈ, ਜਦਕਿ ਲੋਕ ਘੁਮਣ-ਫਿਰਣ ਅਤੇ ਤਿਉਹਾਰ ਮਨਾਉਣ ਆਏ ਸਨ।

ਪੁਲਿਸ ਅਨੁਸਾਰ ਹਮਲਾਵਰਾਂ ਦੀ ਪਛਾਣ ਸਾਜਿਦ ਅਕਰਮ (50 ਸਾਲ) ਅਤੇ ਉਸਦੇ ਪੁੱਤਰ ਨਵੀਦ ਅਕਰਮ (24 ਸਾਲ) ਵਜੋਂ ਹੋਈ। ਨਵੀਦ ਪਾਕਿਸਤਾਨੀ ਨਾਗਰਿਕ ਹੈ ਅਤੇ ਉਸਦੇ ਕੋਲ ਆਸਟ੍ਰੇਲੀਆ ਦੇ ਨਿਊ ਸਾਊਥ ਵੇਲਜ਼ ਤੋਂ ਡਰਾਈਵਿੰਗ ਲਾਇਸੈਂਸ ਵੀ ਹੈ।

ਨਿਊ ਸਾਊਥ ਵੇਲਜ਼ ਪੁਲਿਸ ਕਮਿਸ਼ਨਰ ਮੇਲ ਲੈਨਿਯਨ ਨੇ ਦੱਸਿਆ ਕਿ 50 ਸਾਲਾ ਸਾਜਿਦ ਪੁਲਿਸ ਵੱਲੋਂ ਗੋਲੀ ਮਾਰ ਕੇ ਮਾਰਿਆ ਗਿਆ, ਜਦਕਿ ਨਵੀਦ ਹਸਪਤਾਲ ਵਿੱਚ ਦਾਖਲ ਹੈ ਅਤੇ ਉਸਦੀ ਹਾਲਤ ਗੰਭੀਰ ਹੈ।

ਪੁਲਿਸ ਜਾਂਚ ਦੌਰਾਨ ਇਹ ਪਤਾ ਲੱਗਾ ਕਿ ਦੋਹਾਂ ਨੇ ਆਪਣੇ ਪਰਿਵਾਰ ਨੂੰ ਦੱਸਿਆ ਸੀ ਕਿ ਉਹ ਦੱਖਣੀ ਤੱਟ ‘ਤੇ ਮੱਛੀਆਂ ਫੜਨ ਜਾ ਰਹੇ ਹਨ। ਹਮਲੇ ਤੋਂ ਬਾਅਦ ਸਿਡਨੀ ਦੇ ਪੱਛਮੀ ਹਿੱਸੇ ਬੋਨੀਰਿਗ ਵਿੱਚ ਨਵੀਦ ਦੇ ਘਰ ਨੂੰ ਘੇਰਿਆ ਗਿਆ। ਨਵੀਦ ਦੀ ਮਾਂ ਵੇਰੇਨਾ ਨੇ ਮੀਡੀਆ ਨੂੰ ਦੱਸਿਆ ਕਿ ਪੁੱਤਰ ਆਖਰੀ ਵਾਰੀ ਐਤਵਾਰ ਸਵੇਰੇ ਪਰਿਵਾਰ ਨਾਲ ਗੱਲ ਕੀਤੀ ਸੀ ਅਤੇ ਵੀਕਐਂਡ ਲਈ ਆਪਣੇ ਪਿਤਾ ਨਾਲ ਜੇਰਵਿਸ ਬੇ ਗਿਆ ਸੀ।

ਪੁਲਿਸ ਨੇ ਘਟਨਾ ਸਥਾਨ ਤੋਂ ਸਾਜਿਦ ਦੇ ਛੇ ਲਾਇਸੈਂਸੀ ਹਥਿਆਰ ਬਰਾਮਦ ਕੀਤੇ। ਸਾਜਿਦ ਕੋਲ ਲਗਭਗ ਦਸ ਸਾਲਾਂ ਤੋਂ ਬੰਦੂਕ ਦਾ ਲਾਇਸੈਂਸ ਸੀ। ਇੱਕ ਸ਼ੱਕੀ ਦੀ ਗੱਡੀ ਵਿੱਚੋਂ ਇੰਪ੍ਰੋਵਾਈਜ਼ਡ ਐਕਸਪਲੋਸਿਵ ਡਿਵਾਈਸ (ਆਈਈਡੀ) ਅਤੇ ਆਈਐਸਆਈਐਸ ਦਾ ਝੰਡਾ ਵੀ ਮਿਲਿਆ।

ਪੁਲਿਸ ਦੇ ਅਨੁਸਾਰ, ਇਸ ਹਮਲੇ ਦੀ ਪਿਛੋਕੜ ਦੀ ਜਾਂਚ ਜਾਰੀ ਹੈ ਅਤੇ ਸ਼ੱਕੀ ਦੇ ਸੰਪਰਕ ਅਤੇ ਮੌਕੇ ਦੇ ਹੋਰ ਹਥਿਆਰਾਂ ਬਾਰੇ ਵੀ ਖੋਜ ਕੀਤੀ ਜਾ ਰਹੀ ਹੈ। ਸਿਡਨੀ ਸ਼ਹਿਰ ਦੇ ਲੋਕ ਹਮਲੇ ਤੋਂ ਬਾਅਦ ਡਰ ਅਤੇ ਚਿੰਤਾ ਵਿੱਚ ਹਨ, ਜਦਕਿ ਅਧਿਕਾਰੀਆਂ ਨੇ ਲੋਕਾਂ ਨੂੰ ਸੁਰੱਖਿਅਤ ਰਹਿਣ ਦੀ ਹਿਦਾਇਤ ਦਿੱਤੀ ਹੈ।