ਪੁਤਿਨ ਦੇ ਘਰ ‘ਤੇ ਡਰੋਨ ਹਮਲਾ, ਰੂਸ ਵੱਲੋਂ ਯੂਕਰੇਨ ਨੂੰ ਠਹਿਰਾਇਆ ਆਰੋਪੀ

ਰੂਸ ਨੇ ਦਾਅਵਾ ਕੀਤਾ ਹੈ ਕਿ ਯੂਕਰੇਨ ਵੱਲੋਂ ਰੂਸੀ ਰਾਸ਼ਟਰਪਤੀ ਵਲਾਦੀਮੀਰ ਪੁਤਿਨ ਦੀ ਉੱਤਰ-ਪੱਛਮੀ ਰੂਸ ਵਿੱਚ ਸਥਿਤ ਨਿੱਜੀ ਰਹਾਇਸ਼ ਨੂੰ ਨਿਸ਼ਾਨਾ ਬਣਾਉਂਦਿਆਂ ਡਰੋਨ ਹਮਲਾ ਕੀਤਾ ਗਿਆ। ਇਸ ਦਾਅਵੇ ਦੇ ਨਾਲ ਹੀ ਰੂਸ ਦੇ ਰੱਖਿਆ ਮੰਤਰਾਲੇ ਵੱਲੋਂ ਰਾਤ ਦੇ ਸਮੇਂ ਫ਼ਿਲਮਾਈ ਗਈ ਇੱਕ ਵੀਡੀਓ ਵੀ ਜਾਰੀ ਕੀਤੀ ਗਈ ਹੈ, ਜਿਸ ਵਿੱਚ ਬਰਫ਼ ਨਾਲ ਢੱਕੇ ਜੰਗਲ ਵਿੱਚ ਡਿੱਗਿਆ ਹੋਇਆ ਇੱਕ ਨੁਕਸਾਨੀ ਡਰੋਨ ਦਿਖਾਇਆ ਗਿਆ ਹੈ।

ਰੂਸ ਦਾ ਕਹਿਣਾ ਹੈ ਕਿ ਇਹ ਹਮਲਾ ਸੋਮਵਾਰ ਨੂੰ ਨਵਗੋਰੋਡ ਖੇਤਰ ਵਿੱਚ ਕੀਤਾ ਗਿਆ, ਜਿਸ ਵਿੱਚ ਕੁੱਲ 91 ਲੰਬੀ ਦੂਰੀ ਵਾਲੇ ਹਮਲਾਵਰ ਡਰੋਨ ਵਰਤੇ ਗਏ। ਰੂਸੀ ਅਧਿਕਾਰੀਆਂ ਮੁਤਾਬਕ ਸਾਰੇ ਡਰੋਨ ਹਵਾਈ ਰੱਖਿਆ ਪ੍ਰਣਾਲੀ ਰਾਹੀਂ ਮਾਰ ਗਿਰਾਏ ਗਏ। ਕ੍ਰੈਮਲਿਨ ਨੇ ਇਸਨੂੰ “ਸੋਚ-ਵਿਚਾਰ ਨਾਲ ਕੀਤੀ ਗਈ ਯੋਜਨਾ” ਅਤੇ “ਪੁਤਿਨ ‘ਤੇ ਨਿੱਜੀ ਹਮਲਾ” ਕਰਾਰ ਦਿੱਤਾ ਹੈ।

ਹਾਲਾਂਕਿ, ਯੂਕਰੇਨ ਨੇ ਰੂਸ ਦੇ ਸਾਰੇ ਦਾਅਵਿਆਂ ਨੂੰ ਸਖ਼ਤੀ ਨਾਲ ਨਕਾਰ ਦਿੱਤਾ ਹੈ। ਯੂਕਰੇਨ ਦੇ ਰਾਸ਼ਟਰਪਤੀ ਵੋਲੋਦਿਮੀਰ ਜ਼ੇਲੇਨਸਕੀ ਨੇ ਕਿਹਾ ਕਿ ਇਹ ਦਾਅਵਾ ਪੂਰੀ ਤਰ੍ਹਾਂ ਘੜਤ ਹੈ ਅਤੇ ਇਸ ਬਾਰੇ ਕੋਈ ਭਰੋਸੇਯੋਗ ਸਬੂਤ ਮੌਜੂਦ ਨਹੀਂ। ਉਨ੍ਹਾਂ ਨੇ ਆਪਣੇ ਸਹਿਯੋਗੀ ਦੇਸ਼ਾਂ ਨੂੰ ਵੀ ਇਸ ਮਾਮਲੇ ਦੀ ਖੁਦ ਜਾਂਚ ਕਰਨ ਦੀ ਅਪੀਲ ਕੀਤੀ ਹੈ।

ਇਸ ਮਾਮਲੇ ‘ਤੇ ਅਮਰੀਕੀ ਰਾਸ਼ਟਰਪਤੀ ਡੋਨਾਲਡ ਟਰੰਪ ਨੇ ਵੀ ਟਿੱਪਣੀ ਕੀਤੀ ਹੈ। ਟਰੰਪ ਨੇ ਕਿਹਾ ਕਿ ਉਨ੍ਹਾਂ ਨੂੰ ਇਸ ਹਮਲੇ ਬਾਰੇ ਸਿੱਧੀ ਜਾਣਕਾਰੀ ਪੁਤਿਨ ਵੱਲੋਂ ਦਿੱਤੀ ਗਈ ਸੀ ਅਤੇ ਕਿਸੇ ਰਾਸ਼ਟਰਪਤੀ ਦੇ ਘਰ ‘ਤੇ ਹਮਲਾ ਕਰਨਾ ਗੰਭੀਰ ਮਾਮਲਾ ਹੈ।

ਅੰਤਰਰਾਸ਼ਟਰੀ ਮੰਚ ‘ਤੇ ਇਸ ਘਟਨਾ ਤੋਂ ਬਾਅਦ ਰੂਸ-ਯੂਕਰੇਨ ਟਕਰਾਅ ਹੋਰ ਭੜਕਣ ਦੀ ਸੰਭਾਵਨਾ ਜਤਾਈ ਜਾ ਰਹੀ ਹੈ, ਜਦਕਿ ਦੁਨੀਆ ਭਰ ਦੀ ਨਜ਼ਰ ਹੁਣ ਇਸ ਦਾਅਵੇ ਦੀ ਸੱਚਾਈ ‘ਤੇ ਟਿਕੀ ਹੋਈ ਹੈ।