ਅਮਰੀਕਾ ਭਾਰਤੀ ਚੌਲਾਂ ਤੇ ਕੈਨੇਡੀਅਨ ਖਾਦ 'ਤੇ ਟੈਰਿਫ ਵਧਾ ਸਕਦਾ

ਅਮਰੀਕੀ ਰਾਸ਼ਟਰਪਤੀ ਡੋਨਾਲਡ ਟਰੰਪ ਨੇ ਭਾਰਤ ਤੋਂ ਆਯਾਤ ਹੋ ਰਹੇ ਚੌਲਾਂ 'ਤੇ ਟੈਰਿਫ ਵਧਾਉਣ ਦੇ ਸਾਫ਼ ਸੰਕੇਤ ਦਿੱਤੇ ਹਨ। ਅਮਰੀਕੀ ਕਿਸਾਨਾਂ ਦੀਆਂ ਸ਼ਿਕਾਇਤਾਂ ਦੇ ਬਾਅਦ ਟਰੰਪ ਨੇ ਕਿਹਾ ਕਿ ਬਾਜ਼ਾਰ ਵਿੱਚ ਆ ਰਹੇ ਸਸਤੇ ਵਿਦੇਸ਼ੀ ਚੌਲ ਅਮਰੀਕੀ ਉਤਪਾਦਕਾਂ ਲਈ ਚੁਣੌਤੀ ਬਣ ਰਹੇ ਹਨ।

ਟਰੰਪ ਨੇ 12 ਬਿਲੀਅਨ ਡਾਲਰ ਦੇ ਬੇਲਆਊਟ ਪੈਕੇਜ ਦਾ ਐਲਾਨ ਕੀਤਾ ਅਤੇ ਕਿਹਾ ਕਿ ਸਰਕਾਰ ਇਹ ਜਾਣਚੇਗੀ ਕਿ ਕਿਸ ਤਰੀਕੇ ਨਾਲ ਵਿਦੇਸ਼ੀ ਚੌਲਾਂ ਦੀ ਵੱਧ ਰਹੀ ਆਮਦ ਅਮਰੀਕੀ ਕਿਸਾਨਾਂ ਨੂੰ ਨੁਕਸਾਨ ਪਹੁੰਚਾ ਰਹੀ ਹੈ। ਕਿਸਾਨਾਂ ਦਾ ਦਾਅਵਾ ਹੈ ਕਿ ਵਿਦੇਸ਼ੀ ਚੌਲਾਂ 'ਤੇ ਮਿਲ ਰਹੀਆਂ ਸਬਸਿਡੀਆਂ ਕਾਰਨ ਅਮਰੀਕੀ ਚੌਲ ਦੀ ਕੀਮਤ ਘਟ ਰਹੀ ਹੈ।

ਟਰੰਪ ਨੇ ਇਹ ਵੀ ਕਿਹਾ ਕਿ ਉਹ ਕੈਨੇਡਾ ਤੋਂ ਆ ਰਹੇ ਖਾਦ (fertilizer) 'ਤੇ ਵੀ ਟੈਰਿਫ ਵਧਾਉਣ ਦੇ ਵਿਚਾਰ ਵਿੱਚ ਹਨ। ਉਨ੍ਹਾਂ ਦੇ ਮੁਤਾਬਕ, ਭਾਰਤ, ਥਾਈਲੈਂਡ ਅਤੇ ਚੀਨ ਤੋਂ ਚੌਲਾਂ ਦੇ ਆਯਾਤ ਨੂੰ ਨਜਰਅੰਦਾਜ਼ ਨਹੀਂ ਕੀਤਾ ਜਾ ਸਕਦਾ ਅਤੇ ਟੈਰਿਫ ਦੁੱਗਣਾ ਕਰਨ ਦੀ ਲੋੜ ਹੈ।

ਅਮਰੀਕਾ ਇਸ ਸਮੇਂ ਭਾਰਤੀ ਚੌਲਾਂ 'ਤੇ 50 ਫੀਸਦ ਟੈਰਿਫ ਲਗਾ ਰਿਹਾ ਹੈ। ਇਸਦੇ ਵਿਚਕਾਰ ਦੋਵਾਂ ਦੇਸ਼ਾਂ ਵਿਚਕਾਰ ਵਪਾਰਕ ਗੱਲਬਾਤ ਇਸ ਹਫ਼ਤੇ ਮੁੜ ਸ਼ੁਰੂ ਹੋਣ ਜਾ ਰਹੀ ਹੈ। 10 ਅਤੇ 11 ਦਸੰਬਰ ਨੂੰ ਅਮਰੀਕੀ ਅਤੇ ਭਾਰਤੀ ਵਫ਼ਦ ਦੁਵੱਲੇ ਵਪਾਰ ਸਮਝੌਤੇ ਨੂੰ ਅੱਗੇ ਵਧਾਉਣ ਲਈ ਮਿਲਣਗੇ। ਭਾਰਤ ਦੀ ਪੱਖੋਂ ਵਾਰਤਾਕਾਰ ਰਾਜੇਸ਼ ਅਗਰਵਾਲ ਹਿੱਸਾ ਲੈਣਗੇ।