Chandigarh Airport Fog Chaos: ਧੁੰਦ ਕਾਰਨ ਉਡਾਣਾਂ ਪ੍ਰਭਾਵਿਤ, ਯਾਤਰੀ ਪਰੇਸ਼ਾਨ

ਚੰਡੀਗੜ੍ਹ ਦੇ ਸ਼ਹੀਦ ਭਗਤ ਸਿੰਘ ਅੰਤਰਰਾਸ਼ਟਰੀ ਹਵਾਈ ਅੱਡੇ ‘ਤੇ ਅੱਜ ਸਵੇਰੇ ਸੰਘਣੀ ਧੁੰਦ ਅਤੇ ਘੱਟ ਵਿਜ਼ੀਬਿਲਟੀ ਕਾਰਨ ਹਵਾਈ ਆਵਾਜਾਈ ਬੁਰੀ ਤਰ੍ਹਾਂ ਪ੍ਰਭਾਵਿਤ ਹੋ ਗਈ। ਮੌਸਮ ਖਰਾਬ ਹੋਣ ਨਾਲ ਏਅਰਪੋਰਟ ਦਾ ਪੂਰਾ ਸ਼ਡਿਊਲ ਗੜਬੜ ਹੋ ਗਿਆ ਅਤੇ ਜ਼ਿਆਦਾਤਰ ਉਡਾਣਾਂ ਆਪਣੇ ਨਿਰਧਾਰਿਤ ਸਮੇਂ ਤੋਂ ਚਾਰ ਤੋਂ ਪੰਜ ਘੰਟੇ ਦੇਰੀ ਨਾਲ ਰਵਾਨਾ ਹੋਈਆਂ।

ਗੋਆ ਜਾਣ ਵਾਲੀ ਸਵੇਰੇ ਦੀ ਉਡਾਣ ਨੂੰ ਦੁਪਹਿਰ ਲਈ ਮੁੜ ਤੈਅ ਕਰਨਾ ਪਿਆ, ਜਦਕਿ ਸ੍ਰੀਨਗਰ ਜਾਣ ਵਾਲੀ ਫਲਾਈਟ ਵੀ ਕਈ ਘੰਟੇ ਲੇਟ ਹੋ ਕੇ ਸ਼ਾਮ ਨੂੰ ਰਵਾਨਾ ਹੋਈ। ਦਿੱਲੀ ਜਾਣ ਵਾਲੀਆਂ ਉਡਾਣਾਂ ਵਿੱਚ ਵੀ ਕਾਫੀ ਦੇਰੀ ਦੇਖਣ ਨੂੰ ਮਿਲੀ, ਜਿਸ ਕਾਰਨ ਯਾਤਰੀ ਲੰਬੇ ਸਮੇਂ ਤੱਕ ਏਅਰਪੋਰਟ ‘ਤੇ ਉਡੀਕ ਕਰਦੇ ਰਹੇ।

ਸਿਰਫ਼ ਦੇਰੀ ਹੀ ਨਹੀਂ, ਧੁੰਦ ਕਾਰਨ ਕਈ ਉਡਾਣਾਂ ਨੂੰ ਰੱਦ ਜਾਂ ਹੋਰ ਸ਼ਹਿਰਾਂ ਵੱਲ ਡਾਇਵਰਟ ਵੀ ਕਰਨਾ ਪਿਆ। ਕੁਝ ਆਉਣ ਵਾਲੀਆਂ ਉਡਾਣਾਂ ਨੂੰ ਵਿਜ਼ੀਬਿਲਟੀ ਘੱਟ ਹੋਣ ਕਰਕੇ ਹੋਰ ਹਵਾਈ ਅੱਡਿਆਂ ‘ਤੇ ਉਤਾਰਿਆ ਗਿਆ। ਸਵੇਰ ਦੇ ਸਮੇਂ ਏਅਰਪੋਰਟ ‘ਤੇ ਕਾਫੀ ਸਮੇਂ ਤੱਕ ਸੰਨਾਟਾ ਛਾਇਆ ਰਿਹਾ, ਕਿਉਂਕਿ ਉਡਾਣਾਂ ਦੀ ਆਵਾਜਾਈ ਰੁਕ ਗਈ ਸੀ।

ਮੁੰਬਈ, ਦਿੱਲੀ, ਪੁਣੇ, ਜੈਪੁਰ ਅਤੇ ਹੋਰ ਸ਼ਹਿਰਾਂ ਤੋਂ ਆਉਣ ਵਾਲੀਆਂ ਕਈ ਉਡਾਣਾਂ ਵੀ ਰੱਦ ਜਾਂ ਦੇਰੀ ਨਾਲ ਪਹੁੰਚੀਆਂ। ਇਸ ਅਚਾਨਕ ਬਦਲੇ ਹਾਲਾਤਾਂ ਕਾਰਨ ਸੈਂਕੜੇ ਯਾਤਰੀਆਂ ਨੂੰ ਯਾਤਰਾ ਯੋਜਨਾਵਾਂ ਬਦਲਣੀਆਂ ਪਈਆਂ ਅਤੇ ਕਈ ਲੋਕਾਂ ਨੂੰ ਕਨੈਕਟਿੰਗ ਫਲਾਈਟਾਂ ਵੀ ਮਿਸ ਹੋ ਗਈਆਂ।

ਮੌਸਮ ਵਿੱਚ ਸੁਧਾਰ ਆਉਣ ਤੋਂ ਬਾਅਦ ਹੌਲੀ-ਹੌਲੀ ਹਵਾਈ ਸੇਵਾਵਾਂ ਨਾਰਮਲ ਕਰਨ ਦੀ ਕੋਸ਼ਿਸ਼ ਕੀਤੀ ਗਈ, ਪਰ ਧੁੰਦ ਨੇ ਇੱਕ ਵਾਰ ਫਿਰ ਸਾਬਤ ਕਰ ਦਿੱਤਾ ਕਿ ਸਰਦੀਆਂ ਵਿੱਚ ਇਹ ਯਾਤਰੀਆਂ ਲਈ ਵੱਡੀ ਚੁਣੌਤੀ ਬਣ ਸਕਦੀ ਹੈ।